İcra başçısı ilə “Azərsu” sədrinin müdhiş korrupsiyası

Vaqif Abdullayevlə Qorxmaz Hüseynov açılışı olan su-kanalizasiya sisteminin qurulmasında milyonlar mənimsəyib; faktlar “Gündəm-xəbər”də...

Rayon rəhbəri əhalini boğaza yığıb, Prezident Administrasiyasının qara siyahısına düşüb

Ölkə başçısı Beyləqana gəldiyi ərəfədə həkimlərə küçə süpürdən, səfər tarixində işıqları söndürən başçının dələduz qardaşı uşaqları haqda şok detallar

Beyləqanın icra başçısı hədəfə alınıb. Son günlər Vaqif Abdullayev barədə müxtəlif kompromat materiallar mediada tirajlanır. “Gündəm-xəbər”ə daxil olan məlumata görə, icra başçısı rayon camaatını boğaza yığıb. Onun əməlləri əhalini təngə gətirib.

Gənc namizəd gətirilir

Prezident Administrasiyasına saysız-hesabsız şikayətlər ünvanlanır. İcra başçısının yola salınması üçün bütün şərtlər yetişib. Vaqif Abdullayev sakinləri, iş adamlarını, fermerləri, kəndliləri, müəllim və həkimləri bezdirib.

Bu gedişlə növbəti İsmayıllı hadisələri Beyləqanda baş verə bilər. Hakimiyyət kluarlarında isə icra hakimlərinin siyahısı hazırlanır. Vaqif Abdullayevin də adının qara dəftərdə olduğu bildirilir.

Onun yerinə gənc bir namizəd gətirilməsi nəzərdə tutulur. Beyləqan son illərdə inkişafdan qalıb. Buna səbəb də məhz rayon rəhbərliyidir. Rayonda hər hansı iş görülməyib.

Prezidentin rayona son səfərində isə rayon rəhbərliyi və Azərsu sədri ağ yalanlar açıqlayıb. Beyləqan rayonda “Su Təchizatı və Kanalizasiya” sistemlərinin qurulması işlərində şok korrupsiya faktları var.

Müəyyən qrup tərəfindən ələ keçirilən layihədə milyonlar mənimsənilib. Maraqlı burasıdır ki, bu layihədə Qorxmaz Hüseynovu daha çox Azərbaycan və Almaniya birgə müəssisəsi ” T.T.Ş. Inşaat MMC & Ludwig Pfeiffer Hoch-und Tiefbau GmbH & Co.KG ” şirkətinin «fəaliyyəti» ilə «vururlar».

Keyfiyyətsiz iş və yeyiti

Çünki bu MMC-nin Beyləqanda su təchizatı və kanalizasiya sistemlərinin yenidən qurulması layihəsi çərçivəsində şəhər daxilində 77,6 kilometr su, 71 kilometr kanalizasiya şəbəkəsinin yaradılması, 3400 smart-kart tipli sayğacın quraşdırılması prosesində ayrılmış 50 milyon manata yaxın vəsaitə rəğmən, keyfiyyətsiz işlər görməsi iddia olunur.

Məsələn, həmin şirkət su və kanalzasiya xətlərinin çəkilişi zamanı istifadə olunan materialların keyfiyyətsizliyi, qum-çınqılın əvəzinə eroziya uğramış torpaqlardan istifadə edilməsi, beton tələb olunan sahələrdə bundan istifadə edilməməsi və sair faktlar daha çox qabardılaraq, burada iri məbləğdə yeyintiyə diqqət çəkilir.

Bu yeyintidə icra başçısının da xüsusi payı var. Bu baxımdan Prezident Administrasiyası rayon icra hakimiyyətləri ilə bağlı ilin yekunlarına hazırlaşır.

2016-cı ildəki fəaliyyəti qiymətləndirilən icra başçıları barədə qərarlar açıqlanacaq. 2016-cı il ərzində bəzi icra başçıları işini itirib, bəzisi töhmət alıb, kimisinə xəbərdarlıq olunub.

