Bankdan baş verən dələduzluq faktları ilə bağlı çoxsaylı məhkəmə araşdırmaları aparılıb

Ötən həftə “Zaminbank” ASC-yə bank əməliyyatlarının aparılması üçün verilmiş lisenziyalar ləğv edilib. Artıq bankın filialları rəsmi olaraq bağlanıb. Bankın baş ofisində isə təhvil-təslim işləri aparılır. Bank bağlanmamışdan əvvəl çoxsaylı şikayətlər olmuşdu. Bununla bağlı banka qarşı da çoxsaylı məhkəmə faktları ortaya çıxıb.

Bankın müştərilərini aldatması ilə bağlı çoxlu sayda cinayət işləri mövcuddur. Bunlardan bir çoxu barəsində məhkəmə hökmləri elan edilsə də, hələ də məhkəmədə bankın fəaliyyəti ilə bağlı cinayət işlərinin araşdırması davam edir.

“Zaminbank" ASC-də filial müdiri vəzifəsində işləmiş Müşfiq Bayramovun cinayət işi üzrə məhkəmə araşdırması Bakı Ağır Cinayətlər Məhkəməsində davam edir. Müşfiq Bayramov sənədləri saxtalaşdırmaqla ayrı-ayrı şəxslərin adından banka depozit kimi qoyulmuş külli miqdar pulu mənimsəməkdə təqsirli bilinir.

O, Cinayət Məcəlləsinin 179.2.3-cü (mənimsəmə və ya israf etmə, şəxs tərəfindən öz qulluq mövqeyindən istifadə etməklə törədildikdə), 179.2.4 (mənimsəmə və ya israf etmə, xeyli miqdarda ziyan vurmaqla törədildikdə) və 179.3.2-ci (mənimsəmə və ya israf etmə, külli miqdarda törədildikdə) maddələri ilə ittiham olunur.

Qeyd edək ki, Müşfiq Bayramov bankın “Cənub” filialının müdiri olub. Onun barəsində hələ 2013-cü ildə cinayət işi başlanıb. O, bir

qrup işçisi ilə birlikdə 2014-cü ildə mühakimə olunub. Sonradan aparılan istintaq zamanı başqa cinayətləri yenidən üzə çıxıb.

Bundan başqa, bankın rəhbər şəxsləri barəsində çoxlu sayda şikayətlər ortaya çıxıb. Bank rəhbərliyi saxta arayışlar təqdim etməklə vətəndaşların əmlaklarını da ələ keçirməsi iddia olunur.

Qarabağ əlilinin ölümü və ailəsinin başına açılan oyunlar

İkinci qrup Qarabağ əlili olan Qənimət Rəhmanova ilə “Zaminbank”ın Göyçay filialının müdiri Ilqar Fərzəliyev arasında hazırda məhkəmə çəkişməsi olub. Səbəb də budur ki, Qənimət Rəhmanovanın və ailənin digər üzvlərinin razılığı, imzası olmadan girov qoyulmuş və dəyəri təxminən 90-100 min manat olan evi əlindən alınıb.

İndi Qənimət Rəhmanova bilmir ki, kirayə pulunu versin, birinci qrup Qarabağ əlili olmuş, evlənəndən cəmi il yarım sonra dünyasını dəyişən oğlunun həyat yoldaşı və körpə uşağını saxlamaq üçün çörək pulu tapsın, yoxsa notariat kontoru və digər qurumlarla əlaqələr vasitəsilə qanunsuzluq edib evini əlindən alanların cəzalandırılması, mülkünün geri qaytarılması üçün hüquq-mühafizə orqanlarının, məhkəmələrin yolunda qalsın…

Qənimət xanım deyir ki, Qarabağ döyüşlərində yaralanmış oğlu faktiki acından ölürdü. Ona görə də dövlət tərəfindən verilmiş torpaq sahəsində kiçik bir köşk tikdirib, xırda ticarətlə çörəkpulu qazanmaq istəyib. Bu məqsədlə də atası “Zaminbank”ın Göyçay filialının müdiri Ilqar Fərzəliyevin qəbulunda olub: “Yoldaşım deyib ki, oğlumun və özümün pensiya kartlarımızı girov qoyaq, bizə kredit ayırın. Ilqar Fərzəliyev deyib ki, yox, mümkün deyil.

