Təqsirləndirilən şəxs: “Polis əməkdaşları məni döydülər, evdən qızıl oğurlamağımı boynuna almağı tələb etdilər”

“Gecə yarıya kimi məni döydülər, Timura elektroşok verildi”

Narkotik alverində ittiham olunan Gürcüstan vətəndaşı, 1973-cü il təvəllüdlü Çakvetadze Koba Joroyeviçin cinayət işi üzrə məhkəmə prosesi başa çatıb. İttihama görə, Çakvetadze Koba Joroyeviç istintaqa məlum olmayan mənbədən, satış məqsədi olmadan narkotik vasitə olan heroini əldə edib. O, həmin narkotik vasitəni üzərində saxlayıb.

Koba Cakvetadze 17 yanvar 2015-ci il tarixdə, saat 13.00-da Sabunçu rayonu, Sabunçu qəsəbəsi, Ç.Şərifov küçəsi, 48 saylı evin qarşısında 12-ci polis bölməsinin əməkdaşları tərəfindən saxlanılıb. O, polis bölməsinə aparılıb və bölmənin xidməti otaqlarının birində onun üzərinə baxış keçirilib.

Baxış zamanı onun əynindəki şalvarının arxa sağ cibindən 1 ədəd gümüşü kağız bükümdə təmiz çəkisi 0,589 qram narkotik vasitə olan heroin aşkar edilərək götürülüb.

“16 il polis orqanlarında xidmət etmişəm”

İstintaq orqanı Koba Cakvetadzeyə Cinayət Məcəlləsinin 234.1-ci (satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) maddəsi ilə ittiham verilib. Onun cinayət işi Sabunçu rayon Məhkəməsində araşdırılıb.

Məhkəmədə ifadə verən Koba Çakvetadze özünü elan olunmuş ittiham üzrə təqsirli bilməyib. O, bildirib ki, özü evlidir və 3 övladı var: “Gürcüstanda 16 il polis orqanlarında xidmət etmişəm, 2007-ci ildə təqaüdə çıxmışam. İşsiz olduğumdan ailəmi dolandırmaq üçün ustalıq etmişəm. Bu məqsədlə gürcü tanışlarımın dəvəti ilə işləmək üçün Bakı şəhərinə gəlmişəm. Həmin vaxtdan mənzilləri

təmir etməklə məşğul olmuşam”.

“Qoluma qandal vurdular”

Təqsirləndirilən şəxsin sözlərinə görə, Nərimanov rayonunda gürcü tanışları ilə kirayə mənzildə qalıb: “16 yanvar 2015-ci il tarixdə, axşam saat 19.00-da tanışım Eldar istifadə etdiyim mobil telefona zəng edərək mənimlə görüşmək istədiyini bildirdi. Eldara evdə olduğumu dedim. Eldar yaşadığım evin küçəsinə düşməyimi xahiş etdi. Nərimanov rayonunda yaşadığım evdən 150 metr aralı məsafədə “NBC Bank” ASC-nın binasının yaxınlığından keçən zaman 5-6 nəfər dayanmış mülki geyimli şəxslərdən biri mənə yaxınlaşaraq Azərbaycan dilində nəsə soruşdu. Onlara Azərbaycan dilini başa düşmədiyimi rus dilində bildirdim. Sonra həmin şəxs məndən rus dilində adımı və haralı olduğumu soruşdu. Ona gürcü millətindən olduğumu bildirdim. Bu zaman onlar qoluma qandal vurdular. Bundan sonra həmin mülki geyimdə olan şəxslərdən ikisi üzərimi hərtərəfli axtarmağa başladı, hətta pul qabıma belə baxdılar. Üzərimdən mobil telefon və pul qabı aşkar edildikdən sonra maşına məcburi qaydada oturtdular”.

“Polis əməkdaşları məni döydülər”

Koba Çakvetadze qeyd edib ki, maşında özü, tanışı Eldar, yanında olan digər gürcü Timur və polis əməkdaşları olublar: “Maşında “Xəlil” adlı şəxsin evindən qızıl-zinət əşyalarının oğurladığını etiraf etməyimi tələb etdilər. Həmin şəxslərə “Xəlil” adlı şəxsi tanımadığımı və evindən hansısa qızılların oğurlanması barədə məlumatımın olmadığını bildirdim. Həmin şəxslər “bölmədə deyəcəksən” deyə istehza ilə mənə cavab verdilər. Məni saxlayan və maşına mindirən polis əməkdaşlarının heç biri xidməti formada olmayıblar. Maşında olan zaman mülki geyimdə şəxslərin tez-tez Seymur deyə bir şəxsə müraciət etdiyini eşitdim. Üzərimi axtaran şəxslərdən biri “Seymur” deyə çağırılan şəxs olub. Polis bölməsinə çatanda gecə saat 23:00-24:00 radələri olardı. Gecə saat 03:00-a qədər bölmədə polis əməkdaşları məni döydülər, evdən qızıl oğurlamağımı boynuna almağı tələb etdilər. Həmin gecə saat 03.30-da məni dəmir barmaqlıqların arxasına saldılar”.

