Rusiya Ukraynaya genişmiqyaslı müdaxiləyə başladıqdan sonra cəbhədə 95 min 26 rusiyalı hərbçi həlak olub. Onların şəxsiyyəti "BBC Rus xidməti", "Mediazona" və könüllülər komandası tərəfindən açıq mənbələr əsasında müəyyən edilib.

Onların hesablamalarına görə, bu insanların 16 min 171-i koloniyalardan müharibəyə göndərilmiş məhkumlardır. Jurnalistlər yalnız açıq mənbələrdən məhkumluğunu təsdiq edə bildikləri şəxsləri hesaba alıblar, lakin onların faktiki sayı daha çox ola bilər.

Araşdırmada deyilir ki, məhkumlar Rusiyanın üçillik hərbi müdaxiləsi zamanı ordunun ümumi itkilərinin üçdə birini təşkil edə bilər. Bu şəxslərin əhəmiyyətli bir hissəsi uzun illər cəzaçəkmə koloniyalarında olub və faktiki olaraq cəmiyyətin qalan hissəsindən təcrid olunmuş vəziyyətdə yaşayıb.”

Həlak olanlardan biri də üç dəfə məhkum olunmuş İldus Sadıkovdur. O, 2024-cü ilin yayında Ukrayna əsirliyində olarkən, Moskvanın Kursk vağzalında çanta oğurladığına görə saxlanıldığını və ona güc strukturlarının müqavilə imzalamağı təklif etdiyini danışıb: "Dedilər ki, mənim yaşımda ön cəbhəyə göndərilməyəcəyəm, arxa cəbhədə işləyəcəyəm. Mən də razılaşdım." İldus daha sonra Ukrayna əsirliyindən mübadilə yolu ilə Rusiyaya qayıdıb, lakin onu yenidən döyüş bölgəsinə göndəriblər. O, 2025-ci ilin fevralında həlak olub. Onun 59 yaşı var idi.

Məlumata görə, həlak olanların yarıdan çoxu Rusiya ordusu və ya Rosqvardiya ilə əvvəllər əlaqəli olmayıb. Onlar yalnız Ukraynaya genişmiqyaslı müdaxilə başlandıqdan sonra Rusiya Müdafiə Nazirliyi ilə müqavilə imzalayıblar. Jurnalistlər qeyd edirlər ki, könüllülər arasında itkilərin artımı 2023-cü ilin oktyabrında müşahidə olunmağa başlayıb.

Rusiya müdafiə naziri Andrey Belousov ötən ilin dekabrında bildirib ki, 2024-cü ilin əvvəlindən etibarən 427 mindən çox insan müqavilə əsasında Rusiya ordusuna qoşulub. Prezident Vladimir Putin isə “insanların könüllü şəkildə cəbhəyə getdiyini” iddia edib.

Gundemxeber.az