Nəqliyyat naziri oğlunun ABŞ-ın yeni prezidenti ilə dost olması bu klanın iqtidarda yüksəlişi, siyasi rolunun dirçəlişinə təkan verə bilər

Ziya Məmmədovun vitse-prezidentliyə yolunun açıldığı bildirilir; rəsmi Bakı Vaşinqtonla yeni münasibətləri Anar Məmmədov hesabına quracaqmı? - təfsilat

ABŞ-da prezident seçkiləri sürpriz nəticə ilə yekunlaşdı. Donald Trampın qələbəsi bütün dünyanı şoka saldı. Əksəriyyət Hillari Klintonun zəfər çalacağını gözləyirdi.



Amma demokratların respublikaçılara uduzması dünyanın siyasi xəritəsində dəyişikliklərə səbəb olacaq.

Trampın idarə edəcəyi ABŞ ölkələrə münasibətdə əvvəlkindən ciddi fərqlənəcək. Bu da həm böyük, həm cırtdan ölkələrin siyasətinə təsir edəcək. Vaşinqtonun xarici siyasətində, Yaxın Şərq konyukturasında böyük yeniliklər gözlənilir.

Bu siyasətin bir ucu da Cənubi Qafqaz, Ukrayna və Kremllə bağlı olacaq. Trampın siyasi xəritəsində hansı dəyişikliklər olacağı yaxın zamanlarda bilinəcək. Eyni zamanda Ağ evin Azərbaycanla bağlı siyasəti maraqla gözlənilir.



Ümid olunur ki, Trampın rəsmi Bakı ilə əlaqələrində yenilənmələr olacaq. Onun prezident seçilməsindən ən çox sevinən Məmmədovlar ailəsidir.

Nəqliyyat naziri Ziya Məmmədovun karyerasının qürub etdiyi bir zamanda oğlu, iş adamı Anar Məmmədovun dostu Trampın supergüc dövlətin prezidenti seçilməsi ciddi tramplin ola bilər.

Bu barədə “Gündəm-xəbər”in yaydığı məlumata görə, Məmmədovların yenidən iqtidarda yüksəlişi, öləziməkdə olan əlaqələrinin güclənməsi, bu klanın siyasi rolunun dirçəlişi gözləniləndir. İndi Məmmədovların çiçəyi çırtlayıb.

Donald Trampın ABŞ-ın prezidenti seçilməsi nəqliyyat naziri Ziya Məmmədovu şad-xürrəm edib. Məlumata görə, nazir sevincindən yerə göyə sığmır. Əldə etdiyimiz bilgilərdə iddia edilir ki, Z.Məmmədov Trampın şərəfinə ziyafət verib.

O, yaxın çevrəsi ilə bu qələbəni qeyd edib. Sevincindən yeyib-içmək məclisi təşkil edən nazir oğlu Anar Məmmədovla bu bayramı toy-büsata çevirib.



İndi Məmmədovlar ailəsi şənlik içindədir. Z.Məmmədovun yolunun vitse-prezidentliyə açıldığı da bildirilir. Xeyli vaxtdır ki vurulan və səlahiyyətləri itirilən nazir revanşa hazırlaşır. Onun Tramp sayəsində hakimiyyətdə mövqelərini möhkəmləndirməsi və Bakı ilə Vaşinqton münasibətlərində vasitəçilik etməsi son dərəcə realdır və mümkündür. ABŞ-da respublikaçıların prezidentliyə hazırda ən reytinqli iddiaçısı olan tikinti maqnatı, milyarder Donald Tramp azərbaycanlı oliqarx Anar Məmmədova görə kəskin tənqidə məruz qalıb. Donald Trampın adını daşıyan dəbdəbəli otellər dünyanın bir çox şəhərlərində var. Ancaq onlardan biri diqqəti xüsusi cəlb edir. Bu da neftlə zəngin Azərbaycanın paytaxtında ucalan “Tramp Hotel”dir. Trampın biznes-müttəfiqi Anar Məmmədovdur. 2014-cü ildə D.Tramp bəyan edib ki, “Trump İnternational Hotel & Tower Baku” “Trump Organization”un standartlarını daşıyan ən yaxşı qlobal inkişaf layihələrindən biridir.



D.Trampın adını daşıyan binaların çoxu kimi Bakıdakı otel də ona məxsus deyil. Bina Məmmədovun nəzarət etdiyi “Garant Holding” tərəfindən tikilib və onun şirkətinə məxsusdur. Lakin Tramp adının bu oteldə istifadə edilməsinə və layihə ilə bağlı təcrübəsinə görə sərfəli komissiyon qazanıb.

