Dövlətə qarşı gedən Canabbas kimdir?

Onun sözlərinə görə, 20 ildən artıq çox ağır şəraitdə yaşayıblar: “Lakin 2013-cü ildə dövlətimiz tərəfindən bizə gözəl şəraiti olan mənzillə təmin olunduq. Bunun üçün dövlətimizə və prezidentimizə həmişə minnətdarlığımızı bildiririk.

Biz məcburi köçkünlər daima prezdentimizin yürütdüyü siyasəti dəstəkləyir və onun qanunlarına riayət edirik.

Bildirirəm ki mən özüm Yeni Azərbaycan partiyasının üzvüyəm.Bütün seçkilərdə fəal iştirak edirəm və YAP-dan daim seçkilərdə müşahidəçi kimi iştirak edirəm.

Bunları bildirməkdə məqsədim budur ki, Dövlətimizin, dövlətçiliyimizin və prezdentimizin yüyürtdüyü siyasətə kölgə salan bəzi dövlət məmurları var ki, mən onlardan biri haqda sizə məlumat vermək istəyirəm.

Belə ki, Qaradağ rayonu su kanal idarəsinin Canabbas adlı içisi bizim şəhərcikdə “at oynadır”. Özünü əsl qoçu kimi aparır. Kimə nə istəyirsə deyir, təhqir edir.

Hətta magistral yolu bağlamaq haqda çağırışlar edir. Biz inana bilmirik ki, bu necə dövlət işçisidir dövlətə qarşı çıxır”.



“Gedin prezidentiniz sayğac qoysun”

Şikayətçi bildirir ki, ərazidə neçə illərdi çoxlu ağaclar əkiblər: “Ağaclar böyüyüb, gözəl yaşıllıqlar əmələ gəlib. Şəxsən mən öz vəsaitim hesabına binamızın ətrafında 100-dən yuxarı ağac əkib böyütmüşəm.

Ulu öndərimizin və prezdentimizin tapşırığına əsasən “hərə bir ağac əkək” çağırışına ürəkdən qoşulmuşam.

İndi Canabbas kimi bir şəxs deyir ağaclarınız cəhənnəmə qurusun, gedin JEK-ə müraciət edin, sizə sayğaç qoysun. Biz bildirdik ki, sayğacı qoyun biz işlətdiyimiz suyun pulunu ödəyərik.

Sakinləri yığıb JEK-ə apardım və bildirdi ki, mən sayğac qoyan deyiləm, gedin yolu bağlayın, prezdentiniz gəlib sizə sayğac qoysun. Ümumiyyətlə, biz belə insana rast gəlməmişik. Tam açıq şəkildə dövlətə qarşı çıxış edir.

Odur ki, Sizdən xahiş edirik, Qaradağ rayon su-kanal idarəsinin işçisi - Canabbas adlı qoçunun haqqında lazımı tədbir görülməsində bizə köməklik edəsiniz”.

İdarə rəisi qahmar çıxıb: “Yaxşı eləyib”

“Gündəm-Xəbər”in əldə etdiyi məlumata görə, məcburi köçkün “Azərsu” ASC prezidenti Qorxmaz Hüseynova da Qaradağdakı kadrı olan Canabbasın qanunsuz əməllərindən bəhs edib.

O, Q.Hüseynova yazdığı ərizədə faktlar açıqlayıb: “ 2.06.2017-ci il tarixdə Qaradağ rayon su kanal idarəsinin rəisi Əhliman Mənsurova və 10-cu polis bölməsinin rəisinə Müşviqabad qəsəbəsi üzrə sahə ustası Canabbas Rüstəmovun özbaşınalığı, sakinlərlə kobud davranışı və dövlətçiliyimizə qarşı müxalifət yönlü çağırışlar etməsindən yazmışam.

Həmin ərizəni 29 nəfər imzalayıb və Canabbas Rüstəmov dedikləri sözləri öz imzalarıyla təsdiq ediblər. Lakin bu günə qədər Qaradağ su-kanal idarəsi heç bir reaksiya verməyib, heç nə olmamış kimi özlərini aparırlar.

