“Asan xidmət”də və “Azercel” müştəri xidmətində sistem probleminin əmələ gəlməsinə nələr səbəb olur?

Artıq bir neçə ildir ki, “Asan xidmət”in bir lahiyə olaraq tətbiqi, ölkə əhalisinin tam razılıqla qarşıladığı addım oldu. Çünki, dövlət qurumlarının əksəriyyətində üz-üzə qaldıqları çətinliklərdən, getgəllərdən, bir sözlə süründürməçilik amillərinin varlığından birdəfəlik xilas olan sakinlər, belə bir xidmət növlərinin tətbiqini olduqca da alqışladılar. Qeyd olunan qurumda göstərilən xidmət növlərinin göstəricisi, şəffaflığın təmin edilməsi istiqamətində atılan addımlar və s. onu söyləməyə əsas verir ki, “Asan xidmət”in tətbiqi, həm də ölkə əhalisi arasında ictimai inamın əmələ gəlməsinə də səbəb oldu.
Amma, son günlər çoxsaylı sakinlərin üz-üzə qaldıqları bəzi problemlərin varlığı, “Asan xidmət”dən yararlananları müəyyən mənada çətin anlarla da üz-üzə qoyur. Çünki, lazımi xidmət növlərindən istifadə edən sakinlərə problemlər xidmət əməkdaşları tərəfindən deyil, məhz xidmət əməkdaşlarına bəzi qurumlar tərəfindən yaradılan müəyyən səbəblər üzündən əmələ gəlir ki, bu da hansısa formada narazılıq hissinin əmələ gəlməsi ilə də nəticələnir.
Həftənin bazar günləri qeyri iş günü olduğundan, tutaq ki, hansısa sakin şəxsiyyət vəsiqəsini almaq, yaxud da dəyişdirmək istəyi ilə adı çəkilən quruma üz tutur. Həmin vaxt xidmət əməkdaşlarından “sistem işləmir, bir qədər gözləməli olacaqsınız” deyə cavabı eşitməli olursan. Düzdür, “Asan xidmət” əməkdaşları vaxtlı-vaxtında iş başında olurlar və nümunəvi davranışları ilə hər kəsə lazımınca xidmət etməyə hazır olduqılarını da bildirirlər. Yəni, problemin kökündə xidmət əməkdaşlarına bəzi qurumlar tərəfindən yaradılan əngəllər səbəb olur ki, bu da son anda hansısa formada “Asan xidmət”in adı ilə bağlanır. Baş verənləri müzakirə etdikdə o da aydın olur ki, sistemin işləməməsinin günahını adı çəkilən qurumda deyil, məhz ona problem yaradan digər qurumların yarıtmaz fəaliyyətində axtarmaq lazım gəlir.
Oxşar problemlərin yaşandığı qurumlardan biri də, “Azercel” müştəri xidmətinin olduğu bildirilir. Çünki, qanunvericiliyin tələbinə görə müəyyən sahibkarlıq növü ilə məşğul olan şəxslər, hər kvartala görə DSMF-nun yerli qurumlarına sosial hesabatlarını təqdim etməlidirlər. Belə bir prosesin həyata keçirilməsi üçün, ilk öncə həmin şəxslər “Azercel” müştəri xidmətindən nömrə almalıdırlar ki, “Asan xidmət”dən “asan imza” əldə edə bilsinlər. Son vaxtlar müştəri xidmətlərində sistemlərin işləməməsi səbəbindən, sahibkarlar belə bir prosesi həyata keçirə bilmirlər və onlar məqsədlərinə nail olmaq üçün, hətta gün ərzində təqribən 4-6 saat ərzində vaxtlarını itirməyə də məcbur olurlar. Digər tərəfdən isə, rüblük hesabatın verilməsi üçün 20 aprel son gün hesab olunur. Əgər hansısa sahibkar rüblük hesabatını gecikdirərsə, o halda ona 40-80 manat arası cərimə tətbiq olunur. Belə olan halda sahibkarlıqla məşğul olan hər kəsin fəaliyyəti müzakirə mövzusuna çevrilir və “Gündəm Xəbər” olaraq hansı tərəflərin günahkar olmasının araşdırılmasına da çalışırıq.
İndi bir anlığa olsa belə olub-keçənlərə diqqət yetirək. Bir tərəfdən sahibkarlardan mövcud qanunvericiliyin tələblərinə əməl etmələri tələb olunur, digər tərəfdən aidiyyəti dövlət qurumları sahibkarlara problemlər yaradır. Yəni, “Azercel” müştəri xidmətlərində sistemin işləməməsi səbəbindən gözləmə zallarında müştəri sıxlığı yaranmaqla bərabər, sahibkarlar getgələ salınırlar, əlavə cərimələrlə üz-üzə qalırlar və digər xoşagəlməz olayları da yaşamalı olurlar. Bu da onu söyləməyə əsas verir ki, xoşagəlməz problemlərin əmələ gəlməsində, narazılıq hissinin artmasında günahkar “Asan xidmət”, “Azercel” müştəri xidmətləri deyil, birbaşa sistemin normal işləməsinə cavabdehlik daşıyan Nəqliyyat, Rabitə və Yüksək Texnologiyalar Nazirliyidır.
Belə bir problemə toxunmaqla onu bildirmək istəyirik ki, çoxsaylı sahibkarları və digər müştəriləri hansısa qurumdan narazı salmamaq üçün, ilk öncə adı çəkilən nazirlik əməkdaşları məsuliyyət hissini artırmalıdırlar ki, kimlərsə növbəti olaylarla üz-üzə qalmasınlar. İnanırıq ki, toxunduğumuz problem aidiyyəti qurumların diqqətini cəlb edəcək və baş verənlərə cavabdehlik daşıyanlar, problemlərin aradan qaldırılması üçün müvafiq addımlarını da atacaqlar. Qarşı tərəfi də dinləyə bilərik.
Problemlərin varlığı diqqətimizdədir.

Cəfər