Fransa Səhiyyə Nazirliyi koronavirusun yeni ştamlarının yayılması ilə əlaqədar əhalinin revaksinasiyasını sürətləndirmək imkanını nəzərdən keçirir.

Gundemxeber.az xarici mediaya istinadla bildirir ki, bu barədə “France 2” telekanalının efirində Orelyen Russo məlumat verib.

"Yeni koronavirus peyvəndi kampaniyası oktyabrın 17-də başlayacaq və yeni ştamm artan sürətlə yayılarsa, sürətləndirilə bilər", - deyə Russo bildirib.

Səhiyyə Nazirliyinin rəhbəri onu da əlavə edib ki, qripə qarşı peyvəndlənmə də koronavirusa qarşı peyvəndlənmə ilə paralel aparılacaq.

Eyni zamanda, Russo fransızları məsuliyyətli olmağa çağıraraq, onlara koronavirusa yoluxma halında maska taxmağın və könüllü karantin tətbiqinin vacibliyini xatırladıb. İlin əvvəlində Fransa hakimiyyəti pandemiyanın azalması fonunda COVID-19 olan insanlar üçün məcburi karantin rejimini ləğv edib.

Sosial xidmətlərdən verilən məlumata görə, Fransada yanvarın 1-nə qədər təxminən 54 milyon insan koronavirusa qarşı peyvənd olunub ki, bu da ölkə əhalisinin 80%-ni təşkil edir.

Gundemxeber.az