Günel Mehdiyeva: “2016-cı ildə ölkə rəhbəri cənab İlham Əliyev Zərdab rayonuna etdiyi səfər zamanı, məni və həyat yoldaşımı səhərdən-axşama kimi Polis Şöbəsinin təcridxanaslnda saxladılar”

Zərdab rayonunun Məlikumudlu kənd sakini Mehdiyeva Günel Faxrət qızının “Gündəm Xəbər”in redaksiyasına ünvanladığı şikayət ərizəsini oxuduqca, ayrı-ayrı vəzifə sahiblərinin onların başına açdıqları müsibətlərdən, yaşanan olayların varlığından, bir sözlə olub-keçənlərdən az-çox məlumat əldə edə bildik. Belə ki, şikayətçi xanım ərizəsində yazır ki, Zərdab rayon İcra Hakimiyyətinin başçısı Lütvəli Babayev və Zərdab rayon Məhkəməsinin sədri Tahir Qubadov, bizim ailəni küllü miqdarda rüşvət hesabına sovetlər dönəmindən yaşadığımız komadan çıxararaq, çölün düzünə atdırıblar. Onu da bildirim ki, həyat yoldaşım Sarəncin Mehdiyevin atası sovet dönəmində Məlikmudlu kəndinin kolxoz fermasında çoban, anası isə sağıcı işləyib. Buna görə də onlar sovet dönəmində fermanın çobanları üçün tikilmiş evdə yaşayıblar. Həyat yoldaşım Sarənc Mehdiyev də həmin evdə doğulub, boya-başa çatıb və mən də həmin evə gəlin gəlmişəm. Hətta, həmin evdə birgə nigahdan iki övladımız da dünyaya gəlib. Elə ki, sovet qurluşu dağıldı, həmin evi qaynatam Mehdiyev Nəsrəddin Nəsir oğluna əmlak payı olaraq verdilər və bununla bağlı lazımi sənədlər də var.
Bundan sonra biz həmin evin ətraf ərazisindəki torpaq sahəsindən istifadə etmək üçün, Məlikmudlu bələdiyyəsi ilə icarə müqaviləsi bağladıq. Çox keçmədi ki, Zərdab RİH başçısının sabiq müavini Tofiq Abdullayev, Məlikmudlu bələdiyyəsinin rəhbərliyi ilə 25 illik icarə müqaviləsi bağlayaraq, uzun müddətdən bəri yaşadığımız evin yaxınlığında istifadə etdiyimiz torpaq sahələrini həyat yoldaşı Abdullayeva Nüşabə Ağalar qızının adına sənədləşdirdi. Baxmayaraq ki, biz ondan çox-çox əvvəl bələdiyyə rəhbərliyi ilə müqavilə bağladığımıza görə, müəyyən sənədləri də əldə edə bilmişdik.
Faciəli hal o oldu ki, guya biz həmin torpaq sahələrini qanunsuz zəbt etmişik deyə, qarşı tərəf Zərdab rayon Məhkəməsində iddia qaldırdı və iddia tələbində, bizim oradan çıxarılmağımızı əsas şərt olaraq qeyd etdi. Prosesi diqqətdə saxlayan Zərdab rayon Məhkəməsinin sədri Tahir Qubadov isə, hansısa maraqlar çərçivəsində qarşı tərəfin xeyrinə qətnamə çıxarılmasını təmin etdirdi. Elə ki, çıxarılmış qətnamə ilə razılaşmadıq və apellyasya şikayəti vermək qərarına gəldik, o zaman bizə qarşı növbəti “oyun qurdular”. Yəni, Zərdab rayon Məhkəməsinin 13 may 2016-cı il tarixli qətnaməsindən apellyasiya şikayəti vermək hüququmuzun məhdudlaşdırılması üçün, həyat yoldaşımı 16 may 2016-cı il tarixdə şərləyib 20 günlük inzibati qaydada həbs etdilər. Guya ki, həyat yoldaşım Tofiq Abdullayevin çobanına qarşı hansısa xuliqanlıq edib.
