Rafiq Şıxəliyev: “Sahibkarlıq fəaliyyəti ilə məşğul olduğumdan, hər ay qanunun tələbinə uyğun dövlətə vergi də ödəyirəm”

İctimai həyatımızda vətəndaş-polis münasibətlərinin tənzimlənməsi, tərəflər arasında normal ab-havanın yaşadılması və s. hər zaman aktuallıq kəsb edən məsələlərdən olub. Çünki, DİN-i dövlətimizin əsas strukturlarından biridir və adı çəkilən quruma inam olduqca da böyükdür. Bu belə olduğu halda görəsən səbəb nə olur ki, ara-sıra “Gündəm Xəbər” qəzetində və digər mətbu orqanlarda vətəndaş-polis münasibətlərinə toxunulur, daxili işlər orqanı əməkdaşlarından bəziləri ilə ayrı-ayrı şəxslər arasında yaşanan qarşıdurma halları da ictimailəşdirilir. Tərəfimizdən bu yöndə apardığımız araşdırmalar zamanı o da bəlli oldu ki, DİN-nin struktur bölmələrində çalışan əməkdaşlardan bəziləri, daşıdıqları vəzifələrinə güvənərək polis adıyla uzlaşmayan addımlar atırlar, polis haqqında qəbul olunmuş təlimatlardan kənara da çıxırlar. Məsələn, bir-iki gün bundan öncə redaksiyamıza müraciətini ünvanlayan və 29 mart 2017-ci il tarixdən üz-üzə qaldığı problemlərin ictimailəşdirilməsini xahiş edən, həmçinin Bakı şəhəri, Nəsimi rayonu Ə.Quliyev küçəsi ev-114, mən-9 ünvanında qeydiyyatda olan Şıxəliyev Rafiq Firudin oğlu yazmış olduğu müraciətində bildirir ki, “gözümdə əmələ gələn problemlə bağlı 2012-ci il tarixdən birinci qrup əlil olsam da, 1995-ci ildən sahibkarlıq fəaliyyəti ilə məşğul oluram. Belə ki, vaxtilə Səbail RİH-nin başçısına etdiyim yazılı müraciət əsasında, mənə 17 fevral 1995-ci il tarixdə RİH başçısının imzaladığı №499 saylı sərəncamla, Badamdar qəsəbəsi 1-ci yaşayış masivində 600 (altı yüz) kv.m. torpaq sahəsi verildi. Bir müddət keçdikdən sonra həmin torpaq sahəsində fərdi yaşayış evi tikdirdim və 11 mart 2008-ci il tarixdə isə, Daşınmaz Əmlakın Dövlət Reyestrindən № 0101187 saylı çıxarış da aldım. Vaxtilə inşa etdirdiyim fərdi yaşayış evimdə hal-hazırda minbir xırdavat malları satmaqla, uzun illərdir ki, sahibkarlıq fəaliyyəti ilə məşğul oluram. Belə bir fəaliyyət növü ilə məşğul olduğum üçün, hər ay qanunun tələbinə uyğun dövlətə vergi də ödəyirəm.
Bütün bunlara baxmayaraq, 29 mart 2017-ci il tarixdə saat 13:00-da ərazi üzrə sahə müvəkkili işləyən Mahir Musayev və özünü RİH-nin əməkdaşı kimi təqdim edən digər mülki geyimli şəxs mağazama daxil oldular və onun sökülməsini tələb etdilər. Onu da vurğulayım ki, həmin şəxslər mağazamı dağıtmaq üçün özləri ilə əraziyə traktor da gətirmişdilər. Elə ki, mağazamın içərisində bir qədər mübahisə etdik, çox keçmədi ki, sahə müvəkkili məni təhqir etdi, ünvanıma nalayiq ifadələr işlətdi və teztələsik mağazanın ön hissəsindəki kameraları sındırdılar ki, hər hansı çəkilişi əldə etmək mümkün olmasın. Hələ bu azmış kimi, elektrik xətlərini kəsib atdıqdan sonra, mağazamın üst hissəsini gətirdikləri traktorla uçurtmağa da başladılar. Mağazamı niyə uçurdursunuz deyə sual etdikdə, Mahir Musayev “otur bu maşına, mən sənə hər şeyi izah edərəm niyə uçurduruq” deməkdən də çəkinmədi.
