General fikirləşmədən səhv etdiyini bildirdi

Akif Çovdarov: “100 min manat pul almağım özümə qarşı böhtan və yalan hesab edirəm”

Sabunçu rayon Məhkəməsinin inzibati binasıda ləğv edilmiş Milli Təhlükəsizlik Nazirliyi (MTN) Energetika və Nəqliyyat Sahələrində Təhlükəsizlik Baş İdarəsinin sabiq rəisi, general-mayor Akif Çovdarov, MTN-in Energetika və Nəqliyyat Sahələrində Təhlükəsizlik Baş İdarəsinin sabiq işçisi, polkovnik Səlim Məmmədov, MTN-in sabiq idarə rəisi, mayor Akif Əliyev və keçmiş şöbə rəisi Orxan Osmanovun cinayət işi üzrə məhkəmə prosesi davam edir. Proses Bakı Hərbi Məhkəməsinin hakimi Həbib Həsənovun sədrliyi ilə keçirilir.

“Karvansaray-2010” məhdud məsuliyyətli cəmiyyətinin həmtəsisçisi Nizami Quliyevin külli miqdarda pul vəsaiti və əmlakının ələ keçirilməsi epizodu üzrə ifadə verən Akif Çovdarov bildirib ki, təxminən 3-4 il bundan qabaq “Karvansaray 2010” MMC ilə Cahangir Alışovun rəhbər olduğu tikinti şirkəti arasında “Karvansaray” ticarət mərkəzinin tikintisində görülmüş işlərin dəyərinin hesablanmasındakı fikir ayrılığının həll olunması məqsədilə Cahangir Alışov və Nizami Quliyevin Milli Təhlükəsizlik Nazirliyinə xidməti otağına dəvət edib: “Bu məsələ ilə bağlı bildirirəm ki, Cahangir Alışovun rəhbər olduğu tikinti şirkəti “Karvansaray 2010” MMC üçün tikinti işləri aparıb. Bununla bağlı “Karvansaray 2010” MMC həmin tikinti işləri ilə bağlı Cahangir Alışova pul borclu idi və ödəniş etmirdi. Cahangir

Alışov da bizə şikayət etmişdi. Ona görə ilk olaraq Cahangir Alışovu MTN-ə dəvət edərək dinlədim. Daha sonra Nizami Quliyev nazirliyə tərəfimdən çağırıldı. Orada Nizami Quliyev həqiqətən də Cahangir Alışova borclu olduğunu etiraf etdi, sadəcə olaraq aralarında məbləğlə bağlı anlaşılmazlıq olub. Bununla bağlı hətta Cahangir Alışov səhv etmirəmsə “Karvansaray 2010” MMC üçün gördüyü işlərlə bağlı smeta da təqdim etdi. Sonradan isə rəsmi və ya qeyri-rəsmi olduğunu xatırlamasam da, bildim ki, tikinti işləri üçün çəkilən xərcə görə yoxlama təyin olunub. Həmin şəxslərin özləri audit təyin etdi. Sonradan isə yoxlamanın nəticəsinə görə məlum oldu ki, Cahangir Alışovun göstərdiyi məbləğ daha düzgündür. Yəni Nizami Quliyev həqiqətən Cahangir Alışova borclu idi. Yoxlamada kimlərin iştirak etdiyini xatırlamıram”.

“Nizami Quliyevə hədə-qorxu gəlməmişəm”

Akif Çovdarov bildirib ki, idarə rəisi Milli Təhlükəsizlik Nazirliyinin sabiq əməkdaşı Səlim Məmmədova da bu işin nəticəsi barədə ona məlumat verməsinə dair göstəriş verib: “Cahangir Alışovun “Mən Alışov Cahangir Həsənağa oğlu, Karvansaray 2010 MMC-dən qalan tikinti ilə əlaqədar borcu 2050 kvadrat metr mövcud ticarət mərkəzindən dükan və obyektlə aldım, Quliyev Nizami Rüstəm oğluna qarşı heç bir iddiam yoxdur” məzmunlu 23 yanvar 2012-ci il tarixdə yazdığı qəbzin olub-olmamasını bilmirəm. Ancaq hesab edirəm ki, belə bir qəbz ola bilər. Çünki problem həll olunmuşdu və Nizami Quliyev Cahangir Alışova olan borcunu obyekt şəklində ödəmişdi. Həmçinin Cahangir Alışov da, bundan sonra onlara şikayət etməyi dayandırmışdı”.

Akif Çovdarovun sözlərinə görə, 10 yanvar 1954-cü il təvəllüdlü Naxçıvan MR-da anadan olmuş Bilurə İmranovanın şəxsiyyəti və onun “Karvansaray 2010” MMC-nin pay sahibi olması barədə məlumatı yoxdur: “Nizami Quliyevə hədə-qorxu gəlməmişəm, onunla Cahangir arasında olan pul borcu məsələsinə görə problemi aydınlaşdırmaq məqsədilə yanıma çağırmışam”.