Bir neçə gündən sonra mən özüm şəxsən Əhliman müəllimə telefon vasitəsi ilə zəng edib Canabbasın burda yaşayan sakinlərə hörmətsizlik etməsini bildirərkən, Əhliman müəllimin mənə cavabı o oldu ki, yaxşı eləyib. Dövlət məmurunun vətəndaşa verdiyi cavab nə qədər düzgündür, bunu başa düşə bilmirəm”.



Sənədi olmayan şəxsə su sayğacı?

Məcburi köçkün qeyd edir ki, bunların ərizəyə laqeyd baxması məcburi köçkünləri hiddətləndirir:

“Belə ki, Canabbas Rüstəmov bu qədər səlahiyət sahibi olub ki, layihədə nəzərdə tutulmuş məcburi köçkünlərə tikilmiş su nasosxanasından özbaşına 1500 metr kənarda yerləşən Şamaxı rayon qeydiyyatında olan, lakin tikinti üçün heç bir sənədi olmayan şəxsə sayğacsız su xətti çəkib, su ilə təmin edib.

Burda açıq-aydın görsənir ki, öz şəxsi mənafeyini güdüb və bu işə gedib. Belə faktların bir neçəsini göstərmək olar. Ona görə də pulu çox olduğundan biz məcburi köçkünlərə yuxarıdan aşağı baxır.

Hörmətli Qorxmaz müəllim, biz inanırıq ki, dövlətçiliyimizə xələl gətirən C.Rüstəmov kimi adamları siz öz sıralarınızda saxlamayacaqsınız”.

Göründüyü kimi, bir su-kanal idarəsinin əməkdaşı köçkünlərin başına oyun açır, qəsəbədə meydan sulayır, hər bir qanunsuzluğa imza atır, üstəgəl, ona idarə rəisi Əhliman müəllim də dəstək verir.

“Azərsu” ASC rəhbərliyi isə ona edilən müraciətlərə hələ də cavab vermir. Belə məlum olur ki, C.Rüstəmov arxalı-dayaqlı biridir. Əks halda Q.Hüseynov tədbir görərdi. Yerli idarə işçilərini seçərkən hansı meyarlara üstünlük verildiyi aydın deyil.

Hər halda Q.Hüseynov C.Rüstəmova görə köçkünləri hökumətin üstünə qaldırmağa razı olmaz. Ölkədə ilin-günün bu saatında köçkünlərin etiraza qalxması, hökumətlə üzbəüz qoyulması, gərginliyə səbəb olmaq yaxşı hal deyil.

Prezident dəfələrlə bildirib ki, aztəminatlı ailələrin, şəhid ailələrinin, məcburi köçkünlərin şikayətlərinə həssas yanaşmaq lazımdır, hər bir vətəndaşın müraciətinə baxılmalıdır, problemləri həll olunmalıdır.

Son müşavirədə də dövlət başçısı məmurlara ciddi mesajlar verdi, icra başçılarına xəbərdarlıq etdi.

C.Rüstəmova gəlincə, su idarəsində işləsə də, Qaradağ rayonuna aid olduğu üçün icra başçısı Süleyman Mikayılov tapşırıq verə bilər və məsələni araşdırmaq səlahiyyəti var.

Su İdarəsinin maxinasiyaları

Qeyd edək ki, bundan əvvəl də Qaradağ su-kanal idarəsində baş verənlərdən yazmışıq. Bildirmişik ki, hələ bir müddət bundan əvvəl adı çəkilən rayonun Su-Kanal İdarəsinə Əhliman müəllimin müdir təyin olunması, məhz çoxsaylı problemlərin də əmələ gəlməsinə səbəb oldu.

Əgər 2013-cü ildən bu günə kimi məcburi köçkün ailəsinin hər üzvünə 5 kub içməli təmiz su verilirdisə və verilən hər kub suya görə, Qaçqın və Məcburi Köçkünlərin İşləri üzrə Dövlət Komitəsindən ayrılan vəsait Qaradağ rayon Su-Kanal İdarəsinə köçürülürdüsə, bu heç vaxt hansısa söz-söhbətin əmələ gəlməsinə də səbəb olmurdu.