“Cibimə nəsə qoyduğunu hiss etdim”

Təqsirləndirilən şəxsin sözlərinə görə, həmin günün səhəri polis işçiləri onu dəmir barmaqlılar tərəfə çağırıb və qollarını barmaqlıqdan çölə çıxartmasını tələb ediblər: “Qolumu çıxaran zaman qoluma qandal vuruldu. Bundan sonra saxlanıldığım yerə tanımadığım mülki geyimdə şəxs girdi. Bu zaman arxa cibimə həmin şəxsin nəsə qoyduğunu hiss etdim. Sonra qolumdan qandal açıldı. Əlimi cibimə salaraq baxmaq istəyən zaman polis əməkdaşları saxlanıldığım yerə daxil oldular. Onlar qarnımdan təpik vuraraq məni yenə döydülər. Bölmədə polis əməkdaşları məni, Eldarı və Timuru döydülər, Timura elektroşok verildi və Seymur Timuru döyən zaman qulağından qan axdı. Sonra oradan

çıxararaq məni xidməti otağa apardılar. Həmin otağa 2 nəfər şahid gəldi. Bundan sonra cibimdən nəsə çıxardılar. Bir gün bölmədə saxlanıldıqdan sonra üzərimə baxış keçirildi”.

Koba Çakvetadze bildirib ki, yanvarın 17-də, günün birinci yarısı, saat təxminən 10-11 arası onu tibbi müayinədən keçməyə apardılar: “Həmin vaxt maşında özüm, Timur və Eldar olub. Barəmdə həbs məsələsinə baxılması üçün məhkəməyə gətirilən zaman polis əməkdaşları tərəfındən verilən mütəmadi fıziki və mənəvi işgəncələrdən qorxduğum üçün heç nə deyə bilmədim. Bakı İstintaq Təcridxanasına gedəndən sonra barəmdə narkotik saxladığına görə cinayət işinin qaldırıldığını bilmişəm. Polislərin mənə əziyyət verəcəyindən artıq qurtulduğumu başa düşdüm. Səfırliyə və digər dövlət orqanlarına şikayət etdim. Bölmədə polislər məni döyərək təzyiq etdiyindən qorxudan cinayəti boynuma götürdüm. Heç vaxt narkotik vasitə istifadə etməmişəm və narkomaniya xəstəliyindən əziyyət çəkməmişəm”.

“Kobanı maşından göstərdim”

Şahid qismində ifadə verən Eldar Həsənov bildirib ki, qonşusu Xəlil Əli oğlu tərəfındən oğurluq hadisəsi ilə əlaqədar sonuncunun evinə çağırılıb: “Xəlilin qızının evində oğurluq hadisəsi olduğunu bildirdi və məndən şübhələndiyini dedi. Mən isə bunu boynuma almadığımdan bir saat sonra 12-ci polis bölməsinin əməliyyat müvəkkili Seymur, Malik və başqa polis əməkdaşlarının gələrək məni bölməyə apardılar. Bölmədə mənə Xəlilin evində olan oğurluğu etiraf etməyini tələb edildi. Oğurluq hadisəsini boynuma götürmədiyimdən fiziki və mənəvi təzyiq edildi. Döyülməkdən qurtulmaq üçün yalandan polis əməkdaşlarının telefonumda

gördüyüm “Bico” adlı şəxsin, yəni Koba adlı gürcü tanışımın oğurluq etməsini bildirdim. Polis əməkdaşları mənə telefon verərək Koba ilə görüş təyin etməyini tələb etdilər. Koba ilə razılaşdığım kimi polis əməkdaşları ilə birlikdə Kobanın kirayədə yaşadığı Nərimanov rayonuna getdik. Həmin yerə 2-3 maşın birlikdə getdik. Seymur və Malik adlı polis əməkdaşları, qonşum Xəlilin də maşında olub. Kobanı maşından göstərdim. Sonra polis əməkdaşlarının Kobaya yaxınlaşaraq tutdular. Həmin vaxt Kobanın yanında başqa gürcü də olub. Onların ikisini də tutdular. Kobanın üstü Xəlil tərəfındən yoxlanıldı. Sonra bizim hər üçümüzü bölməyə gətirərək döydülər. Xəlilin evində olan oğurluğu boynuma götürməyimizi tələb edildi”.

Sabunçu rayon Məhkəməsində Koba Çakvetadzenin barəsində olan cinayət işi üzrə araşdırma aparılandan sonra hökm elan edilib. Hökmə əsasən, Koba Çakvetadzenin barəsində olan cinayət işi sübuta yetirilməyib və onun barəsində bəraət hökmü çıxarılıb.

Koba Çakvetadzenin barəsində seçilmiş həbs-qəti imkan tədbiri ləğv edilib və o, məhkəmə zalından azadlığa buraxılıb. Hökmdən Baş Prokurorluq apelyasiya protesti verib. Prokurorluğun protestinə Bakı Apelyasiya Məhkəməsində baxılıb və təmin edilməyib. Bundan sonra prokurorluq kasasiya protesti verib.

Ali Məhkəmədə protestdə hakim Gülzar Rzayevanın sədrlik etdiyi kollegiyada baxılıb. Hakim kollegiyası kasasiya şikayətinin dəlillərini araşdırandan sonra qərar elan edib. Qərara görə, prokurorluğun kasasiya şikayəti təmin edilməyib.