ABŞ prezidentliyinə iddiaçı kimi bu yaxınlarda açıqladığı maliyyə hesabatına əsasən Donald Tramp ən azından ötən il Bakıdakı otellə bağlı işlərə görə 2,5 milyon dollar alıb. Otel Trampın dəbdəbəli otellər zəncirinin bir hissəsi kimi idarə olunacaq. Maliyyə sənədlərindən məlum olur ki, Anar Məmmədovun otelini idarə etmək üçün “THC Baku Hotel Manager Services LLC”, “THC Baku Hotel Manager Services Member Corp.” , “THC Baku Services LLC” və “THC Baku Services Member Corp.” adlı şirkətlər təsis edilib. Həmin şirkətlərin ikisində Donald Tramp 100 faiz, ikisində isə 99 faiz paya malikdir.



“Gündəm-xəbər” in məlumatına görə, Məmmədovlar dünənə qədər bütünlüklə hakimiyyətdən uzaqlaşdırılmışdı. Nazirin səlahiyyətləri azaldılmışdı, avtovağzal çökdürülmüşdü, Elton Məmmədov mandatsız qalmışdı, oğlu Aynar və nazir oğlu Anarın əvvəlki fəallığı nəzərə çarpmırdı.

Bu günlərdə gənc blogger Mehman Hüseynov səs-küyə səbəb olacaq növbəti videosunu hazırlayıb. O bəzi məmurların villasının görüntülərini çəkib. Videoda sual edilir ki, öz halal maaşları ilə məmurlar bu villaları neçə əldə ediblər? Məmurların biznes fəaliyyəti qadağandırsa bəs onlar bu nəhəng villaları neçə tikə biliblər? Bu sualların isə sadə cavabları var: büdcə pullarının talanması, çirkli pulların yuyulması,



korrupsiya fəaliyyəti və biznes şəbəkələrinin olması. Videosu yayılan villalardan biri nəqliyyat naziri Ziya Məmmədovun imiş. Nazirin malikanəsinin olması təəccüb doğurmayıb. Çünki Z.Məmmədovun fəaliyyəti göz qabağındadır. O, illərlə Azərbaycan xalqının pullarını mənimsəyib. Son zamanlar qürub çağını yaşayan nəqliyyat kralı tamamilə siyasi dayaqlarını itirib. Onun rəsmi şəkildə səlahiyyətlərinin də heç endirilməsi vəziyyətinin nə yerdə olduğunu ifadə edir. Buna baxmayaraq Məmmədovun milyonluq sarayları qalmaqdadır. Ondan bu villaları hansı pula tikdiyini rəsmi qaydada soruşan da yoxdur. Ancaq gedişat göstərir ki, nazirin qələmi qırılıb və siyasi taleyi həll olunub. Nəqliyyat Nazirliyinin ləğvi ilə bağlı sənədlər artıq hazır idi. Bununla belə Ziya Məmmədovun hansısa vəzifəyə təyin olunacağı inandırıcı görünmürdü. Çünki artıq Ziya Məmmədovu tədbirlərə belə dəvət etmirdilər. Nazir əvvəlki kimi avtoritarlıq edə bilmir. Hakimiyyət düşərgəsində də nəqliyyat nazirinə münasibət dəyişib. İndi ona “bağda ərik var idi, salam-əleyk var idi” misalına bənzər hörmət saxlanır. Hətta iddialara görə, nazirin yaxın vaxtlarda istefası gerçəkləşəcək. Nəqliyyat Nazirliyinin səlahiyyətləri son bir ildə xeyli azaldılıb. Nazirliyin bəzi səlahiyyətləri alınaraq başqa qurumlara verilib, eyni zamanda tabeliyindəki bir sıra strukturlar onun tərkibindən çıxarılıb. Bu səlahiyyətlər hər dəfə azalanda nəqliyyat naziri Ziya Məmmədovun da işdən çıxarılacağı iddiaları gündəmi zəbt edib. Hələ ki nazirlə bağlı gözlənilən baş verməyib. Nazirin əlindən alınan səlahiyyətlərin isə uzun bir siyahısı var. 2015-ci il sentyabrın 12-də Prezidentin imzaladığı fərmanla taksi minik avtomobilləri ilə sərnişin daşınmasına xüsusi razılıq (lisenziya) verilməsi, taksi minik avtomobilləri ilə sərnişin daşınmasını həyata keçirən sadələşdirilmiş vergi ödəyicilərinə məxsus nəqliyyat vasitəsinə “fərqlənmə nişanı” verilməsi səlahiyyətləri Nəqliyyat Nazirliyinin tərkibindən çıxarılaraq ASAN Xidmətə verilib. Ölkə başçısının sentyabrın 18-də imzaladığı digər fərmanla “Azərbaycan Dəmir Yolları “ Qapalı Səhmdar Cəmiyyəti Nəqliyyat Nazirliyinin tərkibindən ayrılaraq yeni qurum kimi təsis edilib.

