Hələ bu azmış kimi, insanlıq hissini itirən polis əməkdaşları Valeh Mahmudovun bel nahiyəsindən “Mersedes” markalı şəxsi avtomobillərini də keçirirlər

Azərbaycandan kənar respublikalarda yaşayan azərbaycanlıların çox zaman təqiblərə, təzyiqlərə məruz qalmaları, onların minbir rəzalətlərə düçar olmaları haqda məlumatlar, zaman-zaman gündəmi zəbt edən mövzulardan birinə də çevrilib. Oxşar olaylardan biri də, Rusiya Federasiyasının Tümen vilayətinin Tümen şəhərində baş verib. Bu haqda məlumatları “Gündəm Xəbər”ə çatdıran şəxsin bildirdiyinə görə, 10 noyabr 2007-ci il tarixdə əslən Gəncə şəhərindən olan 1963-cü il təvəllüdlü Mahmudov Valeh Saleh oğlu, adı çəkilən şəhərin “Minbir gecə” restoranında ailəsi ilə birlikdə şam yeməyi yeyərkən, üç nəfər mülki geyimdə olan polis əməkdaşları ona yaxınlaşır və bilərəkdən də sataşmağa başlayırlar. Yerli polis əməkdaşlarının bu cür addımları, çox keçmir ki, tərəflər arasında əməlli-başlıca mübahisənin əmələ gəlməsinə də səbəb olur. Ani müddət ərzində baş verən mübahisədən sonra 1976-cı il təvəllüdlü Kipriyanova Sergey Valereyeviça, 1980-cı il təvəllüdlü Sıntılıskoqa Nikolay Vladimiroviça və 1979-cu il təvəllüdlü Reşetnikova Dmitriya İvanoviça Valeh Mahmudovu ailəsinin gözləri qarşısında onu yerə yıxaraq taxta parçaları ilə bərk döyməyə başlayırlar. Hələ bu azmış kimi, insanlıq hissini itirən polis əməkdaşları Valeh Mahmudovun bel nahiyəsindən “Mersedes” markalı şəxsi avtomobillərini də keçirirlər. Həmin an onun bel nahiyəsi və sol qolu sındırılır. Bədəninin müxtəlif nahiyələrindən isə, xüsusilə də baş nahiyəsindən ağır xəsarətlər alır.



Təsadüf nəticəsində hadisənin baş verdiyi ərazidən keçən post patrul xidmətinin əməkdaşları, hadisəni görüb onlara yaxınlaşarkən hər üç şəxs xidməti polis vəsiqələrini onlara təqdim edib, polis əməkdaşları olduqlarını bildirirlər. Elə ki, post patrul xidməti əməkdaşları ərazidən uzaqlaşırlar, həmin an Kipriyanova Sergey Valereyeviça, Sıntılıskoqa Nikolay Vladimiroviça və Reşetnikova Dmitriya İvanoviça Valeh Mahmudovu xidməti maşınlarına qoyaraq, işlədikləri polis idarəsinə aparırlar. Huşunu itirib koma vəziyyətində olan və vurduqları zərbələr nəticəsində bel nahiyəsi və sol qolu sındırılan Valeh Mahmudovu polis idarəsində də döyürlər. Ölümcül vəziyyətə düşən Valeh Mahmudovun vəziyyətinin ağırlaşdığını gördüklərindən, onlar təcili tibbi yardım çağırmağa məcbur olurlar. Ümumilikdə 18 gün ərzində xəstəxananın reanimasiya şöbəsində koma vəziyyətində qalan Valeh Mahmudov, xeyli müddət müalicə olunsa da, ümumi vəziyyəti yenə də ağır olaraq qalır.



Yerli polis əməkdaşlarının insanlığa sığmayan əməlləri ilə bağlı, ərazi üzrə hüquq-mühafizə orqanı əməkdaşlarına müraciət olunarkən, Valeh Mahmudovu ölümcül vəziyyətə salan polis əməkdaşlarından biri Özbəkistan Respublikasına qaçır. Digər iki nəfəri isə, edilmiş şikayətlə bağlı hüquq-mühafizə orqanı əməkdaşları tərəfindən salxlanılırlar. Hadisənin 2007-ci ildə baş verməsinə baxmayaraq, baş verən qanlı olayla bağlı məhkəmə prosesi 2010-cu ildə keçirilir. Özbəkistan Respublikasına qaçmış polis əməkdaşı istintaq dövründə ələ keçir və o, Tümen şəhərinə gətirilir. Keçirilən məhkəmə prosesləri zamanı, hər üç nəfər polis əməkdaşı 6 il müddətinə həbs olunurlar. Həbs qərarı elan olunduqdan sonra, cəzaya məhkum edilmiş polis əməkdaşları çıxarılmış qərarla bağlı apeliyasiya şikayəti verirlər və onlara tətbiq olunmuş maddəni də dəyişdirə bilirlər. Yəni, polis əməkdaşları tətbiq olunmuş ağır maddəni, digər yüngülləşdirici maddə ilə əvəz etdirməyə nail olurlar və azadlığa çıxırlar. Bu yolla keçirilən məhkəmə prosesində olduqca ədalətsiz və qərəzli məhkəmə hökmü elan olunur və Valeh Mahmudov günahkar da çıxarılır. Hətta, ona iki il müddətinə icbari cəza da verilir.
Tümen şəhər Apeliyasiya Məhkəməsinin çıxarmış olduğu ədalətsiz qərarla barışmayan Valeh Mahmudov, çox keçmir ki, apeliyasiya şikayəti verməli olur və onun apeliyasiya şikayəti əsasında hər üç polis əməkdaşına üç il müddətinə icbari cəza verilir. Polis əməkdaşlarına belə bir cəza verilsə də, zərər çəkən şəxs aldığı xəsarətlərə, eyni zamanda ona vurulmuş maddi və mənəvi ziyana görə, qarşı tərəfdən kompensasiya tələb edir. Çünki, o, aldığı bədən xəsarətlərinə görə əmək qabiliyyətini tamamilə itirir və əlil olur. Bu gün də o, kompensasiya tələbini yerinə yetirə bilməsə də, yenə də iddia tələbindən əl çəkmək fikrində deyil.
Baş verən qanlı olaylara diqqət yetirdikdə o da məlum olur ki, azərbaycanlılara qarşı törədilən və heç bir insanlığa sığmayan addımlar, təkcə Valeh Mahmudovla yekunlaşmır. Çünki bu günədək əldə etdiyimiz məlumatlara görə, RF-nın müxtəlif şəhərlərində neçə-neçə azərbaycanlı iş adamları güllələniblər, qarət olunublar, hətta minbir rəzalətə də düçar ediliblər. Sözsüz ki, belə bir addımlar ayrı-ayrı şəxslər tərəfindən xalqımıza və onun övladlarına olan nifrətdən, qərəzçilikdən atılan addımlar olsa da, eyni zamanda qonşu dövlətin hüuq-mühafizə orqanı əməkdaşlarının özbaşınalığı kimi də qiymətləndirilməlidir. Çünki, iş adamı olan Valeh Mahmudovun başına gətirilənlər, məhz bizi belə düşünməyə sövq edir.
Baş verən qanlı olaylarla bağlı yeni açıqlamalarımızı, çox yaxın vaxtlarda çoxsaylı oxucularımızın diqqətinə də çatdıracağıq. Odur ki, bizi izləyin.

Mirzə

gundemxeber.az