Yaxın Şərqdə hazırki toqquşmaların arxasında İran hakimiyyəti dayanır. 

“Yaxın Şərqdə sülhün, sabitliyin və əmin-amanlığın olması İran İslam Respublikasının geosiyasi maraqlarına ziddir”.

Gundemxeber.az bildirir ki, bu sözləri cebhe.info-ya açıqlamasında “Orta Doğu” Araşdırmalar Mərkəzinin rəhbəri, siyasi şərhçi Sədrəddin Soltan İsrailin Livan və Fələstinlə son hərbi toqquşmaları barədə açıqlamasında deyib. 

O bildirib ki, hazırda regionda hərbi-siyasi vəziyyətin gərginləşməsində İran hakimiyyətinin müstəsna rolu var: 

“İlk növbədə qeyd edim ki, Livan 1979-ci ilə qədər İsrailə qarşı heç bir hərbi əməliyyat keçirməyib. Livan nə 1967-ci ildə altı günlük İsrail-Ərəb müharibəsində iştirak edib, nə də 70-ci illərdə baş vermiş hadisələrə qatılıb. Lakin 1979-ci ildə İranda İslam İnqilabı nəticəsində siyasi quruluş dəyişdikdən sonra Livanda yeni siyasi vəziyyət meydana gəldi. 1980-ci ildən sonra İran hakimiyyətinin himayəsi ilə Livanda “Hizbullah” terror təşkilatı yarandı. Bundan sonra Livandan İsrailə hərbi təhlükə artmağa başladı. İstər 1982-ci ildə Birinci İsrail-Livan müharibəsi, istərsə də 2006-ci ildə hər iki dövlət arasında baş verən müharibənin arxasında məhz İran hakimiyyəti dayanırdı. Livanda “Hizbullah”ı İrandakı rejimdən başqa himayə edəcək qüvvə yoxdur. Tehran “Hizbullah” vasitəsilə həm Yaxın Şərqdə öz təsirini qoruyur, həm Livanda öz nüfuzunu gücləndirir, həm də İsraili təhdid edir”. 

Politoloqun sözlərinə görə, Yaxın Şərqdə regional sabitliyin və əmin-amanlığın bərqərar olması İran hakimiyyəti üçün sərf eləmir: 

“Tehran bu tip məsələlərdən ziyan çəkəcəyini düşünür. Regionda dəyişikliklərin baş verməsi labüddür. Dünyada baş verən son siyasi proseslər göstərir ki, yeniliklərin və müsbət dəyişikliklərin qarşısını alan yeganə amil İrandakı Tehran rejimidir. Ona görə də bu rejim regionda daim vəziyyətin gərginləşməsində maraqlıdır. Regionda vəziyyətin gərginləşməsi və qeyri-stabiliyin davam etməsi Tehrana həm ölkə daxilində hərbi diktaturanı gücləndirmək, həm də müxtəlif region ölkələrində təsir imkanlarını saxlamaq üçün münasib şərait yaradır. Bu rejimin əsas taktikası terrorçuluqdur. Ona görə də İran hakimiyyəti regionda gərginliklərin və toqquşmaların artmasında maraqlı olacaq”. 

Həmsöhbətimiz İran İslam İnqilabı Keşişçiləri Korpusunun Yaxın Şərqdə gərgin vəziyyətdən istifadə edərək Azərbaycana qarşı təxribatlara əl atacağını qeyri-mümkün hesab edib: 

“İran hakimiyyəti Azərbaycanla sərhəd ərazilərdə təxribat xarakterli hərbi təlimlər keçirməklə, Azərbaycanın Tehrandakı səfirliyinə hücum təşkil etməklə, Bakıda terror aktlarının törədilməsinə əl atmaqla, o cümlədən Azərbaycanın Qarabağ iqtisadi rayonunda qeyri-qanuni erməni silahlı dəstələrinə təlimlər keçmək üçün terrorçu qruplar göndərməklə Azərbaycanı İrana qarşı hər hansı addım atmağa təhrik etməyə çalışdı. Amma Tehran rejimin bu siyasəti baş tutmadı. Ona görə də yaxın perspektivdə SEPAH-ın Azərbaycana qarşı həmləedici təxribata əl atması ağlabatan deyil. İrandakı rejimin Azərbaycana qarşı hərbi əməliyyatlar keçirməsi Tehran üçün ölümcül zərbə ola bilər. Bu, təkcə Azərbaycan-İran münasibətləri yox, həmçinin İranın qonşuluğunda olan dövlətlərin və İranda yaşayan Azərbaycan türklərinin məsələsidir. SEPAH-ın belə bir addım atacağı inandırıcı görünmür”. 

Gundemxeber.az