Bu siyahını çox uzatmaq olar ki, mətbuatda kifayət qədər yazılıb. Demək olar ki, nazirin heç bir səlahiyyəti qalmayıb.

Artıq Bakıda keçirilən “Eurovision” musiqi yarışması ərəfəsində paytaxta gətirilən “London taksisi” xidməti artıq uzun müddətdir ki, böhran dövrünü yaşayır.

Məlumata görə, heç bir uğur qazanmayan bu xidmət nəqliyyat naziri Ziya Məmmədovdan alınır. Bu xidmət rəsmən çökmək üzrədir. Əgər taksi xidmətinin inkişafını istəyirlərsə, yenilik etsinlər. Planı azaltsınlar, sürücü evinə çörək apara bilsin. Görünən budur ki, artıq Ziya Məmmədovun iqtisadi cəhətdən çökdürülməsi əməliyyatı başlayıb. “BakuBus” Məhdud Məsuliyyətli Cəmiyyətinin yaradılıb. Bu qərarla paytaxtda sərnişin daşınmasının təşkili Bakı şəhər İcra Hakimiyyətinə həvalə edilib. Paytaxtda sərnişin daşınması nəqliyyat naziri Ziya Məmmədova məxsus “Transqeyt” şirkətinin monopoliyasında idi. Nazirlər Kabinetinin sözügedən qərarı ilə sərnişin daşınma xidməti BŞİH-nin nəzarətinə keçdi. Bununla Ziya Məmmədovun daha bir maliyyə qaynağı qapadılıb. Bir qədər öncə Bakı yollarının təmir-bərpası funksiyası da Nəqliyyat Nazirliyindən alınıb. Bakı şəhər İcra Hakimiyyətinə verilmişdi. Nazirliyin əsas müəssisəsi olan “Azəryolservis” ASC də faktiki olaraq Z.Məmmədovun təsir dairəsindən çıxarılıb. Son aylar ərzində Bakıda taksi xidmətindən istifadə edənlərin sayı kəskin sürətdə azalıb. Hətta taksilərdə qiymətlərin müəyyən dərəcədə aşağı düşməsi də vəziyyəti dəyişməyib. Bunu Bakının mərkəzində, “Tarqovı”da taksi fəaliyyəti ilə məşğul olan sürücülər deyir. Onlar müştəri tapmadıqlarından şikayət edib, günlərini domino oynamaqla başa vurduqlarını bildirirlər. Məmmədovun səlahiyyətlərinin çoxu bir-bir əlindən çıxarılıb. Belə ki, dövlət mülkiyyətində və ümumi istifadədə olan respublika və yerli əhəmiyyətli avtomobil yolları Nəqliyyat Nazirliyindən alınaraq, "Azəravtoyol” ASC-nin balansına verilib. Nəqliyyat sektoruna aid bir sıra səlahiyyətlər də «ASAN xidmət»ə, bəziləri də Dövlət Yol Polisinə keçib. Ötən il çıxarılan qərar görə taksilərin, yük avtomobillərinin və sərnişin avtobuslarının fəaliyyətinə, sərnişin və yükdaşıma qaydalarına (lisenziyalaşdırma, vergilərin ödənilməsi, fərqlənmə nişanı və s. məsələlərə) riayət etmə, həm də yol hərəkəti qaydalarına riayət etmə baxımından yalnız Dövlət Yol Polisi nəzarət edir. Buna qədər “Azərbaycan Dəmir Yolları” QSC Nəqliyyat Nazirliyindən tabeliyindən çıxarılmışdı. Həmçinin sərnişidaşıma NN-dən alınıb. Keçən il Bakı Nəqliyyat Agentliyi yaradılıb. NN- dəki Avtonəqliyyat Xidmətinin sərnişindaşıma ilə bağlı və Nəqliyyatın İntellektual İdarəetmə

Mərkəzinin funksiyaları da həmin quruma verilib. Nazirin təkcə səlahiyyətləri və biznesi əlinən alınmayıb, onun kadrları da işdən çıxarılıb.

