Rəhbər şəxs üçün belə bir idarəçiliyin tətbiqi uğurlu variant hesab olunsa da, onun əmələ gətirdiyi uğursuzluqlarda, daha çox olur
Hələ bir neçə il bundan əvvəl, Validə xanım Hüseynovanın Tovuz rayon təhsil şöbəsinə müdir təyin olunması, dövrü mətbuatda daha çox müzakirə olunan məsələlərdən birinə də çevrilmişdi. Düzdür, onun təyinatından əvvəl şöbə müdiri vəzifəsini daşıyan Şamil müəllimin
fəaliyyəti, heç də qənaətbəxş hesab olunmurdu. Amma, onun təyinatının ilk günlərindən tam əksəriyyət belə bir düşüncəyə sahib idilər ki, Validə xanım məktəb direktorluğundan təhsil şöbəsinin müdirliyinə yüksələ bildi, deməli Tovuz təhsilində yeni bir canlanma baş verəcək, bir çox problemlər həllini də tapacaq. Amma, zaman keçdikcə hər kəsə o da bəlli oldu ki, nəzər və diqqəti belə bir düşüncəyə kökləmək, boş-boş xülyalardan başqa bir şey deyil. Çünki onun təyinatından ötən müddət ərzində, Tovuz təhsilinə elə bir divan tutulub ki, gəl görəsən!. Belə bir səbəblər üzündən də, bu gün tam əksəriyyət Validə xanımı təhsilimizin qənimi hesab etməkdən belə çəkinmirlər. Ona qarşı belə bir yanaşma niyə əmələ gəlir məsələsinə aydınlıq gətirmək, yaxud da lazımi məlumatları əldə etmək üçün, heç də vaxt itirməyə dəyməz. Sadəcə olaraq, rayonun bir neçə təhsil ocaqlarına baş çəkmək kifayət edər ki, nədən Validə xanım Hüseynovanı təhsilimizin qənimi hesab edirlər yanaşmasına aydınlıq gətirə bilək. Çünki, “Gündəm Xəbər”ə daxil olan məlumatlara görə o, müdir təyinatının icraasına başladığı vaxtdan, Tovuz təhsilinə elə bir zərbələr vurub ki, həmin zərbələrin izlərini hələ uzun müddət silmək mümkün olmayacaq. Məsələn, adicə bir məqama diqqət yetirək və yaşanan ab-havanın varlığına münasibət də bildirməyə çalışaq. Validə xanım müdir təyin olunduqdan sonra, rəhbərlik etdiyi qurumun bütün strukturlarında nəzarəti bir əldə cəmləşdirdi. Əslinə baxsan bu cür idarəçiliyin tətbiqi rəhbər şəxs üçün uğurlu variant hesab olunsa da, amma onu da unutmaq olmaz ki, tətbiq olunan idarəçilik saysız-hesabsız problemlərə də yollar açır. Məsələn, belə olan halda Validə xanım digər vəzifə sahiblərinin həll edəcəyi məsələlərə müdaxilə edib, vəzifə səlahiyyətini də aşıb-daşır. Bu cür idarəçilik digər vəzifə sahiblərinin həm də hansısa maxinasiyalara qol qoymalarının qarşısını alır, amma son anda nəticə o olur ki, əldə olunan gəlirlər bir əldə cəmləşir və Validə xanımın özünə çatdırılır. Məsələn, hələ bir müddət bundan əvvəl rayonun Qovlar qəsəbə sakini (müəyyən səbəblər üzündən hələlik həmin şəxsin adını çəkmirik) “Gündəm Xəbər”in əməkdaşına bildirir ki, “mən gəlnimi rayonun təhsil ocaqlarından birinə müəllimə düzəltdirmək istəyirdim. Bu məqsədlə bir neçə dəfə təhsil şöbəsi müdirinin yanında oldum. Son dəfə o, mənə bildirdi ki, “get sənə dediyim 5-i gətir gəl, həll edim. Sən bilmirsən ki, həmin 5-in hamısı mənlik deyil” dedikdə, sanki təşvişə düşdüm” deyir. Bəli, belə bir addımların atılması, yaxud da hansısa valideynin qarşısında bu cür şərtlərin qoyulması, onu söyləməyə əsas verir ki, həqiqətən də Tovuz rayon Təhsil Şöbəsində idarəçilik bir əldə cəmləşib.
