Bu gün Yevlax şəhər Yaşıllaşdırma və İşıqlandırma İdarəsinin müdiri olan Etibar müəllimin fəaliyyəti hər kəsi düşündürür. Çünki, şəhərin müxtəlif ərazilərindəki yaşıllıqlar, hələ havalar soyumamış ömür yollarına birdəfəlik “əlvida” da deyiblər

Şəhər və rayonlarımızda, eləcə də digər yaşayış məntəqələrimizdə ekoloji problemlərin həlli, zaman-zaman əhəmiyyət kəsb edən məsələlərdən biri olub. Elə bu səbəbdən də, yeni-yeni yaşıllıqların salınması, ekoloji tarazlığın qorunub saxlanması, bir sözlə insan həyatı üçün əhəmiyyət kəsb edən addımların atılması, daim hər kəsi maraqlandırmış və müzakirə olunan məsələlərdən birinə də çevirmişdir. Bəs görəsən, bu cür əhəmiyyət kəsb edən problemlərin həllində, cavabdehlik daşıyan qurum rəhbərləri hansı yöndə addımlar atırlar? Yaxud da, yaşanan problemlər varsa, onu necə aradan qaldırmağa çalışırlar? Elə bu necəliyin nəticəsidir ki, hələ bir müddət bundan əvvəl bəzi şəhər və rayonlarımızda olduq ki, ümumi vəziyyətin necəliyi haqda lazımi məlumatları əldə edə bilək.

Bu sırada Yevlax şəhəri də maraq dairəmizə daxil olan ərazilərdən biri olduğundan, ümumi vəziyyətin necəliyi haqda, əməkdaşımızın əldə etdiyi məlumatları diqqətlə nəzərdən keçirdik. Həmin an müəyyən edə bildik ki, Yevlax şəhər Yaşıllaşdırma və İşıqlandırma İdarəsinə rəhbərlik edən Etibar müəllimin fəaliyyəti, sanki fəaliyyətsizlikdən başqa bir şey deyil. Çünki, şəhər təsərrüfatının müəyyən ərazilərinə diqqət yetirdikdə, onu da müəyyən etmək olur ki, ayrı-ayrı ərazilərdəki yaşıllıqlar yox səviyyəsindədir. Xüsusilə də, Yevlax şəhər Məhkəməsinin qarşısındakı ağaclar, olduqca pis durumdadır. Şəhərin hava limanına gedən yolun sağ və sol tərəfindəki ağaclar isə, tamamilə quruyub. Yerli mənbənin verdiyi məlumatlarda o da bildirilir ki, həmin ağaclar ölkə rəhbərinin təqribən bir il bundan əvvəl baş tutan səfəri zamanı əkilsə də, bu gün baxımsızlıq ucbatından quruyublar. O zaman ortaya çoxsaylı suallar çıxır ki, görəsən hər il büdcədən ayrılan külli miqdarda vəsaitlər hara xərclənir ki, ümumi vəziyyət acınacaqlı duruma düşüb? Belə olan halda, Yevlax şəhər Yaşıllaşdırma və İşıqlandırma İdarəsinin rəhbəri olan Etibar müəllimin fəaliyyəti hər kəsi düşündürür. Çünki, şəhərin müxtəlif ərazilərindəki yaşıllıqlar, hələ havalar soyumamış ömür yollarına birdəfəlik “əlvida” da deyiblər.

“Gündəm Xəbər”i məlumatlandıran mənbə onu da bildirir ki, adı Etibar olan və şəhər təsərrüfatının yaşıllıq zolaqlarına qarşı etibarsızlıq nümayiş etdirən bu şəxsin əməlləri, əslində çoxsaylı qanunsuzluqlarla dolu olduğundan, ümumi vəziyyət belə həddə çatıb. Yəni, əldə etdiyimiz məlumatlara görə, şəhər təsərrüfatının yaşıllıqlarını suvarmaq üçün, büdcədən hər ay bu məqsədlə külli miqdarda vəsait də ayrılır. Digər tərəfdən, idarənin balansına ayrılan yanacağın müəyyən hissəsi isə, Yevlax-Bərdə yolunun üstündəki “Nur Petrol”da “həzmi-rabedən” keçirilir. Şözsüz ki, bu zaman şəhər təsərrüfatının yaşıllıqlarına qənim kəsilən və daşıdığı vəzifəsinə, üzərinə götürdüyü öhdəliklərə etibarsızlıq nümayiş etdirən Etibar müəllim, əsas söz sahibi olur.

Şəhərin işıqlandırma sisteminin bərbad durumda olması da, Etibar müəllimin etibarsızlığına daha bir işarədir. Çünki, şəhərin 7 saylı orta ümumtəhsil məktəbi tərəfdə, bir qədər də dəqiq desək Nizami prospektindəki küçənin elektrik dirəklərindəki lampoçkalar da dəyişdirilmədiyindən, hər gün ətraf ərazilər qaranlığa qərq olur. Mənbənin verdiyi məlumatlar sırasında, Etibar müəllimin “əla vuran” rəhbər şəxs adını qazanması da, hal-hazırda daha çox müzakirə olunan mövzulardan biridir. Hətta, belə ehtimallar irəli sürənlər də var ki, onun bu cürxarakterə malik olması, yəqin ki, Etibar müəllimin etibarsızlığına səbəb olan əsas şərtlərdən biridir. Problemlərin varlığını diqqətdə saxlayacağıq.

Qarşı tərəfin də mövqeyini dinləməyə hazırıq.

Mirzə

gundemxeber.az