“Azərsun” və “Veysəloğlu”dan xalqa qarşı soyğunçuluq

Ölkənin aparıcı iki yeyinti sənayesi qiymətləri kəllə-çarxa qaldırdı, böhrandan mənfəətlə çıxmağa başladı

Azərbaycanda dəhşətli bahalaşma gedir, əhalinin sosial həyatı ağırlaşır; hər ik şirkətin əvvəlki açıqlamaları özünü ifşa edir

Azərbaycanda dəhşətli vəziyyət yaranıb. Ölkənin hər yerində iqtisadi durum ağırlaşır. Paytaxtda və regionlarda insanların sosial həyatı çətinləşir.

“Beta” və “Champion”

“Gündəm-xəbər”in məlumatına görə, kommunal xərclərin artırılması, dərman bazarında qiymət artımı bütövlükdə bütün sahələrə təsir edib. Mağazalarda, marketlərdə, bazarlarda ərzaq məhsullarının qiyməti qalxır. Yeyinti məhsullarının qiyməti kəllə-çarxa qalxıb.

İki istehsalat müəssisəsi “keçi can hayında, qəssab piy axtarır” misalına uyğun olaraq öz siyasətini davam etdirir. Ölkənin aparıcı iki yeyinti sənayesi olan “Azərsun” holdinq və “Veysəloğlu” qiymətləri artırıb “qaz vurub, qazan doldurmağa” səy göstərir.

Belə ki, “Beta” və “Champion” çaylarının qiyməti bütün çeşidlər üzrə 8-10% həcmində bahalaşıb. Bu mallar “Azərsun”a aiddir.

Eləcə də “Veysəloğlu”nun satdığı mallarda artım qeydə alınıb. Gömrükdə idxal rüsumunun artımından dərhal sonra ilk bahalaşmaya gedən də “Azərsun” holdinq olmuşdu.

Hər halda ölkə başçısı süni qiymət artımının qarşısını almağa çağırış edirsə, “Azərsun” və “Veysəloğlu” buna əməl etməlidir. Dövlət başçısı qeyd edib ki, süni qiymət artımına gedənlər və inhisarçılıqla məşğul olanlar cəzalandırılacaq.

Xalqı soyanlar kimlərdir?

“Gündəm-xəbər”in verdiyi məlumata görə, ancaq “Veysəloğlu” şirkəti prezidentin göstərişlərinə qarşı gedərək yeni tariflər müəyyənləşdirir. “Veysəloğlu” şirkəti manatın devalvasiyasından sonra qiymətləri qaldırmadığını bildirmişdi.

Lakin indi ortaya çıxan mənzərə bir qədər fərqlidir. Şirkət nəinki qiymətləri qaldırmağa, hətta qanunlara zidd olaraq ölkənin qida bazarında inhisar yaratmaq üçün bir başa fəaliyyət göstərir.

“Azərsun Holdinq” isə yenə hamıdan qabağa düşdü. Ölkənin əsas qida istehsalçısı olan şirkət gömrük rüsumları qalxar-qalxmaz məhsullarını bahalaşdırmağa başladı. Artıq böhranın üçüncü dalğası yaşanır və şirkət tələm-tələsik zərər etməsin deyə əhalinin cibinə girir. Şirkət satış mərkəzlərinə öz məhsullarını yeni qiymətlə təqdim etməkdədir. Qiymət məhsuldan asıllı olaraq 5-20 qəpik artıb. Əsasən, un, kərə yağı, düyü, şəkər və süd məhsullarının qiymətində bahalaşma qeydə alınıb.

“Azərsun” holdinq hər dəfə xalqı soymağa, öz mənfəətlərini düşünüb əhalinin vəziyyətini ağırlaşdırmağa can atır. A.Gozal isə buna məcbur qaldıqlarını bəhanə edir. Halbuki, gömrükdə idxal rüsumları artıb və bunun yerli istehsala aidiyyatı yoxdur. Holdinq çay, yağ, şəkər, un və s. məmulatları xaricdən xammal şəklində almırsa, qiymət artımına niyə gedir? Burada məqsəd soyğunçuluq, böhrandan xeyirlə çıxmaq və prezidentin tapşırıqlarına qarşı gəlməkdir.

