Gəncədə təmizləmə əməliyyatı davam edəcəkmi?

"Gündəm Xəbər" olaraq tez-tez haqsızlığa, müxtəlif məmurlar tərəfindən təzyiqlərə, qadağalara məruz qalırıq. Hətta vəziyyət o yerə çatıb ki, jurnalistikanın təəssübünü çəkməli olan qurumlardan, o cümlədən də Mətbuat Şurasından bizə qarşı təzyiq rıçaqı kimi istifadə edirlər. Bütün bunlar əlbəttə, səbəbsiz deyil. Çünki biz həmişə doğru olanı yazırıq, məmurların qanunsuz əməllərindən, korrupsiya və rüşvətə bulaşmalarından bəhs edirik. Onlar isə yazılanlardan nəticəçıxarmaq əvəzinə talançı əməllərini davam etdirirlər. Hələ bununla kifayətlənməyib bizdən Mətbuat Şurasına, hüquq-mühafizə orqanlarına şikayət də edirlər. Bəli, ayıblarına kor olmaq əvəzinə, tənqidçi mediaya böhtan atırlar. Eynən Gəncə Musiqi Kollecinin sabiq direktoru Gülçin Mirzəyeva kimi. Biz son bir neçə ay ərzində Gəncə Musiqi Kolleci və Gəncə Dövlət Filarmoniyasındakı qanunsuzluqlardan, rüşvət hallarından yazırdıq. Gülçin Mirzəyeva və onun kimi digər məmurlar isə onların qanunsuz əməllərini ifşa etməyimizlə barışa bilmirdilər. Ona görə də bizdən Mətbuat Şurasının Şikayətlər üzrə Komissiyasına şikayət etmişdilər.
Gəlin, həmin komissiyanın dekarın sonlarında yaydığı xəbərə diqqət edək:



"Bu gün Azərbaycan Mətbuat Şurasının Şikayətlər üzrə Komissiyasının iclası keçirilib. İclasın gündəliyinə 5 məsələ daxil edilib. İclasda
«Gündəm xəbər» qəzetinin və onun elektron versiyasının Qərb bölgəsi üzrə müxbiri Mehriban Əzizqızı haqqında Azərbaycan Mətbuat Şurasına ünvanlanan müraciətlər müzakirə edilib. Məlumat verilib ki, Göygöl rayonundakı Xaqani Kənd Musiqi Kollecindən, Kəlbəcər Rayon Təhsil Şöbəsindən, Gəncə şəhər sakini Şəhriyar Əliyev tərəfindən göndərilən məktublarda M.Əzizqızının peşə səlahiyyətindən sui-istifadə etməsi, İsmayıllı Rayon İcra Hakimiyyəti və Gəncə Musiqi Kolleci rəhbərlərinin şikayətlərində isə onların barəsində saytda və mətbu orqanda yanlış məlumatların yayımlandığı göstərilib. Komissiya rəy çıxararkən bunları və hüququ müstəvidə araşdırılması zəruri olan məqamların mövcudluğunu nəzərə alıb. Şikayətçilərə məsələ ilə bağlı müvafiq orqanlara müraciət etmələri tövsiyə olunub".



Göründüyü kimi,Mətbuat Şurası da burada məsələni obyektiv araşdırmayıb. Media ilə cəmiyyətin, hakimiyyətin münasibətlərini tənzimləməyə borclu olan qurum medianın deyil, rüşvətxorların tərəfində olub və onlara bizdən müvafiq orqanlara şikayət etməyi tövsiyə edib. Biz öz fəaliyyətmizlə bağlı hər zaman həqiqətin tərəfində olmuşuq. Mətbuat Şurasının bu cür mövqeyi isə təəssüf doğurur.

Həm də ona görə ki, çox keçmədən bizim yazdıqlarımız təsdiq olundu. Belə ki, üç gün öncə rüşvətxorluqda suçladığımız və bizdən şikayətçi olan Gülçin Mirzəyevanın cinayət törətdiyi, rüşvətxorluqla məşğul olduğu təsdiqləndi. Bütün saytlar onun rüşvət alarkən çəkilən videogörüntülərini yaydılar.

