Direktorun qol qoyduğu qanunsuzluqlardan birinin də, onun saxta diplomlu şəxsləri zamanında işə qəbul etməsi olub

Regonlarda fəaliyyət göstərən və musiqi təhsili verən müəssisələrdə yaşanan problemlər zaman-zaman müzakirə olunan mövzulardan biri olsa da, bu gün də açıq şəkildə etdiraf edə bilərik ki, digər təhsil müəssisələrinə nisbətən musiqi təhsili verən müəssisələrin əksəriyyətində, hələ də həddi-hüdudu bilinməyən qanunsuzluqlar tüğyan etməkdədir. Çoxsaylı qanunsuzluqların baş alıb getdiyi təhsil ocaqlarından biri də, Samux rayonu Sərkar kənd musiqi məktəbinin olduğu bildirilir. Bu günə kimi adı çəkilən musiqi məktəbində yaşananlarla bağlı, bəzi media qurumlarında silsilə tənqidi açıqlamalar dərc olunsa da, çox təəssüflər olsun ki, problemlər hələ də həllini tapmayıb. “Gündəm Xəbər” olaraq müxtəlif mənbələrdən müfəssəl məlumatlar əldə etmişik ki, Məmmədbəyova Səadət Fərhad qızının direktor olduğu musiqi məktəbində, hər cür qanunsuzluq, həddi-hüdudu bilinməyən anarxiya, xaos və s. hökm sürməkdədir. Bəzi sakinlərin iddialarına və ayrı-ayrı media qurumlarında dərc olunan açıqlamalara görə, adı çəkilən müəssisənin direktoru Səadət xanım, hələ də daşıdığı vəzifəsindən sui-istifadə edir, minbir oyun qaydalarına imza atır. Yəni, o, adları məktəbin ştat cədvəlində gedən, amma məktəb üzü tanımayan bəzi müəllimlərin adlarına əmək haqqı yazmaqla mənimsəyir, şagirdlərin sayını müəyyən yollarla artırıb sinif düzəldir. Belə bir yollarla o, hər ay külli miqdarda büdcə vəsaitlərini mənimsəyir. Verilən məlumatlarda o da bildirilir ki, əgər Səadət Məmmədbəyovaya məxsus əl çantasına qəflətən baxış keçirilərsə, həmin çantadan bir neçə nəfər şəxsə, o cümlədən Rövşən Əsgərova, Salman Nağıyevə, Babək Hüseynova və digər şəxslərə məxsus bankomart kartları tapılar. O halda sual oluna bilər ki, adları çəkilən şəxslərə məxsus bankomart kartları direktora məxsus əl çantasında niyə gəzdirilir? Belə bir sualın olduqca asan bir cavabı var. Çünki, həmin kartlar vasitəsilə maaşları bankomatlardan Səadət xanımın özü çıxarır və “həzmirabedən” də keçirir.
“Gündəm Xəbər”in əldə etdiyi məlumatlarda o da bildirilir ki, builki tədris ilində Sərkar kənd musiqi məktəbində 295 nəfər şagirdin təhsil alması rəsmi sənədlərdə əksini tapsa da, əslində bu belə olmayıb. Yəni, həmin musiqi məktəbində təqribən 170 nəfər şagirdin təhsil alması haqda məlumatlar dövriyyəyə yayılıb.
Direktorun qol qoyduğu qanunsuzluqlardan birinin də, onun saxta diplomlu şəxsləri zamanında işə qəbul etməsi olub. İşə qəbulla bağlı Səadət Məmmədbəyovanın daha çox qohum-əqrəbasına “stavka” etməsi isə, daha dözülməz hal olub. Çünki, əksər media qurumlarının yazdıqlarına, bəzi mənbələrdən əldə etdiklərimiz məlumatlara görə xanım direktorun atdığı addımlar, nəinki adı çəkilən rayonun ərazisində, hətta ətraf şəhər və rayonlarda da müzakirə olunmaqdadır. Məsələn, Samux rayonunun Kolayır kəndində yaşayan Məmmədova Günay Duman qızının, Səadət xanım Məmmədbəyovanın əməllərindən bir çox dövlət qurumlarına, o cümlədən Baş Prokurorluq yanında Korrupsiyaya Qarşı Mübarizə Baş İdarəsininin rəhbərliyinə ərizə ilə müraciət etməsi və edilmiş müraciətlə bağlı xeyli müddət bundan əvvəl müəyyən yoxlamaların aparılması, artıq problemlərin ciddiliyindən xəbər vermiş olur. Xanım Məmmədova ünvanladığı şikayət ərizəsini bəzi mətbu orqanlarda dərc etdirdiyindən, biz də bir media nümayəndəsi olaraq baş verənlərlə bağlı lazımi məlumatları əldə edə bildik. Günay Məmmədova yazıb ki, “mən Sərkar kəndində fəaliyyət göstərən uşaq-musiqi məktəbində xor-dirijor müəllimi vəzifəsində işləyirəm və bizim məktəbə rəhbərlik edən Səadət Məmmədbəyovanın cinayət xarakterli əməlləri ilə bağlı sizə müraciət edirəm. Belə ki, direktorumuz ona verilmiş səlahiyyətlərindən sui-istifadə etməklə, rəhbərlik etdiyi musiqi məktəbində hər cür qanunsuzluqlara imza atır. O, bu günə kimi saxta diplom sahibi olan bir neçə nəfər şəxsi qanunsuz yollarla işə qəbul etmiş, ayrı-ayrı şəxslərin adlarını məktəbin ştat cədvəlində müəllim yazdırmış və həmin müəllimlər işə gəlmədikləri halda, onları yüksək məbləğdə əmək haqqı ilə təmin etməyi də bacarmışdır. Belə bir yolla da, o, hər ay külli miqdarda büdcə vəsaitlərini mənimsəməyi bacarır.