“Azərsun” və “Veysəloğlu”dan özünü ifşa

“Gündəm-xəbər”xatırladır ki, hələ ötən il şirkətin sözçüsü Afiq Səfərov bildimişdi ki, xalqın halına yanan tərəf varsa, o da bizik: “Biz başqaları kimi asan qazanc əldə etmək yolunu tutmamışıq. Məhsulu xaricdən hazır gətirib bazara çıxarmırıq. Biz Azərbaycan torpaqlarında əkib-becərməklə, müəssisələr quraraq vətəndaşları işlə təmin etmək yolunu tutmuşuq. Nəzərə alın ki, ölkədə istehsal etdiyimiz məhsulları xaricdən hazır alıb yalnız bir əməliyyat etməklə kifayət qədər gəlir əldə edə bilərik. Biz isə buna getmirik”. Göründüyü kimi, “Azərsun” rəsmisi öz açıqlaması ilə holdinqi ifşa edib. Məlum olur ki, xaricdən heç nə alınmır və yerli istehsalı bazara çıxarırlar. Bu halda hansı əsasla marketlərdə bahalaşmaya gedilir?



Veysəloğlu Şirkətlər Qrupuna gəlincə, hələ ilin əvvəlində - yanvarda məhsullarının qiymətlərinin artması ilə bağlı açıqlama vermişdilər.

Bildirilirdi ki, “Ulduz” şokolad fabrikinin məhsul istehsalında istifadə etdiyi xammal ehtiyatının böyük hissəsi idxal üzərindən həyata keçirilir və bu səbəbdən qiymət artımı yol veriləndir: “Manatın mövcud devalvasiyası və üzən məzənnə siyasətinə keçməsindən sonra şirkət özünün qiymət siyasətinə yenidən baxmaq məcburiyyətində qalıb.

Veysəloğlu MMC-nin əsas fəaliyyəti idxal üzərində qurulduğundan ABŞ dollarının məzənnəsinin kəskin artması, baş vermiş devalvasiya şirkət üçün də bir sıra çətinliklər yaradıb. Eyni zamanda xammal idxalında yaranmış qiymət artımı “Ulduz” Şokolad Fabrikinə də təsirsiz ötüşmədi.

Yerli istehsalda xammalı xarici ölkələrdən gətirilərək idxala bağlı olan müəssisələr vardır ki, Ulduz fabriki də belə müəssisələrdəndir. Bu gün fabrik özünün məhsul istehsalında istifadə etdiyi xammal ehtiyatının böyük hissəsini idxal üzərindən həyata keçirir.

Yaranmış vəziyyətlə bağlı Veysəloğlu şirkəti xaricdən idxal edilərək ölkəyə gətirilən mallara 30%-dək, Ulduz fabrikinin istehsal etdiyi məhsullara isə 20%-dək qiymət artımını yol verilən hesab edir.

Bu açıqlamadan artıq təxminən 1 il vaxt keçir və şirkət yenə də qiymət artımına getməli olub. Bildirilir ki, idxal rüsumunun artması, işıq və qazın pulunun qaldırılması şirkəti tarifləri dəyişməyə məhkum edib.

Prezidentə təxribat

Onu da xatırladaq ki, “Veysəloğlu” şirkəti mağazalara payladığı məhsulları satılmadıqda geri götürmür. Sahibkarlardan qabaqcadan pulu alınır və məhsul sırınır.

Satışında ciddi axsamaların müşahidə olunduğu şirkət üzləşdiyi problemin həlli istiqamətində maraqlı çıxış yolu tapıb. Artıq həmin qidaların nə qədər satılıb-satılmayacağı şirkəti maraqlandırmır və mağaza sahibi çətin durumda qalır.

“Azərsun”un qiymət artımı olan siyahısına baxanda görürəm ki, xaricdən gəlməyən malların qiyməti qalxıb. Azərbaycanda istehsal olunan malların qaldırılmasına ehtiyac yoxdur”

Bu sözləri Müasir Müsavat Partiyasının sədri Hafiz Hacıyev “Azərsun Holdinq”in qiymət artımına münasibət bildirərkən qeyd etmişdi.

Qeyd edək ki, xaricdən ölkəyə gətirilən bəzi ərzaq mallarının gömrük rüsumlarının qalxması xəbəri çıxar-çıxmaz, Azərbaycanda qida sahəsində monopolist şirkətlərdən biri olan "Azersun Holdinq" qiymətləri qaldırdı.

Halbuki, gömrük rüsumları qaldırılan ərzaq məhsulları arasında "Azersun Holdinq"in istehsal sahəsinə demək olar ki, aidiyyatı yoxdur.

