İcra başçısının qol qoyduğu ən böyük maxinasiyalardan biri də, şəhərdəki Heydər Əliyev Parkında oğlu üçün "Ana və Uşaq" kafesini inşa etdirməsi olub

Mərkəzi Aran zonasında yerləşən Bərdə şəhəri, bu gün sanki görmədiyi fəlakətli anlarını yaşamaqdadır. Çünki, Azərbaycanın olduqca qədim şəhərlərindən biri olan Bərdədə bugünkü istibdad, indiki zülm bəlkə də heç orta əsrlərdə belə yaşanmayıb. Ölkəmizin olduqca strateji əhəmiyyət kəsb edən bir ərazisində yerləşən bu rayonda, hal-hazırda həyata keçirilən yarıtmaz idarəçilik, qədim tarixiliyi ilə seçilən bu şəhəri sanki uçrumun astanasına sürükləməkdədir. Məhz, bunu ona görə belə vurğulayırıq ki, yerli sakinlərin çoxu Bərdədə Vidadi İsayevin zülmündən xilas olmaq üçün fəryad edirlər, hətta ölkə rəhbəri cənab İlham Əliyevə müraciətlərini ünvanlamaq istəklərini ortaya qoymaqla, xilas olmalarını da istəyirlər. Yəni, bir sözlə sakinlər Bərdənin baş alıb gedən zülmdən xilas olacağı günü səbirsizliklə gözləyirlər.
Rayonda yaşanan problemlərin varlığı ilə bağlı media üzərindən apardığımız araşdırmalar zamanı, “Gündəm Xəbər” qəzeti olaraq bir çox faktlar da əldə edə bilmişik. Belə ki, apardığımız araşdırmalar zamanı o da bəlli oldu ki, icra başçısı vəzifəsini daşıyan Vidadi İsayevin bugünkü missiyası, yalnız çoxsaylı qanunsuzluqlara yol vermək, büdcə pullarını talan etmək və sahibi olduğu biznesində fəaliyyətini genişləndirməkdən ibarətdir. İcra başçısının atdığı addımlar içərisində daha çox narazılıq yaradan amil, məhz onun Tərtərdən Bərdəyə icra başçısı təyin olunduqdan sonra, imkanlı və özünə yaxın bildiyi şəxsləri ətrafına toplaması oldu. Bu da büdcə pullarını asanlıqla mənimsəmək üçün, ona lazımi imkanlar yaratdı. Belə bir səbəblər üzündəndir ki, bu gün
icra başçısı rayonda abadlıq və quruculuq işlərini həmin şəxslərin vasitəsilə həyata keçirir və büdcə pullarını da minbir yollarla mənimsəyirlər. Atılan addımlar zamanı büdcə pulları, icra başçısı başda olmaqla bir neçə vəzifə sahibi tələfindən mənimsənilir. Öncədən bu cür addımların atılmasını planlaşdıran Vidadi İsayev, hal-hazırda etibarlı komandasının vasitəsilə, yuxarıda sadaladıqlarımız bir çox mənimsəmələri həyata keçirməkdədir.
İcra başçısının qol qoyduğu ən böyük maxinasiyalardan biri də, şəhərdəki Heydər Əliyev Parkında oğlu üçün "Ana və Uşaq" kafesini inşa etdirməsi olub. Bu da xeyli vaxtdır ki, söz-söhbətə səbəb olmaqdadır. Çünki, həmin kafedə sakinlərə müxtəlif xidmətlər göstərilməklə bərabər, parka gəzməyə gələnlərin içəriyə pulla buraxılmaları, parkdakı oyuncaqlardan istifadə görə azyaşlı uşaqların yaxınlarından müəyyən ödənişlərin tələb olunması və s-də, daha çox müzakirə olunmaqdadır. Müzakirəyə ehtiyacı olan hal o olub ki, adı çəkilən kafenin tikintisi zamanı əksər məmurları sıxışdıran Vidadi İsayev, hansı vəzifə sahibi onun bu addımına qarşı çıxmaq istəyibsə, dərhal həmin şəxsi cəzalandıracağı ilə də hədələyib.
Rayondakı mənbəmiz onu da bildirir ki, icra başçısı Bərdədəki qaçqın şəhərciyində kürəkəni üçün ümumi sahəsi təqribən 100 kv.metr olan dükan tikdirib. Bu da onu söyləməyə əsas verir ki, icra başçısı yalnız özünə və özünəməxsus biznesinə xidmət etməkdədir. Baxmayaraq ki, qaçqın şəhərciyində bu tip obyektlərin inşa olunması qanunla qadağan olunur. Əldə etdiyimiz digər məlumatlara görə, Vidadi İsayevin tapşırığına əsasən rayondakı hər bir idarə və müəssisə rəhbəri, gündəlik 10 nəfər işçisini parkda işləməyə göndərməlidir.
Əldə etdiyimiz digər məlumatlarda o da bildirilir ki, icra başçısı qalsın bir yana, onun köməkçisi də əksər məmurların, hətta sakinlərin belə gününü qara edir. Ümumi vəziyyətin acınacaqlı durumda olduğunu bildirənlər onu da vurğulayırlar ki,
icra başçısının əməllərindən zinhara gələn bərdəlilər, hətta Bakıya yürüş etməyə də hazırlaşırlar.
Sakinlərin “Gündəm Xəbər”ə verdikləri digər məlumatlarda o da qeyd olunur ki, Vidadi İsayev rayonda əsaslı abadlıq və quruculuq işləri həyata keçirtdirmir. O, neçə-neçə şəxsləri aldadaraq rayonda xeyli işlər gördürsə də, son anda onlara çatası olan pulları ödəməyib. Baxmayaraq ki, büdcədən bu yöndə lazımınca vəsait ayrılır və təyinatı da ictimaiyyətə açıqlanır. Sakinlərin daha çox iradları ondan ibarət olur ki, icra başçısı şəhid ailələrinin, Qarabağ əlillərinin, müharibə veteranlarının, məcburi köçkünlərin problemləri ilə yaxından maraqlanmır, onların həlli istiqamətində lazımi addımlarını da atmır.
O, bərdəlilərin və Bərdədə məskunlaşan, daha çox isə imkansız məcburi köçkünlərin bir çox problemlərini nəinki həll etməyə, heç onları dinləməyə belə cəhd göstərmir. Yəni, icra başçısı bu gün nə bir kimsəni saya salır, nə də ki, kimisə vecinə alır.
Ümumiyyətlə, vəziyyətin bu cür davam etməsi onu söyləməyə əsas verir ki, Vidadi İsayev sanki Bərdəni özəlləşdirib. O, daşıdığı vəzifəsindən sui-istifadə etməklə, hələ ki, maddi maraqlarının təmin olunması yöndə addımlarını atmaqdadır.
Qarşı tərəfi də dinləyə bilərik. Araşdırmamız davam edəcək.

Akif
gundemxeber.az