Amma Trampın qələbəsi nazirin siutasiyasını dəyişib. Onun hakimiyyət düşərgəsində güclənməsi və yeni vəzifəyə təyinatı mümkündür. Daha çox vitse-prezidentlik şansları yaranıb.

Bildirək ki, nəqliyyat naziri Ziya Məmmədovun biznesmen oğlu Anar Məmmədov ABŞ-ın yeni prezidentini təbrik edib.

Azərbaycan-Amerika Alyansının rəhbəri, tanınmış biznesmen Anar Məmmədov ABŞ-da keçirilən prezident seçkilərinin qalibi Donald Trampı "Instagram" hesabından təbrik edib.

O, Trampın qızı ilə fotosunu paylaşaraq "Əziz dostum, sizi və ailənizi bu tarixi gün münasibətilə təbrik edirəm" yazıb. Qeyd edək ki, ABŞ-ın prezidentinin Anar Məmmədovla ailəvi dostluğu və biznes şərikliyi var.

Maraq üçün deyək ki, ABŞ-da keçirilən prezident seçkilərində Respublikaçılar partiyasının namizədi Donald Trampın qələbəsi dünyada müxtəlif reaksiyalar doğurub.

Bu arada onun ünvanına təbriklər səslənməkdədir. Bəstəkar-müğənni Emin Ağalarov da bu münasibətlə Donald Trampı təbrik edib.

45-ci prezident Donald Tramp qalmaqallı çıxışları ilə yanaşı həyat yoldaşı Melania, gözəl sarışın qızları İvanka və Tiffani Trampların sosial şəbəkələrdə paylaşdığı fotolarla gündəmdə qalıb.

Onu da deyək ki, dünyanın varlı adamları ABŞ-da keçirilən prezident seçkisində milyarder Donald Trampın qələbə qazanması səbəbindən 41 milyard dollar itiriblər.

Məlumata görə, ən çox itirən Meksikanın varlı adamı Karlos Slim-Eludur. Onun var-dövləti 9,2 faiz, yaxud 5,1 milyard dollar azalıb.

Digər meksikalı 10 varlı adamın varidatına 6,5 milyard dollar ziyan dəyib. Həmçinin, Meksika varlıları sırasında 4-cü yerdə olan Yeva Qonda Rivera adlı iş adamı 487 milyon dollar itirib.

Xatırladaq ki, noyabrın 8-də ABŞ-da prezident seçkisi keçirilib. Respublikaçılar Partiyasının namizədi Donald Tramp rəqibi, Demokratlar Partiyasının namizədi Hillari Klintonu məğlub edib.

Azərbaycan Prezidentin İctimai-siyasi məsələlər üzrə köməkçisi Əli Həsənov Amerikada keçirilən seçkilərin nəticəsindən danışıb.

O bildirib ki, Amerika xalqı öz seçimini etdi: "Bu Amerika xalqının seçimidir və hörmət edirik. Azərbaycanın enerji, təhlükəsizlik sahəsində Amerika ilə əməkdaşlığı var. Azərbaycan qoşunları Amerika qoşunları ilə çiyin-çiyinə sülh yaratma prosesində iştirak edir. Ən böyük gözləntimiz Dağlıq Qarabağ münaqişəsinin həlli ilə bağlıdır. Düşünürük ki, Amerika ATƏT-in Minsk qrupunda mövqeyini bundan sonra daha da dinamikləşdirəcək".

Azərbaycandakı müxalifət siyasi partiyalarının Donald Trampın ABŞ prezidenti seçilməsi barədə münasibətlərini öyrənib.

Azərbaycan Xalq Cəbhəsi Partiyasının (AXCP) sədrinin müavini Gözəl Bayramova deyib ki, Trampın prezident seçilməsini Amerika xalqının iradəsi kimi dəyərləndirir.

“Çünki Amerikada demokratik cəmiyyət formalaşıb. Uzun müddət demokratik seçki ənənəsi var. Bu Amerika xalqının öz daxili işidir. Trampı prezident seçməklə isə bütün dünyaya demokratik seçki prosesini nümayiş etdirdilər”.

