Deməli canını, qanını Vətən yolunda, bölünməz torpaqlarımız uğrunda fəda edən Qarabağ qazisinin həyatı, icra başçısı üçün o qədər də önəm daşımayıb
Ölkəmizin Mərkəzi Aran zonasında yerləşən Bərdənin bu gün elə bir dərdi var ki, hal-hazırda həmin dərdi çəkib qurtarmaq heç cür mümkün deyil. Buna səbəb, 2011-ci ildə rayona icra başçısı təyin olunan Vidadi İsayevin, rayonda gestapo idarəçilik yaratması və daha çox yaxın qohum-əqrəbasının qayğısına qalmasıdır. “Gündəm Xəbər”ə daxil olan məlumatlara görə, hələ bir müddət bundan əvvəl icra başçısı rayonda ümumi sahəsi təqribən 35-36 hektar olan Heydər Əliyev Parkı inşa etdirmiş və bununla bağlı büdcədən milyonlarla vəsait ayrılsa da, o, həmin vaxtlarda elə bir təbliğat apartdırır ki, guya görülmüş işləri şəxsi vəsaiti hesabına həyata keçirib. Əldə etdiyimiz başqa bir məlumatlara görə, adı çəkilən park inşa etdirilən zaman Vidadi İsayev rayondakı hər bir vəzifə sahibini əməlli-başlıca “yükləyir”. Vəzifəsini itirməsindən ehtiyat edən vəzifə sahibləri isə, çıxılmaz vəziyyətə düşdüklərindən kredit götürürlər, hətta yaxın çevrələrindən borc da alırlar. Xoşagəlməz hal o olur ki, Heydər Parkı inşa olunduqdan sonra icra başçısı həmin parkda oğlu üçün ümumi dəyəri təqribən 90-100 min manat olan "Ana və Uşaq" kafesini inşa etdirir. Kafenin inşaasını başa çatdıran icra başçısı, həmin vaxt oğlu ilə bərabər, kürəkənini də unutmur. Yəni, o, rayonun mərkəzi ərazilərindən birində yerləşən və xeyli müddət bundan əvvəl məcburu köçkünlər üçün tikilib istifadəyə verilmiş şəhərcikdə, kürəkəni üçün böyük bir mağaza tikdirir. Yəqin ki, əksəriyyət hələ də unutmayıb ki, xeyli müddət bundan əvvəl ciddi ehtiyaclar içərisində yaşayan və icra başçısına kömək əlini uzadan və ondan heç bir köməklik əldə edə bilməyən Qarabağ qazisi, son anda özünü yandırmaqla həyatına qəsd etmişdi. O halda sual oluna bilər ki, Vidadi İsayev bir qazinin qismən ehtiyacını ödəmədiyi halda, bəs səbəb nə oldu ki, oğlu üçün 90-100 min manat dəyərində, kürəkəni üçün isə, bir neçə on min manat dəyərində obyekti inşa etdirə bildi. Deməli canını, qanını Vətən yolunda, bölünməz torpaqlarımız uğrunda fəda edən Qarabağ qazisinin həyatı, icra başçısı üçün o qədər də önəm daşımayıb.
Bəli, bu gün də icra başçısını Bərdə sakinlərinin taleyi heç cür düşündürmür. O, sanki əhalini pis günə salmağı, rayonda çoxsaylı problemlər əmələ gətirməyi, sakinləri dövlət-hakimiyyət orqanları ilə üz-üzə qoymağı və s. bilərəkdən qarşısına məqsəd qoyub. Vidadi İsayevin Bərdə üçün yaratdığı ən böyük problemlərdən biri də, yerli vəzifə sahiblərini müxtəlif bəhanələrlə daşıdıqları vəzifələrindən uzaqlaşdırması olub.

O, icra başçısı təyinatından bir qədər sonra, Tərtərdən və digər rayonlardan gətirdiyi bir neçə nəfər şəxsi müxtəlif vəzifələrə təyin edir. Məsələn, icra hakimiyyətində sənədlərlə iş şöbəsinin müdiri vəzifəsinə İsgəndər İsmayılovu, mənzil istismar kontoruna müdir Rauf Pənahovu, Zaur Bəylərovu özünə köməkçi, köməkçisinin qayınatasını komendanta nəzarətçi, qayınanasını özünə yemək bişirən, qaynı Çingiz Bünyatovu özünə sürücü, Yevlaxdan gətirdiyi Əli Fərzəliyevi şəhər təsərrüfatı üzrə nümayəndə, Nazim Şirinovu telekommunikasiya qovşağına müdir, Salyan rayonundan gətirdiyi bacısı oğlu Natiq Səfərovu hüquq şöbəsinə məsləhətçi və s. təyin edir. Ümumiyyətlə, bu siyahını bir neçə dəfə artırmaq olar. Faciəli hal oldur ki, Vidadi İsayevin ayrı-ayrı rayonlardan gətirdiyi və vəzifə sahibi etdiyi şəxslərin əksəriyyətinin istər savadının, istərsə də idarəçilik qabiliyyətinin yetərincə olmadığı da bildirilir. Yəni, belə bir fikri rayon sakinlərinin danışdıqları və bəzi media qurumlarında işıq üzü görən açıqlamalar əsasında səsləndiririk.
İcra başçısının yerli sakinlərə etdiyi zülmlərdən ən dəhşətlisi, onların vaxtilə tikdirdikləri obyektləri altüst etdirməsi olur. Həmin obyektlər viran edildikdən sonra, obyektlərin yerləşdikləri əraziləri icra başçısı kənar şəxslərə baha qiymətə satır və külli miqdarda qazanc əldə etməyi də bacarır.
Onun rayon ərazisindəki bələdiyyə torpaqlarını qanunsuz yollarla qohumlarının, dost-tanışlarının, bir sözlə ona bu və ya digər yollarla bağlı olan şəxslərin adlarına sənədləşdirməsi də, icra başçısının qol qoyduğu ən böyük qanunsuzluqlardandır. Bələdiyyələrə ayrılan dotasiyaların ələ keçirilməsi və müxtəlif adlar altında mənimsənilməsi isə, başqa bir söhbətin mövzusudur. O, 2011-ci ilin martında Bərdə rayon İcra Hakimiyyətinə başçı təyin olunan zaman sakinlər qarşısında elə danışır, elə yağlı vədlər verir ki, hər kəs onu sanki əsl Əliyevçi kimi də qəbul edirlər. Amma, vaxt keçdikcə əsl həqiqətlər üzə çıxır və hər kəs də, Vidadi İsayevə qarşı yanaşmasını ortaya qoyur.
Ümumiyyətlə, bu gün Bərdənin dərdi uzun, yaraları isə sağalmazdır. Artıq uzun illərdir ki, əksər rayon sakinləri icra başçısının zülmündən fəryad edirlər, rayonun qədim tarixə malik abidələrinə qənim kəsilən gestapo idarəçilikdən xilas olacaqları günü, səbrsizliklə də gözləyirlər. Qarşı tərəfin də mövqeyini dinləyə bilərik. Araşdırmamız davam edəcək.
Akif

gundemxeber.az