Deyəsən yerli vəzifə sahiblərinin iştahaları bugünkü tariximizə, hətta tarixi keçmişimizə də “qənim kəsilməkdədir”. Belə ki, onlar qəbristanlıq ərazisində olan qəbirləri traktorlarla dağıdır və izlərini də itirirlər
Ətraf mühitin mühafizəsi, problemlərinin aradan qaldırılması, ekoloji tarazlığın təmin olunması və s. kimi əhəmiyyət kəsb edən məsələlərin həlli, zaman-zaman aktuallıq kəsb edib. Odur ki, meşə zolaqlarının mühafizəsi ilə bərabər, müxtəlif ərazilərdə, o cümlədən dağ yamaclarında, düzənlik sahələrində, çay vadilərində, hətta yaşayış məntəqələrinə yaxın ərazilərdə belə, əmələ gələn bəzi problemlərin aradan qaldırılması, müəyyən erroziyanın qarşısının alınması və digər addımların atılması da, olduqca əhəmiyyət kəsb edən məsələlər olub. Elə bu səbəbdən də, hələ bir neçə il bundan əvvəl ölkə rəhbəri cənab İlham Əliyev belə amillərin varlığına xüsusi diqqət yetirmiş və aidiyyətı qurumlara, problemlərin həlli ilə bağlı müvafiq tapşırıqlarını da vermişdir.



Onu da vurğulayaq ki, meşə zolaqlarının varlığı hər zaman ictimai həyatımızın yaşadılmasında mühüm rol oynayıb. Xüsusilə də, ondan istifadə etməklə müəyyən tələbatların ödənilməsi və digər təminatların həyata keçirilməsi, bütövlükdə bu sahəyə yönələn diqqətin artması ilə nəticələnib. Hələ məhrum prezidentimiz Heydər Əliyev hakimiyyətdə olarkən "Bir ağacın kəsilməsi bir qolumun kəsilməsidir" demişdir və meşə təsərrüfatına qarşı belə bir yanaşmasını da ortaya qoymuşdur.



Ümumiyyətlə, mərhum prezidentimiz hakimiyyət illərinin bütün dönəmlərində meşə zolaqlarının qorunmasına, yaşadılmasına xüsusi diqqət yetirmiş və bu sahənin mühafizə olunması istiqamətində lazımi tapşırıqlarını da vermişdir. 2010-cu ilin möhtərəm prezidentimiz İlham Əliyev cənabları tərəfindən "Ekologiya ili" elan olunması isə, bir daha ölkə rəhbərinin ətraf mühitə göstərdiyi diqqət və qayğının varlığını göstərdi. Bununla bağlı əhali arasında müxtəlif tədbirlər həyata keçirildi və maarifləndirmə işlərinə qərar da verildi.



Ətraf mühitə qarşı ölkə rəhbəri səviyyəsində belə bir münasibətin varlığına baxmayaraq, bu gün Lənkəranın Vilvan kəndinin yol kənarında, daha dəqiq desək kəndin 200-300 illik tarixi olan qədimi qəbristanlığındakı yaşıllıqlara yerli vəzifə sahiblərinin “qənim kəsilmə”ləri, nə yerə, nə də göyə sığası məslədir. Bu haqda məlumatları “Gündəm Xəbər”ə ünvanlayan bir neçə kənd sakinləri, o cümlədən Dadaşov Rafiq Salah oğlu və Fərziyev Bəxtiyar Paşa oğlu yazdıqları müraciətlərində bildirirlər ki, “Lənkəran şəhəri son müharibənin odu-alovu ilə üz-üzə qalmasa da, bu gün bəzi vəzifə sahiblərinin təcavüzü ilə üz-üzə qalmaqdadır. Belə ki, həmin şəxslər əgər bu günədək meşə zolaqlarına “qənim kəsilirmişdirlərsə”, bu gün kəndimizin qəbristanlığındakı yaşıllıqlara “qənim kəsiliblər”. “Biz qəbristanlıqda abadlıq-quruculuq işləri aparırıq” adı altında, onlar yaşıl ağacları kəsirlər və hər metrəsi 7 manatdan qonşu kəndlərin sakinlərinə də satırlar.



Faciə odur ki, yerli vəzifə sahiblərinin “qənim kəsilmələri” təkcə ağacları doğrayıb satmaqla yekunlaşmır, onlar artıq bir aydır ki, 200-300 illik tarixi olan kənd qəbristanlığına da “qənim kəsiliblər”. Hansı ki, həmin qəbristanlıq bu günə kimi tarixi abidə olaraq qorunurdu. Amma, deyəsən yerli vəzifə sahiblərinin iştahaları bugünkü tariximizə, hətta tarixi keçmişimizə də “qənim kəsilməkdədir”. Belə ki, onlar qəbristanlıq ərazisində olan qəbirləri traktorlarla dağıdır və izlərini də itirirlər. Qəbristanlıq ərazisində olan ağacları isə doğrayıb satışa çıxarır və “haqq-hesab” da əldə edirlər. Hələ ki, atılan addımlara Vilvan kənd icra nümayəndəsi Hikmət Abbasov və adı çəkilən kəndin bələdiyyə sədri Hafizə Quliyeva susmaqda davam edirlər. Ərazi üzrə birbaşa cavabdehlik daşıyan 1 saylı Ərazi Ekologiya və Təbii Sərvətlər Şöbəsinin müdir əvəzi Tahirov Rəfayıl İltifat oğlunu isə, deyəsən problemin varlığı heç cür maraqlandırmır. Bu da onu söyləməyə əsaslar verir ki, istər yaşıllıqlara, istərsə də qədimi qəbirlərə “qənim kəsilənlər”lə, adları hallanan vəzifə sahiblərinin müəyyən işbirlikləri var. Yoxsa”, ...
Vilvan kənd sakinlərinin “Gündəm Xəbər”ə ünvanladıqları müraciətdə sadalananlara diqqət yetirməklə belə bir qənaətə də gəlmək olar ki, yerli vəzifə sahiblərini xalqımızın keçmişi, bu günü deyil, daha çox əldə edəcəkləri “haqq-hesab”ın varlığı düşündürür. Əgər belə olmasaydı, o halda bu cür addımlar da atılmazdı və problemin varlığına cavabdehlik daşıyanlar da susmazdılar. Adı çəkilən kənd qəbristanlığının ərazisində həyata keçirilən “yaşıl soyqrım” harayı, yerli vəzifə sahibləri üçün o qədər əhəmiyyət kəsb etməsə də, inanırıq ki, ekolofiyamıza rəhbərlik edən cənab Hüseyn Bağırov üçün olduqca əhəmiyyət kəsb edəcək və o, problemin araşdırılması üçün “Bağırovsayağı” tapşırığını da verəcək. Problemin varlığını diqqətdə saxlayacağıq.
Açıqlamada adı çəkilən hər kəsin mövqeyini dinləyə bilərik.

Mirzə