ABŞ prezidenti Donald Tramp "Intel"in baş direktoru Lip-Bu Tana təriflər yağdıraraq birlikdə işləyəcəklərini bildirib. Halbuki Tramp bir neçə gün əvvəl Tanın istefasını tələb etmişdi.

Tramp ötən günlərdə istefasını istədiyi Lip-Bu Tanla Ağ Evdə görüşüb. Görüşdə ticarət naziri Hovard Lutnik və xəzinədarlıq naziri Skott Bessent də iştirak edib. Bu görüş, prezidentin qısa müddət əvvəlki sərt tənqidlərindən sonra açıq şəkildə ton dəyişikliyi kimi qiymətləndirilir.

"Bay Lip-Bu Tan ilə görüşdüm... Toplantı olduqca maraqlı keçdi. Onun uğur hekayəsi təsirlidir", deyə Tramp "Truth Social" paylaşımında yazıb.

O, Tanın gələn həftə kabinet üzvləri ilə birgə işləyərək özünə təkliflər təqdim edəcəyini də vurğulayıb.

"Intel" sözçüsü görüşü təsdiqləyib və bunu "açıq və konstruktiv" müzakirə adlandıraraq, əsas diqqətin ABŞ-ın texnologiya və istehsalat sahəsində liderliyini gücləndirməyə yönəldiyini bildirib.

Mart ayında baş direktor olan Tan, əvvəllər rəhbərlik etdiyi "Cadence Design" şirkətindəki bir məhkəmə işi və Çinlə əlaqələri səbəbindən senator Tom Kotton tərəfindən sorğu-sual edilmişdi. Ötən həftə isə Tramp Tanı "çox ciddi maraq toqquşması içində" olmaqda ittiham edərək istefasını tələb etmişdi.

Bu arada Tramp administrasiyası yarımkeçirici sektorunda sərt mövqeyini qoruyur. "Nvidia", Çinə satış edə bilmək üçün ABŞ hökumətinə satışlarının 15 faizini ödəmə qarşılığında ixrac lisenziyası alıb. Tramp əvvəlcə bu faizi 20 olaraq tələb etdiyini, lakin ötən cümə "Nvidia"nın baş direktoru Censen Huanla görüşdən sonra rəqəmi aşağı saldıqlarını deyib.

Gundemxeber.az