Müsavat Partiyasının Mərkəzi İcra Aparatının rəhbəri Gülağa Aslanlı bildirib ki, Trampın prezident seçilməsi Amerika xalqının seçimidir.

“Hesab edirəm ki, Amerika xalqı dəyişikliyə, yeniliyə istəyi olan xalqdır. Keçirilən seçkilərin, dürüstlüyünə və şəffaflığına heç bir şübhə yoxdur. Amerikalılar sübut etdi ki, hətta indiki prezidentin dəstəklədiyi, keçmiş prezidentin həyat yoldaşı, keçmiş dövlət katibi, kifayət qədər idarəçilik təcrübəsi olan xanımı belə prezident seçməyə bilir. Bu xalqın içində olan suverenliyini və müstəqilliyini bir daha təsdiq etdi”.

O qeyd edib ki, ABŞ-ın keçmiş prezidentlərinin Azərbaycanla bağlı siyasəti nə olubsa, Trampın da siyasəti o olacaq. “Amerikada prezident ölkəni qanunlarla idarə edir. Həmin qanunlar da Amerika xalqına xidmət edir.

Kənar məsələlər də isə bir prezidentin etdiyi digərindən cüzi fərqlənir. Mən ona görə də Azərbaycana qarşı, problemlərini həll etmək istiqamətində hər hansı bir addımın atılacağını düşünmədiyim kimi əleyhinə də hər hansı addımların atılacağı haqqında fikir deyə bilmərəm”.

Azərbaycan Milli İstiqlal Partiyasının (AMİP) Siyasi Şurasının üzvü Əli Orucovun sözlərinə görə, Trampın prezident seçilməsi demokratiyanın qələbəsidir. “Bu amerikalıların öz seçimidir”.

O deyib ki, Amerikanın müəyyən olunmuş stabil dövlət siyasəti var. “Prezidentin seçilməsindən asılı olmayaraq həmin kurs əsaslı şəkildə davam edir. Sadəcə olaraq taktiki gedişlərdə fərqlər ola bilər.

Azərbaycanla bağlı ABŞ-ın dövlət siyasəti və maraqları nəyi təmin edirsə, elə də davam edəcək. Hər halda biz Azərbaycanla bağlı yaxşı siyasətin yürüdüləcəyini güman edirik”.

Azərbaycan Demokratik Partiyasının (ADP) sədri Sərdar Cəlaloğlu ABŞ-da keçirilmiş prezident seçkisinin əvvəlki seçkilər kimi namizədlər arasında çox da böyük fərq ortaya qoymadığını qeyd edib.

“Tramp cüzi bir faizlə Klintona qalib gələ bildi. Bu da onu göstərir ki, Tramp seçki öncəsi verdiyi sözləri yerinə yetirə bilməz.

Çünki əhalinin böyük çoxluğunun səsini toplamayıb. ABŞ prezidentləri dövlətin maraqlarına tabedir. Ona görə də, seçkidən qabaq müəyyən vədlər verə bilərdi. İndi isə prezident kimi ABŞ-ı təmsil edir”.

Partiya sədri həmçinin bildirib ki, Trampın prezident seçilməsi dünyada müəyyən narahatçılığa səbəb olub.

“Xüsusən də Rusiya ilə əlaqələr məsələsi. Mən düşünürəm ki, Tramp ABŞ siyasətində çox da dəyişikliklər edə bilməz. ABŞ siyasətində cüzi meyllənmə kiçik ölkələrdə böyük faciələrə gətirib çıxara bilər.

Ona görə də prezidentlər dövlətin maraqlarına uyğun addımlar atırlar. Siyasi və hüquqi məsələlərdə Trampın çox ciddi müşavirləri olacaq.

Amerikanın ən güclü siyasətçilərini, hüquqşünaslarını komanda kimi toplayacaq. Bəlkə də Demokratlardan bir qrupu da özünə cəlb edəcək.

ABŞ prezidentləri başa düşürlər ki, onlar təkcə öz xalqlarına yox, dünyanın taleyinə də cavabdehdirlər. O mənada ki, dünya iqtisadiyyatının 70 faizi onun əlindədir. Dünya maliyyə sisteminə ABŞ nəzarət edir.

Hətta qlobal məsələlərdə də dolayı yolla ABŞ dünya ölkələrinə cavabdehdir. Bu cavabdehliyin qarşısında da çox ciddi məsuliyyət tələb olunur. ABŞ prezidentləri də bu məsuliyyəti çox yaxşı dərk edirlər”.

Rafiq Qara