Avropa Komissiyasının sədri Ursula fon der Lyayen rəsmi olaraq ikinci beşillik müddətə Avropa Komissiyasına rəhbərlik etməyə namizəd olub.

Gundemxeber.az-in xarici mediaya istinadla məlumatına görə, onun namizədliyi Aİ-nin aparıcı siyasi qrupu, sağ mərkəzçi Avropa Xalq Partiyası tərəfindən irəli sürülüb. Fon der Lyayen 400 lehinə, 89 əleyhinə səslə qalib gəlib.

Namizədlik nitqində o, Aİ iqtisadiyyatını inkişaf etdirəcəyini, qaçaqmalçılarla mübarizə aparacağını, rəqabət qabiliyyətini və biznesi gücləndirəcəyini və yaşayış dəyərinin artması ilə fermerlərə dəstək olacağını vəd edib.

O, həmçinin bəyan edib ki, Avropa İttifaqı müdafiə-sənaye potensialını əhəmiyyətli dərəcədə artırmalı, Aİ-yə üzv ölkələrin silah və qoşunlarını modernləşdirməlidir. Xanım Lyayen Ukraynaya maliyyə və hərbi yardımı artıracağını vəd edib.

Fon der Lyayen hazırda Komissiyaya yenidən rəhbərlik etmək üçün aşkar favorit hesab olunur. Blokda ifrat sağçı və populist partiyaların güclənməsinə baxmayaraq, rəy sorğularına görə, AXP iyun seçkiləri öncəsi digər siyasi qruplar arasında aydın liderliyini qoruyub saxlayıb.
Daha əvvəl Lyayen əmin olduğunu bildirib ki, avropalılar Vladimir Putinin nə qədər təhlükəli olduğunu yaxşı başa düşürlər və bu anlayış seçkilərin nəticələrinə təsir edir.

Avropa Parlamentinə seçkilər 2024-cü il iyunun 6-dan 9-dək keçiriləcək.

Bununla belə, bir çox Aİ ölkələri bu il həm də öz milli parlamentlərinə seçkilər keçirəcək. ABŞ artıq rəsmi şəkildə xəbərdarlıq edib ki, Rusiya nəticələri öz xeyrinə dəyişmək üçün bu seçkilərə müdaxilə etməyə çalışacaq.

Gundemxeber.az