Yoldaşıma təklif eləyib ki, evini oğlunun adına keçir, girov qoyaq, pul verim. Yoldaşım deyib ki, mənim evimdə o qədər külfətim var, necə eləyim? Ev kitabında 16 nəfərin qeydiyyatı var. Deyib ki, sən sadəcə, razılıq ərizəsi yaz, notarius-filan məsələləri mənlikdi. Beləcə, ev kitabında qeydiyyatda olanların heç birinin razılığı, imzası olmadan ev üç illik baş etibarnamə ilə oğlumun adına keçib və girov qoyulub, amma evdə qeydiyyatı olanların heç birinin imzası, razılığı olmadan. Evə Bankın sənədlərindən görünür ki, evimə 60 min pul qoyulub, 25 min verilib. O 25 minin də 500-ünü elə pulu götürəndə xidmət haqqı adıyla alıblar. Iki aylıq kredit ödənişini də elə pulu götürən kimi ödəyib. Köşk yarımçıq tikilmişdi ki, oğlum tamamilə yatağa düşdü, tikili yarımçıq qaldı. Materiallara verdiyimiz pul da arada getdi. 8 ay oğlum yataqda qaldı, bulyonu qaynadıb süzüb verməklə həmin müddətdə onu saxlayırdım. Oğlum evlənəndən düz il yarım sonra dünyasını dəyişdi. Onu da deyim ki, bankda ödəniləndən əlavə, sonradan da müəyyən məbləği banka ödəmişdik. Oğlum rəhmətə gedəndən sonra Ilqar Fərzəliyevə gedib yalvardım ki, qurban olum, cavan gəlinlə, körpə uşaqla bizi küçəyə atma, pulu ödəyəcəyik. Axı o körpənin atası bu vətənin yolunda canını qoyub… Dedim ki, həyat yoldaşım Əmək veteranıdır, yaxşı pensiya alır, həm onun, həm də özümün pensiya kartımı qoyum, banka olan borcumuz qurtarana qədər götürməyəcəm. Evimdə də nəyim varsa, satıb, pulunu ödəyəcəm. Dedi ki, sən nə danışırsan, evdən çıxmalısız. Hazırda 90-100 min qiyməti olan, bankın özünün də 60 minə dəyərləndirdiyi evimi 20 min 500 manata guya, satdı. Bizi polislər sürüyə-sürüyə evimizdən çıxarıb atdılar. Ilqar Fərzəliyevin yanına

getdim, mənə dedi ki, get, kimə istəyirsən şikayət elə, lap elə prezidentinə də, mən heç kimdən qorxmuram…”

“Belə Allahsızlıq olar?!”

Qeyd edək ki, Qənimət Rəhmanova Göyçay rayon məhkəməsinin onun evinin əlindən alınması haqda qərarından Şəki Apelyasiya Məhkəməsinə şikayət verib. Müvafiq qurumlara şikayət ediləndən sonra Şəki Apelyasiya Məhkəməsi onun xeyrinə qərar çıxarıb.

Qarşı tərəf – “Zaminbank”ın Göyçay filialının rəhbərliyi bu qərardan Ali Məhkəməyə kasasiya şikayəti verib. Ali Məhkəmə işi yenidən baxılması üçün Şəki Apelyasiya Məhkəməsinə göndərib.

Şəkidə bu dəfə də – 2015-ci ilin avqustun 28-də Qənimət Rəhmanovanın xeyrinə qərar çıxarılıb və iş yenidən baxılması üçün Göyçay rayon məhkəməsinə qaytarılıb. Hazırda bu iş üzrə məhkəmə araşdırması davam edir.

“Zaminbank”ın filial müdiri vətəndaşın evini əlindən alıb, öz işçisinə verib

“Zaminbank” vasitəsilə evindən məhrum edilən Səidə Babayeva da dövlət başçısına, eləcə də hüquq-mühafizə orqanlarının rəhbərlərinə ünvanladığı məktubda bankın Göyçay filialının müdiri İlqar Fərzəliyevin qanunsuzluğundan şikayətlənib. Hazırda bir azyaşlı qız uşağı və 75 yaşlı anası ilə qohum-əqrəbanın küncündə sığınacaq tapan Səidə xanım yazır ki, “Zaminbank”dan 3000 manat kredit götürmək üçün Göyçay rayon filialına müraciət edib. Rayonda yerləşən iki otaqlı evinə baxış keçirilsə də, filialın müdiri ona işləmədiyini əsas gətirərək, kredit ayırmaqdan imtina edib.

Təxminən iki ay sonra “Aqrokredit” MMC-nin işçisi Tural Şıxəliyev və qohumu Cahan Babayeva ona zəng edərək, “Zaminbank”dan pul götürə biləcəklərini deyib və ondan Göyçaydakı notariusa gəlməyini istəyiblər. Səidə Babayeva əmindir ki, bu məsələdə filial müdiri Ilqar Fərzəliyevlə Tural Şıxəliyev əlbir olub.

Hüquq-mühafizə orqanları dələduzluğa göz yumur

Maraqlıdır ki, Səidə Babayeva dələduzluğa məruz qaldığı haqda hüquq-mühafizə orqanlarına müraciət etsə də, onun şikayətinə əhəmiyyət verən yoxdur: “Dəfələrlə Göyçay Rayon Polis Şöbəsinə müraciət etmişəm ki, Tural Şıxəliyev dələduzluğa görə cəzalandırılsın. Amma polis faktiki onu cəzalandırmaqdan imtina edir. Bu adamı gətirib dindirmirlər, mənimlə üzləşdirmirlər, onu tapmağın mümkün olmadığını deyib, bu əsasla da cinayət işi başlamaqdan imtina edirlər. Savadsızlığımdan istifadə edib məni süründürürlər. Göyçay polisində rəis Islam Hümbətov mənə deyir ki, Tural Şıxəliyev Sumqayıtdadır, ”Ford” maşını sürür, get, tap gətir, dindirək. Məgər onu tapıb gətirməyə mənim səlahiyyətim var? Yerini, maşınını bilirlər, amma gətirib cəzalandırmaq istəmirlər. Inanın, azyaşlı qız uşağı ilə, 75 yaşlı qoca anamla küçələrdə qalmışam”.

Qeyd edək ki, son vaxtlar bankdan edilən şikayətlərlə bağlı çoxsaylı məhkəmə araşdırmaları aparılıb. Bununla bağlı yüzlərlə məhkəmə qərarı və qətnaməsi bankın rəhbərliyi tərəfindən icra edilməyib.