Validə xanımın müdir təyinatından sonra, təhsil şöbəsinə giriş-çıxışın da müəyyən mənada məhdudlaşdırılması, bu gün daha çox müzakirə olunan problemlərdəndir. Məsələn, bir anlığa onu da qeyd edək ki, Tovuz rayonunda da çoxsaylı dövlət qurumları var ki, həmin qurumlara kimlərinsə girib-çıxmaları, hansısa problemlərin əmələ gəlməsinə belə səbəb olmur. Amma, Tovuz rayon Təhsil Şöbəsinə məxsus binanın giriş qapısına “əzəmətli zabor” çəkdirilməsi, etibarlı mühafizəçilərin varlığı və onlara xüsusi tapşırıqların verilməsi, əslində ciddi müzakirəyə səbəb olan problemlərdəndir. Belə olan halda hər kəsin nəzər-diqqətində, təhsil şöbəsinin sanki qapalı müəssisələrdən biri olması düşüncəsi də formalaşır. Təəccüb doğuran hal odur ki, mövcud qanunvericiliyimizdə göstərilmədiyi halda, bəs səbəb nədir ki, Tovuz rayon Təhsil Şöbəsinə girib-çıxmaq belə bir formada məhdudlaşdırılıb. Yəni, həmin şöbədə hansısa şəxsə nəsə deyəcəksənsə, mütləq rəhbərlikdən, yaxud da mühafizəçilərdən xüsusi icazə alınmalıdır?. Axı, qanunvericiliyin tələbinə görə təhsil şöbələri açıq müəssisələrdən biri hesab olunur və belə bir səbəblər üzündən də, ora daxil olmaq, yaxud da çıxmaq üçün, bir kimsədən xüsusi icazə almaq da tələb olunmur. Belə olan halda ortaya çoxsaylı suallar çıxır ki, qonşu Gəncə şəhərində, Şəmkirdə, Gədəbəydə, Göygöldə, Ağstafada, Qazaxda və digər şəhər və rayon təhsil şöbələrində hər hansı mühafizəçidən, rəhbərlikdən xüsusi icazə almaq tələb olunmadığı halda, səbəb nədir ki, Tovuz rayon Təhsil Şöbəsinin giriş qapısında belə bir “senzura”, belə bir ab-havanın varlığı hökm sürməkdədir.
Onu da qeyd edək ki, Validə xanımın belə bir idarəçiliyi tətbiq etməkdə məqsədi, heç də onun Tovuz təhsilinin qayğısına qalmaq deyil, sadəcə olaraq qol qoyduğu qanunsuzluq əməllərinin ört-basdır edilməsi yönündə, vaxtında atdığı qabaqlayıcı addımıdır. Çünki, “Gündəm Xəbər”i məlumatlandıran mənbə bildirir ki, onun vaxtilə Milli Məclisə gedən yolu bağlandığından, bu gün o, heyfini təhsil şöbəsində “bazar” açmaqla çıxır. O, hansı addımını atırsa, atdığı addımının nə ilə nəticələnəcəyini də əvvəlcədən yaxşı dərk edir, sadəcə olaraq qol qoyduğu qanunsuzluqların KİV nümayəndələri tərəfindən ictimailəşməməsi üçün, “dəridən-qabıqdan çıxmağa”da hazır olur.
Əldə etdiyimiz başqa bir məlumatlara görə, Validə xanım hələ bir müddət bundan əvvəl tabeçiliyində olan şəxslərə, təhsil şöbəsinə KİV nümayəndələrinin daxil olmalarının mümkün qədər qarşısını almaq tapşırığını da verib. Odur ki, o, həm də özünün vaxtında verdiyi tapşırıqla “əzəmətli zabor” və etibarlı mühafizəçi problemini gündəmə gətirib və həllinə də nail ola bilib. Belə bir səbəblər üzündəndir ki, bu gün hansısa media təmsilçisi Tovuzun təhsil ocaqlarında yaşanan problemlərlə bağlı rəhbərliklə, yaxud da səlahiyyətli şəxslərlə əlaqə saxlayıb, onlardan problemlərin varlığına münasibətlərini öyrənə bilmirlər. Çünki, “əzəmətli zabor”, etibarlı mühafizəçi poroblemi, media nümayəndələrinin təhsil şöbələrinə daxil olmalarının qarşısını alır.
Məlumatlı mənbə onu da bildirir ki, “rəhbərlik KİV nümayəndələrindən olduqca ehtiyat edir və belə bir səbəblər üzündən də, o, istər təhsil şöbəsinin giriş qapısındakı mühafizəçilərinə, istərsə də tabeçiliyində olan vəzifə sahiblərinə, hər zaman media nümayəndələrinə qarşı həssas olmaq tapşırığını verib” deyir.
Ümumiyyətlə, biz də bir mətbu orqan olaraq istənilən sahədə yaşanan anarxiyanın, özbaşınalığın əleyhinəyik. Odur ki, Tovuz rayon Təhsil Şöbəsində də, oxşar vəziyyətin əmələ gəlməsini istəməzdik. Rəhbərliyin düzüb qoşduğu “əzəmətli zabor”, etibarlı mühafizəçi porobleminin varlığına da, heç bir halda haqq qazandıra bilmirik. Çünki, atılan addımlar KİV nümayəndələrini (nəzərdə KİV nümayəndələrini nəzərdə tuturuq) təhsil şöbəsinin rəhbərliyindən tamamilə təcrid edir. Bu cür hallar da, yaşanan problemlərin media təmsilçiləri tərəfindən bitərəfli qaydada işıqlandırmaları ilə nəticələnir.
“Gündəm Xəbər”ə daxil olan başqa bir məlumata görə, təqribən bir neçə gün bundan əvvəl, aparıcı xəbər portallarından birinin əməkdaşı təhsil şöbəsinə daxil olmaq istəsə də, mühafizəçi onun içəri daxil olmasına imkan vermir. Belə olan halda tərəflər arasında əməlli-başlıca mübahisə başlayır və vəziyyət o həddə qədər gəlib çatır ki, hətta mühafizəçi onun üstünə “lom” da çəkir.
Araşdırmalarımız davam edəcək. Qarşı tərəfin də mövqeyini dinləyə bilərik.

Mirzə