Hafiz Hacıyev bildirib ki, prezidentin ətrafında olanlar çalışırlar ki, xalqın yaralı yerinə duz bassınlar. Elə “Azərsun Holdinq” kimi şirkətlər də xalqı yox, öz ciblərini düşünür:

“Mən 2-3 ay bundan öncə bildirmişdim ki, Azərbaycanda bəzi qüvvələr millətlə dövlət arasında narazılıq yaratmaq üçün müəyyən addımlar atırlar. “Azərsun”un qiymət artımı olan siyahısına baxanda görürəm ki, xaricdən gəlməyən malların qiyməti qalxıb.

Azərbaycanda istehsal olunan malların qaldırılmasına ehtiyac yoxdur. Məsələn, Masazır gölündə hazırda duz var. Ona görə də duzun qiymətini qaldırmağa ehtiyac yoxdur. Bu gün inhisarçı məmurlar ölkə prezidentinin nüfuzdan salınması yönündə çox ciddi addımlar atırlar”.

Son günlər mətbuatın gündəmini bankların dollar satışını dayandırması, növbəti devalvasiya olacağı xəbərləri tutub. Ekspertlərin fikrincə, manat dollar qarşısında növbəti dəfə dəyərdən düşərsə, ərzaq məhsullarının qiyməti qalxacaq.

Bahalaşma növbəti dəfə də qaçılmaz olacaq. Azərbaycanda kifayət qədər məhsul istehsal olunmadığından payıza, qışa ərzaq ehtiyatı yoxdur. Əslində istehsal olunan məhsulların bir hissəsi bazara çıxarılmalı, bir hissəsi ehtiyat saxlanmalı idi.

Xüsusən də ölkənin düşdüyü belə bir zamanda. Bütün bunların heç biri olmadı. Nəticədə manat dəyərdən düşərsə, idxaldan asılı bir dövlət kimi qiymət artımı da qaçılmaz olacaq.

Ölkə 90-lara qayıdır?

“Gündəm-xəbər”in xəbərinə görə, ərzaq məhsullarının bahalaşması restoranların, hotellərin işini çətinləşdirib. Onlar məcburi şəkildə qiymət artımına getməli olublar. AzTA nümayəndəsi Müzəffər Ağakərimov bahalaşmanın olacağını bildirib. M.Ağakərimov xüsusən də restoran xidmətlərində bahalaşma olacağını qeyd edib. Çünki əksər restoranlarda qaz sobalarından çox elektrik enerjisi ilə çalışan avadanlıqlardan istifadə olunur. Həmçinin sobalardan tutmuş kondisionerlərə qədər bütün elektrik cihazları üzrə qoyulmuş həddi keçdiyinə görə restoranların xərci çoxalacaq.

Vətəndaşların ailə səbətinə qəflətən böyük fərqlə zərər olunması əhalinin vəziyyətini ağırlaşdırır. Halbuki, prezident süni qiymət artımına getməməyi tapşırıb. Vətəndaşlar prezident İlham Əliyevdən kömək gözləyir. Böhranla bağlı tədbir görülməsə, islahatlar aparılmasa, monopolist qüvvələr cəzalandırılmasa, iş yerləri açılmasa ölkədə yoxsulluq artacaq. Ərzaq, sərnişindaşınma, dərman və ümumilikdə bütün sahələrdə dəhşətli bahalaşma gedir, ş yerləri bağlanır, maaşlar kəsilir, işsizlər ordusu yaranır, ölkə 90-cı illərin ən ağır yoxsul dövrünə qaytarılır. Cəmiyyət panika və ajiotaj içindədir.

Son günlər istehlak bazarında ətin qiymətinin bahalaşması ilə bağlı xəbərlər yayılır. Alıcılar onlara təklif edilən sümüklü və ya sümüksüz ətin qiymətində 1 manata yaxın bahalaşma olduğunu bildirirlər. Belə ki hazırda sümüklü mal əti 9 manat, sümüksüz isə 11 manata satılır. Bundan əlavə, şəkər, qənd, çay və digər gündəlik zəruri məhsulların qiyməti qaldırılıb. Eyni zamanda “Azərsun” holdinqə bağlı olan “Bazarstore” marketlər şəbəkəsi çörəyin qiymətini artırıb.

Ölkədə sürətlə yoxsullaşma gedir. Əhali heç vaxt olmadığı qədər çətin vəziyyətə düşüb. Artıq ət məhsullarının da bahalaşması ondan xəbər verir ki, yaxın günlərdə bütün məhsullarda artım olacaq.

Rafiq Qara

gundemxeber.az