Belə ki, Gəncə Musiqi Kollecində tələbələrdən müsbət qiymətlərin alınması üçün pul yığılması barədə 161 nömrəli “Qaynar xətt” əlaqə mərkəzinə daxil olmuş müraciətə Baş prokuror yanında Korrupsiyaya qarşı Mübarizə Baş İdarəsində baxılıb. Baş Prokurorluğun mətbuat xidmətindən verilən məlumata görə, keçirilmiş istintaq-əməliyyat tədbirləri nəticəsində 2016-cı ildən Gəncə Dövlət Filarmoniyasının direktoru vəzifəsinə təyin olunmasına baxmayaraq, Gəncə Musiqi Kollecinin fəaliyyətinə faktiki rəhbərliyi həyata keçirən sabiq direktor Gülçin Mirzəyeva həmin kollecin direktor müavini Fatimə Qafarzadə ilə qabaqcadan əlbir olaraq özü və ya üçüncü şəxslər üçün qanunsuz olaraq maddi və sair nemətlər əldə etmək məqsədilə kollecin tələbələrindən, habelə onların qohumları və valideynlərindən imtahan sessiyasında müsbət qiymətlərin yazılması üçün ümumilikdə 2000 manat məbləğində pulu rüşvət kimi tələb edib almalarına şübhələr üçün əsaslar olduğundan fakta görə cinayət işi başlanıb.

Qeyd olunan şəxslərin əməllərində Cinayət Məcəlləsinin 311.3.1 (qabaqcadan əlbir olan bir qrup şəxs tərəfindən rüşvət alma) və 311.3.2-ci (təkrar rüşvət alma) maddələrinin əlamətləri oluduğundan onlara həmin maddələrlə ittiham elan olunmaqla barələrində polisin nəzarəti altına vermə növündə qətimkan tədbiri seçilib, habelə Gəncə şəhər Nizami rayon məhkəməsinin qərarı ilə G.Mirzəyeva və F.Qafarzadə vəzifədən kənarlaşdırılıblar.

Cinayət işi üzrə toplanmış ilkin materiallar əsasında tələbələrdən rüşvət müqabilində dərslərə davamiyyətləri barədə jurnallarda qeydlərin silinməsi, fərqlənmə tələbə vəsiqələrinin verilməsi, diplom işlərinin yazılması və işə qəbul üçün pul tələb edilməsi kimi digər qanunsuz hallar müəyyən edilib.

Hazırda cinayət işi üzrə qeyd olunan qanunazidd halların tam, hərtərəfli araşdırılmaqla təqsirli şəxslərin tam dairəsinin müəyyənləşdirilərək məsuliyyətə cəlb edilmələri istiqamətində zəruri istintaq-əməliyyat tədbirləri davam etdirilir.
Bəs, biz nə yazırdıq? Biz də neçə vaxtdır yazırdıq ki, Gülçin Mirzəyeva Gəncə Dövlət Filarmoniyasının direktoru vəzifəsinə təyin olunmasına baxmayaraq, Gəncə Musiqi Kollecinin fəaliyyətinə faktiki rəhbərliyi həyata keçirir və bu təhsil ocağında tələbə və müəllimləri soymaqla məşğuldur. Sağ olsun, Baş prokuror yanında Korrupsiyaya qarşı Mübarizə Baş İdarəsinin əməkdaşları. Bizim yazdıqlarımızın doğru olduğunu onlar keçirdikəri əməliyyatla operativ şəkildə subuta yetirdilər.