Mən bugünkü müraciətimə 2015-2016-cı tədris ili üçün tarifləşmə cədvəlini də əlavə edirəm. Əgər həmin cədvəl üzrə müəyyən araşdırmalar aparılarsa, o halda məktəbdə faktiki olaraq dərs keçməyən, amma adına dərs yükü yazılan müəllimlərin olması aşkar çıxarılar. Cədvəldə adları qeyd olunan Nağıyev Salman, İbrahimov Alim, Məmmədbəyova Şəms, Alməmmədova Vəsilə, Əsədova Pərvanə, Hacıyev Namiq, Əliyev Şaiq, Əmrahov Elnur, Məmmədova Aytən, Əsgərov Rövşən, Hüseynov Babək, Hacıyev Şahin, Məmmədov Elçin, Salmanova Nigar, Həsənova Gülnarə və s. “ölü canlar”dırlar. Onlar işləmədikləri halda adları rəhbərlik tərəfindən müəllim kimi rəsmi sənədlərdə saxlanılır və əmək haqqı kartları da, ya direktorda, ya da ki, direktorun yaxın qohumlarında olur. Həmin müəllimlərin dərs saatlarının qaydaya salınması üçün, hətta məktəbdə təhsil almayan şəxslər şagird siyahısına da əlavə olunurlar.
Bundan əlavə, Səadət Məmmədbəyova korrupsiyaya qarşı mübarizə haqqında Qanunun tələblərini dəfələrlə kobud surətdə pozmuş və bir neçə yaxın qohumunun adına yüksək dərs saatları yazmaqla, onları yüksək maaşlı işlə də təmin etmişdir. Yaxın bir qohumunu isə, məktəbin dərs hissə müdiri vəzifəsinə təyin etmişdi. Daha dəhşətli hal odur ki, direktor sinifdə şagirdlərin sayının stabil saxlanması üçün, hətta kollecdə təhsil alan bir şagirdin adını skripka sinifinə də yazdırır.
Mən uzun illərdir ki, qeyd olunan məktəbdə müəllimə işləyirəm. Məktəb direktorunun yuxarıda qeyd olunan qanunsuz hərəkətlərə yol verməsi, mənim və məndən başqa bir çox müəllimlərin hüquqlarını pozması, artıq dözülməz həddə çatıb. O, hər ay müəllimlərin əmək haqlarından qanunsuz pul tutur. Direktor hansısa havadarlarına arxalanaraq mənə və digər müəllimlərə heç bir halda əhəmiyyət vermir, bizi işdən çıxaracağı ilə hədələyir. Açıq şəkildə “mən heç kimdən qorxmuram, çünki hər kəsə “haqq-hesab” verirəm” deyir. Direktor məktəbi sanki dədə mülkü kimi idarə edir. Bir faktı da diqqətinizə çatdırım ki, direktor saxta yollarla bir ay ərzində təqribən 10 min manatdan artıq pulu mənimsəyə bilir ki, bu da hər ay təkrar olunur”. Bütün bunlar Günay Məmmədovaya məxsus açıqlamalardır ki, onun sadaladıqları artıq xeyli müddət bundan əvvəl bəzi media qurumlarında da işıqlandırılıb. Biz də “Gündəm Xəbər” olaraq sadalanan olayların ciddiliyinə olduqca diqqət ayırdıq və onların təkrar ictimailəşdirilməsinə də qərar verdik. Düşünürük ki, yarıtmaz idarəçiliyi ilə musiqimizi, incəsənətimizi, bir sözlə keçmiş və gələcək tariximizi bilərəkdən məhv edən, onu uçurumun astanasına sürükləyən Səadət Məmmədbəyovanın daşıdığı vəzifəsinə “yox” deməyin artıq zamanı çatıb. Biz o hala da inanırıq ki, məqalənin dərcindən sonra mədəniyyət və turizm naziri cənab Əbülfəs Qarayev, Sərkar kənd musiqi məktəbinin rəhbərliyi ilə bağlı müvafiq addımlarını atıb, “yek” qərarını da verəcək.
Dəyərli oxucular! Dərc olunan bu məqaləni diqqətlə oxuyun və Sərkar kənd musiqi məktəbinin direktoru haqda, onun həyata keçirdiyi idarəçiliklə bağlı öz təəssüratarınızı formalaşdırmağa da çalışın. Eyni zamanda, Səadət xanım Məmmədbəyovanın qol qoyduğu digər qanunsuzluqlar barədə dəqiq və təsdiq olunası məlumatlarınız varsa, həmin məlumatları redaksiyamıza çatdırmağınız, yəqin ki, aparacağımız jurnalist araşdırmalarına təkan vermiş olacaq. Bununla da siz növbəti açıqlamaların hazırlanmasında redaksiya əməkdaşlarına öz dəstəyinizi vermiş olacaqsınız. Qarşı tərəfin də mövqeyini dinləyə bilərik. Araşdırmamız davam edəcək.

Cəfər
"Gündəm Xəbər"