“Nizami Quliyevdən 1 milyon manat tələb etməyim yalandır”

MTN generalı qeyd edib ki, Nadir Quliyev və Bilurə İmranova adında şəxsləri tanımır: “Billurə İmranovanı tanımasam da, bildirirəm ki, özünün Natiq Hümbətov adlı qohumu bu məsələlərdən sonra həmin “Karvansaray 2010” MMC-yə məxsus ticarət yerini işlətməyə başlayı. Nizami Quliyevdən həbs etdirəcəyim hədə-qorxusu ilə 1.000.000 manat pul tələb etməyim, Nizami Quliyevin həmin pulu vermək iqtidarında olmadığını bildirdikdə ilkin olaraq 100.000 manat verməsini tələb etməsi, qalan pulu isə sonradan verməyini bildirməsi ilə bağlı göstərilənlər tamamilə yalandır. Nizami Quliyevin Cahangir Alışova olan borcunu ödəyə bilmədiyi halda ondan hansısa məbləğdə pul tələb edərək almağım inandırıcı deyil və tamamilə yalandır. Səlim Məmmədovun vasitəsilə Nizami Quliyevdən dostu Asif Cahangirovun vasitəsilə 35.000, 45.000 və 20.000 manat olmaqla ümumilikdə 100.000 manat pul almağım özümə qarşı böhtan və yalan hesab edirəm”.

“80 min alınması həqiqətə uyğun deyil”

Sahibkar Elçin Hacıyevdən külli miqdarda pulun tələb olunaraq alınması epizodu ilə bağlı Akif Çovdarov yenə də istintaqı

həqiqətdən yayındırmaq istəyib. O, bu məqsədlə bildirib ki, Elçin Hacıyevi və Tofiq Rəcəbovu şəxsən tanımasa da, 6-cı Baş İdarədə qiymətli daşların və əntiq əşyaların qaçaqmalçılığı ilə məşğul olan şəxslər barədə siqnal işi açılıb, həmin məlumat əsasında keçirilmiş tədbirlə əlaqədar Elçin Hacıyev və Tofiq Rəcəbov idarənin əməkdaşları tərəfindən MTN-ə gətirilib: “Onların hansı birininsə üzərində 1 və ya 2 karatlıq brilyant qaş olub, onlar həmin qaşı təxminən 200.000 ABŞ dollarına satmaq istəyərkən saxlanılıblar. Araşdırma ilə müəyyən edilib ki, həmin brilyant qaş qaçaqmal və hər hansı bir əntiq əşya deyil, bu səbəbdən də həmin qaş onların özlərinə qaytarılmaqla sərbəst buraxılıblar. Akif Əliyevin özünü Rəşad kimi təqdim edərək Elçin Hacıyevdən 150.000 ABŞ dolları tələb etməsi və həmin gün ondan 80.000 ABŞ dolları alınması həqiqətə uyğun deyil. Elçin Hacıyev ətrafında əməliyyat tədbirinin keçirilməsinin ümumilikdə rəhbərlik etdiyim baş idarənin 3-cü idarəsinin səlahiyyətlərinə aid olmaması ilə razıyam və səhv olaraq, bilmədən, fikirləşmədən həmin tədbirin 3-cü idarə tərəfindən keçirilməsinə dair həmin idarənin rəhbərliyinə tapşırıq vermişəm”.

Akif Çovdarov ifadəsində “Süleyman Transport” məhdud məsuliyyətli cəmiyyətinin sədri Fikrət İbrahimovun külli miqdarda pul vəsaitinin ələ keçirilməsi epizodu üzrə Fikrət İbrahimovu tanımadığını və onun nazirliyə gətirilməsindən heç bir məlumatının olmadığını göstərib.

Əməliyyat-axtarış fəaliyyəti haqqında qanunvericiliyin tələblərini pozaraq müvafiq qərar və qanuni əsaslar olmadan ayrı-ayrı şəxslərin telefon danışıqlarının dinlənilməsi epizodu üzrə ifadə

verməkdən yayınan general qeyd edib ki, telefon danışıqlarına qanunsuz qulaq asılmış sahibkarlıq fəaliyyəti ilə məşğul olan Aqil Cəfərov, İlqar Budaqov, Elşad Abdullayev, Vüqar Əliyev, Emil İbrahimov, Ramin Babayev, Qurban Əzizov, Şövqü Əhmədov, Elşən Tağıyev ad-soyadlı şəxsləri xatırlamır: “Ola bilsin ki, Elşad Abdullayevin Azərbaycan Respublikası ərazisinə dövlət qeydiyyatından keçməyən dərman vasitələrinin gətirilməsi və şatışı ilə məşğul olması ilə bağlı idarədə məlumat olub. Ona görə də həmin yoxlama işinin icraçısı qeyd olunan tapşırığı verilib və bununla bağlı müvafiq tədbilərin görülməsi üçün sənədlərə imza etmişəm. Vüqar Əliyevi tanımıram. Ola bilsin ki, Vüqar Əliyevin bioloji aktiv əlavələrin satışı ilə məşğul olan firmaya rəhbərlik edərək firmaya məxsus sexdə dərman vasitələrinin və tibbi ləvazimatların hazırlanması ilə məşğul olması ilə bağlı idarədə məlumat olub. Ona görə də, həmin yoxlama işinin icraçısı qeyd olunan tapşırığı verərək imzalatmışam. Rəhbərlik etdiyim baş idarədə Azər Əliyev ad-soyadlı əməkdaş 1-ci idarədə şöbə rəisi vəzifəsində işləyib və 2015-ci ilin ortalarında ailə məişət zəminində yaranmış səbəblərdən özünü yaşadığı hündürmərtəbəli binanın mənzilindən ataraq intihar edib. Ondan başqa idarədə Azər adlı başqa əməkdaş olmayıbdır. Azər Əliyevin İlqar Budaqovun ofisində axtarış aparmasından, ondan hər hansı məbləğdə pul tələb etməsindən məlumatım olmayıb. İlqar Budaqov adında hər hansı bir şəxs tanımıram”.

"Gündəm Xəbər"