Ərazi üzrə sahə müvəkkili işləyən Mahir Musayevlə belə bir qarşıdurma yaşanmasının kökündə, mənim ona aylıq “haqq-hesab” verməməyim səbəb olur. Çünki, o, daim bildirir ki, “sən mənə aylıq “haqq-hesab” verməlisən, mən də RPİ-nin rəhbərliyinə çatdırmalıyam. Yoxsa məni işləməyə qoymazlar” deyir. Axı, mən sahə müvəkkilinə niyə aylıq “haqq” verməliyəm? Sahibkarlıq fəaliyyəti ilə məşğul oluram, qanunun tələbinə uyğun vergi borcumla bərabər, kommunal xidmətlərdən istifadəyə görə digər borclarımı da ödəyirəm.
Onu da bildirim ki, sahibi olduğum mağazamın yerləşdiyi ərazi heç bir dövlət əhəmiyyətli lahiyə planına düşmədiyi və bir kimsəyə maneçilik yaratmadığı halda, sahə müvəkkili tərəfindən belə bir zorakılığa məruz qalmağım, məni cənab Prezidentimizə, Mehriban xanım Əliyevaya, DİN-nin 102 xidmətinə müraciət etməyə vadar etdi. Düzdür, etdiyim müraciətlərin araşdırılması hal-hazırda BŞBPİ-nin əməkdaşları tərəfindən həyata keçirilir və bununla bağlı adı çəkilən qurumun əməkdaşı izahatımı da alıb. Bu gün də təçviş içindəyəm. Çünki, özümün 1-ci qrup əlil olmağımı, həyat yoldaşımın Xankəndindən məcburi köçkün düşməsini, zəmanəmizin çətinliyini və s. nəzərə almayan Mahir Musayev, yenə də mağazamı uçurdacağı ilə mənə mesajlarını çatdırır. Düzdür, 29 mart 2017-ci il tarixdə saat 13:00 radələrində, Mahir Musayev şəxsi mülkiyyətimdə olan mağazamın yalnız dam örtüyünü dağıtdıra bilmişdi. Bu gün isə ehtiyat edirəm ki, bu şəxs qəflətən addımını atar və mağazamı yerli-dibli dağıtdırar. Odur ki, problemin ictimailəşdirilməsinə qərar verdim ki, DİN-nin rəhbərliyi polis adıyla uzlaşmayan əməllərə qol qoyan sahə müvəkkilinin addımlarından az-çox xəbərdar ola bilsin. Düşünürəm ki, bir sahibkar olaraq üz-üzə qaldığım problemin ictimailəşdirilməsi, məni intihara sürükləyən sahə müvəkkilinin özünü “yığışdırması” ilə də nəticələnəcək.
Axı, bu gün ölkə rəhbəri sahibkarlıq məsələsinə olduqca önəm verir və yerli vəzifə sahiblərinə bu yöndə lazımi tapşırıqlarını da verir. Məsələn, cənab İlham Əliyev keçirdiyi müşavirələrin birində demişdir: “Hər bir yerdə yerli icra orqanlarının rəhbərləri, icra başçıları, vəzifəli şəxslər sahibkarlara köməklik göstərməlidirlər. Onların fəaliyyətinə dəstək verməlidirlər, onların işinə müdaxilə etməməlidirlər, qanunsuz tələblər irəli sürməməlidirlər. Sahibkarlara yalnız köməklik göstərmək lazımdır ki, öz işlərini daha da səmərəli şəkildə qura bilsinlər”. Bu belə olduğu halda, görəsən sahibkarlıq fəaliyyəti ilə məşğul olan Rafiq Şıxəliyevin sahə müvəkkili tərəfindən “gözümçıxdıya” salınmasına səbəb nədir?
İşıq üzü görən açıqlamada sadalananlar şikayətçiyə məxsus olduğundan, hələlik yaşananlarla baрlı geniş açıqlama dərc edə bilmirik. Ona görə də problemin varlığını diqqətdə saxlayıb, növbəti saylarımızda daha geniş açıqlamalar dərc etməyə çalışacağıq. Bugünkü açıqlama hazırlanarkən, sahə müvəkkili Mahir Musayevlə heç cür əlaqə saxlaya bilmədiyimizdən, açıqlamanı bitərəfli qaydada dərc etməyə məcbur olduq. Qarşı tərəfin də mövqeyini dinləyə bilərik.

Cəfər