Əhali ilə işləmək qabiliyyəti olmayan rayon icra hakimiyyətlərinin rəhbərlərinin siyahısı tutulur. PA tərəfindən monitorinqlər aparılıb və araşdırmaların nəticəsi onların özlərinə elan olunacaq. 2” alan başçı

PA-nın bəzi rəsmiləri zaman-zaman qeyd ediblər ki, icra hakimlərinin fəaliyyətindəki qüsurlar qeydə alınır və ona uyğun addımlar atılır. Prezident də dəfələrlə icra başçılarına xəbərdarlıq edib ki, öz işini yarıtmayan məmurlar vəzifəsi ilə vidalaşacaq. Amma sistemdən irəli gələrək, o cümlədən tamahkarlıq ucbatından nəfsinə hakim ola bilməyən icra başçıları çoxdur. Mətbuatda onların nöqsanları hər gün işıqlandırılır. PA kuratorları onların fəaliyyətini təqib edir və ölçü götürülür. Amma 2016-cı il sınağından çıxmayan və imtahandan “2” alan icra başçıları oldu. Onlar yenə də iqtidarın siyasi kursuna uyğun olmayan hərəkətlərlə yadda qaldı. Düzdür, heç də hamısı kütləvi şəkildə işdən azad edilmir.

Amma Prezident İlham Əliyevin ən etimadı doğultmayan kadrı Beyləqanın icra başçısı Vaqif Abdullayev sayıla bilər. Çünki onun adı bütün ağılasığmaz işlərdə hallanıb. Beyləqanda ən kuryoz və analoqsuz hadisələr, rəzil addımlar məhz onun rəhbərliyi altında baş verib.

Kanalizasiya-tualet siyasəti

Mətbuatda gedən xəbərlərdə əvvəlcə, rayonun ərazilərini qarış-qarış satan V.Abdullayev bu azmış kimi, şəhərin kanalizasiya xəttinin üstünü peşkəş edib. Hazırda kanalizasiya xəttinin üstündə ticarət obyekti tikilir.

Ticarət obyektini Beyləqan ərazisində yerləşən N saylı hərbi hissənin kadrlar şöbəsinin rəisi Səfərov Yaşar tikdirdiyi və həmin ərazini ona Vaqif Abdullayev tərəfindən satıldığı bildirilir. Bu faktı üzə çıxması rayonda səs-küyə səbəb olub.

Kanalizasiya xəttinin üstünü satan icra başçısı sonra 90 minlik tualet tikdirməsi və təntənəli açılış mərasimi ilə diqqət mərkəzinə gəlir. Rəsmi xəbərdə deyilir ki, Beyləqan şəhər 1 və 4 nömrəli tam orta məktəblərdə yeni sanitar qovşağı tikilməklə, gigiyenik şərait yaxşılaşdırılıb. Azərbaycan tarixində ilk dəfə tualetin təmtaraqlı açılış mərasimi baş tutub. Sosial şəbəkədə yayılan fotolara görə, mərasim Beyləqan rayonunda baş tutub.

Belə ki, Beyləqan şəhər 1 və 4 nömrəli tam orta məktəblərdə yeni sanitar qovşaq – yəni tualet istifadəyə verilib. Açılış mərasimində orta məktəbin müəllim və şagird kollektivi və yerli icra akimiyyətinin nümayəndələri iştirak ediblər.

Qardaşı oğlanları dələduzluq edir

Yada salaq ki, Beyləqan rayon icra başçısı Vaqif Abdullayevin qardaşı oğlu Yunis Abdullayevin həbs olunması xəbəri yayıldı. Eyni zamanda, icra başçısının digər qardaşı oğlu Yalçın Abdulayev də dələduzluqda ittiham olundu.

Bu barədə mətbuata ilk olaraq vəkil Adəm Məmmədov açıqlama verdi. Onun sözlərinə görə, bu dələduzluq faktı əvvəlcədən planlı şəkildə qurulub: “Xəyyam Nazim oğlu Balayevin vasitəçiliy ilə Yalçın Abdullayev Əziz Əliyevin, Eyyub Huseynovun və Mahirə Süleymanovanın xeyli miqdarda pulunu mənimsəyib, əmlaklarını öz adına keçirib.

Belə ki, Xəyyam Balayev adlarını çəkdiyim şəxslərin dostu olub. O, bu işi Yalçın Abdullayevlə birlikdə hazırlayıblar. Xəyyam Balayev Eyyub Hüseynova deyib ki, mənim Sahib Əliyev adlı tanışım var, sən dörd evini onun adına girov qoy, etibarnamə ver, bunun müqabilində o, sənə 150 min pul verəcək. Sahib Əliyevə verilən etibarnamə ilə Eyyub Hüseynovun dörd evi 12 saylı notariusda Yalçın Abdullayevin atası Sabir Abdullayevin adına keçirilir”.

Vəkilin dediyinə görə, Beyləqan rayon icra başçısı Vaqif Abdullayevin digər qardaşının Yunis adlı oğlu da dələduzluq edib.