Baş verənlərlə bağlı "Gündəm xəbər"in Qərb bürosu üzrə bölgə müxbiri Mehriban Əzizqızı ilə əlaqə saxlayıb onun də mövqeyinə aydınlıq gətirmək istədik. Bölgə müxbirimiz bildirdi ki, Az.TV-də yayımlanan xəbərlərdən sonra Gəncə Dövlət Filarmoniyasına yeni direktor təyin olunduğu bəlli olsa da, Gülçin Mirzəyeva faktiki olaraq Gəncə Musiqi Kollecini idarə edirdi: "Musiqi kollecində tələbələrin, müəllimlərin, o cümlədən valideynlərin haqlı narazılıqları, etirazları baş alıb getsə də, xanım direktoru qanunsuz əməllərdən çəkindirmək üçün Təhsil Nazirliyi tərəfindən hər hansı bir tədbir görülmürdü. Bunun əsas səbəblərindən biri isə Təhsil Nazirliyi Daxili tədqiqatlar idarəsinin Gəncədə yerləşən nümayəndəsinin Ceyhun Mirzəyev olması idi. Bölgədə Təhsil Nazirliyinin "görən gözü" və "eşidən qulağı" olan Ceyhun Mirzəyevin kollecdə rüşvətxorluq hallarını görməməsi qeyri-mümkün idi. Digər tərəfdən isə Qərb regionunda Təhsil Nazirliyinin qeyri- rəsmi səlahiyyətli şəxsi olan, hazırda 8 saylı Ərazi Maliyyə Hesablaşma Mərkəzinin rəisi Vüsal Məmmədov Gülçin Mirzəyevanıhimayə edirdi. Bundan bir müddət öncə müəllifi olduğum yazıda Gəncə Musiqi Kollecindəki baş verən korrupsiya, rüşvətvətxorluqdan geniş bəhs etmişdim. Ona görə də artıq danışmağa ehtiyac duymuram. Sadəcə, Təhsil Nazirliyinin etibar etdiyi şəxslərin baş verənlərə göz yummasının da səbəbləri var. Belə ki, hazırda Gəncəbasarda təhsil sahəsində demək olar ki, bütün idarələrdə artıq xaos yaşanır. Bu xaosu yaşadanlardan biri Vüsal Məmmədovdur ki, elə Gülçin Mirzəyevaya da o, himayədarlıq edirdi. Gülçin Mirzəyevanın yaxın qohumu olan Sevil İsmayılova hazırda 8 saylı Ərazi Maliyyə Hesablaşma Mərkəzində bu qurumun, o cümlədən iqtisadiyyat və maliyyədən məlumatı olmayan Vüsal Məmmədovun məsləhətçisidir. Hazırda o da məlumdur ki, adı gedən idarənin "əsas məsləhətçisi" da mövcuddur. Beləliklə, deyə bilərik ki, Gəncəbasar təhsilinin "çete modeli" hazırdır. Təhsil naziri Mikayıl Cabbarovun bunlardan məlumatı olmaması isə müəmmalıdır. Elə bu səbəbdəndə artıq iki aya yaxın bir zamanda Gəncə Musiqi Kollecində direktor postunu təhvil versə də, "imtahan sezonuna" düşdüyündən oradan ayrıla bilməyən Gülçin Mirzəyeva oradaca korrupsiya faktı ilə saxlanıldı. Atalar yaxşı deyib,"su səhəngi suda sınar". Gəncəbasarda yerləşən rayonların orta məktəblərində cuzi insidentin belə gözündən yayınması mümkün olmayan Ceyhun Mirzəyevin belə bir korrupsiya çetesinə göz yummasının, elə özünü Təhsil Nazirliyinin yerli kuratoru kimi tanıdan Vüsal Məmmədovun bu məsələrə soyuq münasibətinin arxasında nələrsə dayanır".

Əməkdaşımız məlumat üçün onu da bildirdi ki, Gəncə Dövlət Filarmoniyasının sabiq direktoru, xalq artisti Şahnaz Haşımova ötən ilin dekabr ayının 1-dən artıq filarmoniyanın direktoru vəzifəsindən azad olunub, bir müddət sonra, daha dəqiqi, bu ilin yanvar ayından filarmoniyaya Gülçin Mirzəyeva direktor təyin olunmuşdu: "Mədəniyyət Nazirliyinin mətbuat xidmətinin açıqlamasında isə onun üç gün öncə təyinatının verilməsindən danışmasılması qəribədir. Gülçin Mirzəyeva artıq yanvar ayının 5-dən Gəncə Dövlət Filarmoniyasında özünü direktor kimi təqdim edərək, orada işçilərlə konflikt də yarada bilmişdi. Aldığımız digər məlumatlarda deyilir ki, Şahnaz Haşımovanın yaxın rəfiqəsi olan Gülçin Mirzəyevanın filarmoniyaya təyinatı da təsadüfi deyil. Belə ki, hələ 2014-cü ildə Gülçin Mirzəyeva "Əməkdar İncəsənət xadimi" adına layiq görülərkən, onun nədən təhsil sahəsində çalışaraq mədəniyyət işçisi kimi titul alması hamıya qaranlıq qaldı. Bundan məlumatı olacaq yeganə şəxs isə məhz onun yaxın rəfiqəsi, xalq artisti Şahnaz Haçımova idi. Sən demə, hələ o zamandan Gəncə Dövlət Filarmoniyasının dirijoru olduğu halda, daha bir "dirijor" var imiş. Filarmoniyanın o zamanki, direktoru Ş.Haşımovanın "ölü canlar"ından biri elə Gülçin Mirzəyeva imiş. Xatırladaq ki, Şahnaz Haşımova da elə məhz bu cür qaranlıq məsələlərə, Filarmoniyadakıqanunsuz fəaliyyətinə görə işdən azad olundu".
Sonda bir məsələ də bizi maraqlandırır. Təhsil Nazirliyinin Daxili Təhqiqatlar şöbəsinin Gəncəbasar üzrə səlahiyyətlisi Ceyhun Mirzəyev deyilənə görə, son vaxtlar 2 dəfə avtomobilini dəyişib. Özü də hər iki halda o, son model Gelandewagen alıb. Maraqlıdır, məmur maaşı ilə belə avtomobil(özü də iki dəfə) almaq mümkündürmü?



Samir