Amma bu gün yeni rəhbərliyin atdığı addımların nəticəsində “yeni ocaq”lar yanmağa başlayıb.

Çünki, hər bir köçkün ailəsinin üzvü ay ərzində verilmiş normadan az miqdarda içməli su işlədirsə, deməli ona aid Su-Kanal İdarəsinin balansında xeyli miqdarda vəsait qalır.

Əslində həmin vəsait dövlət tərəfindən ödənildiyi üçün, toplanmış vəsaitlər məcburi köçkün ailəsinin hər bir üzvünə çatmalı və həmin şəxs də, toplanmış vəsaitdən istədiyi formada istifadə etmək hüququna malikdir.

Bildirilir ki, son günlər Qaradağ rayon Su-Kanal İdarəsinin əməkdaşları məcburi köçkünlərin yaşadıqları mənzillərə gedir və içməli sudan istifadəyə görə borc əmələ gəldiyini də bildirirlər.

Hətta bununla bağlı rəsmi sənədləşmə apararaq, hər bir köçkün ailəsinə borc da yazırlar. Düzdür, 2017-ci ildə məcburi köçkünlərin kommunal xidmətlərdən istifadəyə görə imtiyazları ləğv edildi.

Amma Qaçqın və Məcburi Köçkünlərin İşləri üzrə Dövlət Komitəsindən məcburi köçkünlərə içməli təmiz suya görə ödənilmiş vəsaitlərin xeyli hissəsi Qaradağ rayon Su-Kanal İdarəsinin balansında qalsa da, yeni rəhbərlik toplanmış vəsaitləri sahiblərinə verməkdən imtina edir. Bu da məcburi köçkün ailələrinin haqlı narazılığına səbəb olmaqdadır.



Qorxmaz Hüseynov idarələrdən bixəbərdi?

“Gündəm-Xəbər” yazır ki, bu gün irili xırdalı bəzi məmurların vətəndaşlara qarşı etdikləri sözsüz ki, heç bir əndazəyə sığmır və prezident İlham Əliyev dəfələrlə bu cür məmurlara ən sərt şəkildə xəbərdarlıq etmiş, bəzilərini isə tutduqları vəzifədən azad etmişdi.

Buna baxmayaraq yenə də vətəndaşlara qənim kəsilənlər var və təssüf ki, “qılınclarının dalı da qabağı da kəsir”. C.Rüstəmov və ona qahmar çıxan rəisi də onlardan biridir. Köçkünlər xahiş edirlər ki, tezliklə tədbir görülsün.

Onu da demək lazımdır ki, rayonlarda su-kanal idarələrinin maxinasiyalarından “Azərsu” rəhbərliyinin bixəbər olması inandırıcı deyil.

“Azərsu” Qorxmaz Hüseynovun yaxın ətrafının talan obyektinə çevrilib və aparılan maxinasiya sistemində əsasən 4 şəxsin adı çəkilir. Onlardan biri, Qorxmaz Hüseynovun bacısı oğlu Yusifəlidir.

Digəri qardaşı Məhəmməd, üçüncüsü qaynı Namiqdir, dördüncü isə Su Təsərrüfatı İşçiləri Həmkarlar İttifaqı Respublika komitəsinin sədri Akif Məmmədovdur.

«Azərsu» prezidenti Qorxmaz Hüseynovun layihələrdən pay verdiyi şəxslərdən biri də qaynıdır. «Hidro-İnşaat Servis» MMC-nin rəhbəri olan Namiq Cəbrayılov sözün həqiqi mənasında Yusifəli və Məhəmməddən də daha çox paya sahibdir.

Onun şirkətin əksər işlərini həyata keçirdiyi və bir çox hallarda normal şəkildə işləri görmədiyi üçün problemlər yaratdığı «Azərsu»da kimsəyə sirr olmayan məsələdir.

Namiq Cəbrayılovun «udduğu» tenderlərin ən ucuzu 1 milyon dollarlıqdır. Qalanları isə artan rəqəmlər üzrə inkişaf edir. Ona görə də, Qaradağ Su-Kanal İdarəsində nələr baş verdiyini bir yoxlama ilə təsbit etmək olar.