Pambıqçılıq, süpürgəçilik rüsvayçılığı

Bundan başqa, prezident İlham Əliyevin Beyləqan rayonuna səfəri gözlənilirdi. Bu barədə mətbuatda yayılan xəbərlərdə deyilirdi ki, səfərlə əlaqədar rayondakı bütün idarə və təşkilatların işçilərini bir həftədən çoxdur abadlıq işlərinə cəlb ediliblər.

Bu işdə ən böyük zərbə səhiyyə işçilərinə dəyib. Belə ki, Beyləqan Rayon İcra Hakimiyyətinin başcısı Vaqif Abdullayevin göstərişi ilə Beyləqan rayon Mərkəzi Xəstəxanasının işçiləri səfərbər olunub.

Tibb işçiləri aramsız olaraq küçələrin süpürülüb təmizlənməsinə, küçələrdə ağacların rənglənməsinə, küçə bardorlarının və küçələrdəki işıq dirəklərinin yuyulması və rənglənməsi kimi işlərə cəlb ediliblər. Bu faktı təsdiqləyən fotolar da yayılıb.

Beyləqanda tibb işçiləri daha əvvəl də pambıq yığımına cəlb olunmuşdu. Onu da eyək ki, ölkənin ən çox adı qalmaqallarda və mənimsəmə faktlarında hallanan icra başçılarından biri olan Vaqif Abdullayev barədə mediada yeni ittihamla üzləşib.

Belə ki, Beyləqan müəllimlərindən və tibb işçilərindən daxil olan məlumata əsasən Beyləqanın icra başçısı onların pambıq pulunu mənimsəyib və dədə malı kimi cibinə qoyub.

Bildirilir ki, Beyləqan şəhər məktəblərinin müəllimləri və Beyləqan Mərkəzi Xəstəxanasının tibb personalı məcburi şəkildə pambıq yığımına cəlb olunub.

Onlara bildirilib ki, yığdıqları pambığın pulunu 15 qəpikdən alacaqlar. Şikayət məktubunda göstərilir ki, ağır hava şəraitində min cür əziyyətlə Beyləqan şəhər məktəblərinin müəllimləri 8 ton, Beyləqan Mərkəzi Xəstəxanasının tibb personalı isə 3 ton pambıq yığaraq, (cəmi 11 ton), təhvil veriblər.

Bundan sonra isə müəllim və tibb işçiləri onlara yığdıqları pambığın pulunu istəsələr də, onlara deyilib ki, pambığın pulunu icra başçısı götürüb.

Qeyd edək ki, 11 ton pambığın 0,15 manatdan qiyməti 1650 manat edib. Yəni faktiki olaraq Vaqif Abdullayev müəllimlərin 1200 manatını, tibb işçilərinin isə 450 manatını ata malı kimi cibinə qoyub.

Prezident gələndə baş verənlər

Maraqlıdır ki, müəllim və tibb işçiləri pambıq yığarkən icra başçısı da yaxasına fartuk taxaraq pambıq yığarkən şəkil çəkdirib. Ölkə başçısı rayona səfər etdiyi tarixdə isə rayon rəhbərliyi daha bir biabırçılığa imza atıb.

Həmin gün evlərə verilən elektrik enerjisi bir neçə saat kəsilib. Bundan əlavə rayondakı mağazalar və yollar da bir neçə saat bağlı olub. Buna səbəb kimi prezidentin rayona səfəri

göstərilib. Bir neçə saat belə vəziyyətin olması sakinlərə müəyyən çətinliklər yaradıb. Belə ki, sakinlər ərzaq və digər məhsulları ala bilməməklə yanaşı yolların bağlı olması səbəbindən hərəkət də edə bilməyiblər. Bu özbaşınalığa isə rayon icra başçısı Vaqif Abdullayev təlimat verib. Onun qanunsuz əməlləri son həddə çatıb.

Üstəlik, sakinlərin icra hakimindən dövlət başçısına şikayətlərini çatdırmağa imkan verilməyib. Sakinlər işıqsız qalıb, mağazalar məcburi qaydada qıfıllanıb. Prezident xalqın yaşayışının yaxşılaşması üçün əlindən gələni edir. Dövlət başçısı heç vaxt səfər etdiyi rayonda işığın kəsilməsi və ya yolların bağlanması, dükanların qapadılmasını istəməyib. Ancaq məmurlar özfəaliyyət dərnəyi açaraq rayonda atmosferi dəyişirlər.

Rafiq Qara