Həyat yoldaşımın həbsindən sonra belə bir məlumat əldə etdik ki, Sarənc Mehdiyevi Tahir Qubadovun tapşırığı ilə həbs ediblər ki, çıxarılmış saxta qətnamədən apellyasiya şikayəti verə bilməyək. Həyat yoldaşım həbsdən çıxdıqdan sonra, qətnaməni və lazımi sənədləri ona vəkillik edən Əlayif Həsənova verdi. O isə, qarşı tərəfdən pul alaraq bizi aldada bildi və bu gün-sabah apellyasiya şikayətini verəcəyəm deməklə, vaxtı ötürdü. Belə bir səbəb üzündən də, apellyasiya şikayəti vermək mümkün olmadı. Apellyasiya şikayətinin verilməsi üçün vaxtın keçməsini əsas gətirib, etdiyimiz şikayəti əsassız hesab etdilər. Beləliklə, bir ailənin uzun müddətdən bəri yaşadığı evin əldən alınması üçün, saxtakarlıqla çıxarılmış məhkəmə qətnaməsi qanunu qüvvəyə mindi. Çox keçmədi ki, Zərdab rayon icra şöbəsinin əməkdaşları və polislər, saxta yolla çıxarılmış qətnaməni əsas tutaraq, bizi yaşadığımız evdən çıxartdılar. Ailə üzvlərimizə qarşı göstərdikləri zorakılıqlar qalsın bir yana, hətta evimizin həyətində yerləşən mal-qoyun tövləsini, toyuq hinini və tualeti də dağıtdılar. Hal-hazırda biz çöllük bir ərazidə at arabasının içərisində yaşayırıq. Biz mal-qoyun, toyuq-cücə saxlayıb ailəmizi birtəhər dolandırıdıq. Bu il beş hektar pambıq əkmişdik, indi olub-qalan təsərrüfatımız altüst edilib.Bu cür haqsızlığı, bu cür haramçılığı o böyük Allah-Təala da götürməz. Bütün bu faciələri bizim ailənin başına icra başçısı Lütvəli Babayev, məhkəmənin sədri Tahir Qubadov və Məlikmudlu bələdiyyəsinin sədri gətirdi.
Bəli, saxta icarə müqaviləsi qanunu sənədlərimizi rüşvət hesabına üstələdi.Tofiq Abdullayev uzun müddət müxtəlif vəzifələrdə çalışıb və o, ötən müddət ərzində hədsiz saxtakarlıqla qol qoymaqla, böyük torpaq sahələrinə də sahib olub. Bu gün o, Məlikmudlu bələdiyyəsi ilə 15 hektarlıq torpaq sahəsinə dair icarə müqaviləsi bağlasa da, əslində qanunsuz olaraq 60 hektar torpaq sahəsində yonca əkdirib. İndi isə onun satışı ilə məşğuldur. Həmin sahələrdə pambıq əkilməsi zəruri olsa da, o, həmin ərazilərə yonca əkdirib.
Bələdiyyə sədri əldə etdiyi gəlirləri vergi orqanlarından gizlətmək üçün, icarə müqaviləsində saxtakarlıq edib və 60 hektarlıq sahəni 15 hektar adı altında sənədləşdirib. 2016-cı ildə ölkə rəhbəri cənab İlham Əliyev Zərdab rayonuna etdiyi səfər zamanı, biz şikayət etməyək deyə, icra başçısı Lütvəli Babayevin tapşırığı əsasında məni və həyat yoldaşımı səhərdən-axşama kimi Zərdab rayon Polis Şöbəsinin təcridxanaslnda qanunsuz olaraq saxladılar. Onu da qeyd edim ki, bizə əmlak payı olaraq verilmiş ev çiy kərpicdən tikilmişdi və yaşayış üçün az-çox şəraiti var idi. Gəlib həmin evə baxan hər kəs, bizim ailəyə qarşı edilən haqsızlığa görə, yəqin ki, vəzifəli şəxslərə nifrət edər və onları ittiham etməkdən də çəkinməz.
Biz zəhmətkeş və kasıb insanlarıq. Artıq ümüdimizi o böyük Allaha-Təalaya, hər zaman kasıb və sadə insanların yanında olan, onların problemləri ilə daim maraqlanan və həlli istiqamətində lazımi tapşırıqlarını verən cənab İlham Əliyevə, həmçinin Mehriban xanım Əliyevayadır. Bu gün ölkə rəhbərinə və onun xanımına mətbuat vasitəsi müraciət edərək xahişimi çatdırıram ki, bizim ailəyə qarşı edilmiş özbaşınalığın, haqsızlığın, qanunsuzluğun araşdırılılması üçün, belə bir işlərə qol qoyan vəzifə sahibləri barəsində qanunu tədbirlərin görülməsi üçün, aidiyyəti qurumlara lazımi tapşırıqlarınızı verəsiniz. Bizim ailənin əlindən zorla, qanunsuz yolla alınmış evimizin özümüzə qaytarılmasına köməklik göstərəsiniz”.
Bu bir ailənin faciəsi, üz-üzə qaldıqları problemlərin varlığıdır. İnanırıq ki, bu açıqlamanın dərci Mehdiyevagilin ailə üzvlərinə məxsus problemlərin həlli ilə də nəticələnəcək. Açıqlamada adı çəkilən hər kəsin mövqeyini dinləyə bilərik. Mövzu diqqətimizdədir.

Mirzə
"Gündəm Xəbər"