İmişli məhkəməsinin sədri nədən oliqarxı və baş redaktoru müdafiə edir?

İmişli şəhəri, Sevil Qazıyeva küçəsi, 6 ünvanında yaşayan Azərbaycan Jurnalistlər Birliyinin üzvü, 21 kitab müəllifi Usub Usubov (Yusif Cəfərli) Azərbaycan Prezidenti İlham Əliyevə müraciət edib. O, müraciətin surətini Ədliyyə Nazirliyi Məhkəmə-Hüquq Şurasına, Milli Məclis sədrinin 1-ci müavini, Məhkəmə-Hüquq Şurasının Ziyafət Əsgərova da ünvanlayıb. Redaksiyamıza daxil olan müraciətdə Usub Usubov bildirir ki, Bakı şəhəri, 529-cu məhəllədə yerləşən “Azərbaycan" nəşriyyatında fəaliyyət göstərən, əslində isə İmişlidə yalnız bir-iki oliqarx-məmur və yaşadığı rayonun bir neçə kəndində yaşayan şer yazan bir neçə nəfərə xidmət göstərən “Həqiqət və reallıq” qəzetinin baş redaktoru İsrafil Quliyev onun haqqında adıçəkilən qəzetin 17 iyul və 15 avqust 2017-ci il tarixli saylarında böhtan, yalan dolu yazılar yazıb. Şikayıtçi həmin yazılarda şərəf və ləyaqətinin təhqir edildiyini bildirib: “Həqiqət və reallıq” qəzetinin baş redaktoru İsrafil Quliyev barəmdə bu cür yazıları davam etdirəcəyini bildirib. Mənə böhtan atdığına, şərəf və ləyaqətimi təhqir etdiyinə görə İmişli rayon məhkəməsində həm mülkü, həm də xüsusi ittiham qaydasında iddia qaldırmışam. İddiamda Cinayət Məcəlləsinin 147.1 və 148-ci maddələrində nəzərdə tutulan cinayət əməllərini törətdiyinə görə onun məsuliyyətinə cəlb edilməsini xahiş etmişdim. Lakin İmişli rayon Məhkəməsinin sədri Qurban Hacıyevin təkidi nəticəsində Ülvi Qənbərov mənim şikayətimi icraata belə götürmədi".

Şikayətçi Usub Usubov bildiri ki, Məhkəmə sədri Qurban Hacıyev bilərəkdən onun iddia ərizələrini ayrı-ayrı hakimlərə verib: "Mülkü üzrə iş müraciətim İmişliyə yeni təyin olunmuş hakim Aqşin Əfəndiyevin icraatına verilmişdi. 29.08.2017-ci il tarixdə Aqşin Əfəndiyev məndən tələb etdi ki, xüsusi ittiham qaydasında Ülvi Qənbərov tərəfindən icraata götürülməyən işdən apelyasiya şikayəti verməkdən imtina edim. Dedi ki, yalnız bundan sonra sənin iddiana baxaram. Bu tələbin qarşısında daha İmişlinin 3 hakimindən heç birinə sözüm yoxdur. Bunlar mənə illər uzunu baxdığım “Üç muşketyor” filminin qəhrəmanlarını, eləcə də adını çəkərkən, varlığımı sarsıdan, qəlbimi üşüdən “Həqiqət və reallıq” qəzetinin redaktoru və daimi ona müsahibələr verən məmur-oliqarxı xatırlatdı. Artıq hesab edirəm ki, mülki iddiaya baxmaqdan imtina edən hakim Aqşin Əfəndiyev də İmişli rayon Məhkəməsinin sədri Qurban Hacıyevin təsiri altına düşüb".

Şikayətçi yazır ki, “Həqiqət və reallıq” qəzetinin 24 aprel-20 may 2017-ci il tarixli sayında İmişlidəki məmur-oliqarxın ifadəsini başlığa çıxaran baş redaktor İsrafil Quliyevi müdafiə edən şəxsin (Məhkəmə sədri nəzərdə tutulur- red.) qarşısında acizəm: "İmişlidəki Şəhidlər Xiyabanının yenidən qurulması işində öz fəaliyyəti barədə müsahibə verən məmur-oliqarx əslində yazıda şəkli verilmiş 1941-45-ci illər Böyük Vətən Müharibəsində həlak olanlara qurulmuş abidənin arxa tərəfində şəklə düşmüş onlarca şam ağaclarını kəsdirən, hasarı sökdürən və guya yasxana tikdirməyi planlaşdırdan şəxsdir. Hətta orada 5-6 kubik daşı hündürlüyündə tikinti işləri apartdırıb. Şəhidlər Xiyabanının və 1941-45-ci il müharibəsi qurbanlarının xatirəsinə həsr olunmuş xatirə kompleksi ətrafındakı bu özbaşınalığa görə Yalavac kəndi və rayon ziyalıları mitinq keçirdilər. Bu mitinqdən sonra icra başçısı Vilyam Hacıyevin göstərişi ilə tikinti söküldü və 20-dək şam ağacı məhv oldu. Ekologiya İdarəsinin rəhbərliyi isə susdu. Yaddaşım məni aldatmırsa, Şəhidlər Xiyabanının baş daşlarını və qəbirüstü mərmərlərini Əlif adlı bir sahibkar düzəltdirmişdi. Amma “Həqiqət və reallıq” qəzetinin baş redakrotu unudur ki, onun dostu İmişli rayon icra hakimiyyətinin başçısının müavini olarkən başqa bir parkı satmaq üçün satılan parkdan 3 hektarını Şəhidlər Xiyabanına köçürülmüş və adını da "Mədəniyyət və Turizm Nazirliyinin istirahət parkının filialı" adlandırmışdı. “Həqiqət və reallıq” qəzeti öz səslərini o vaxt ucaltmalı idi. Ancaq bu qəzət indi mənə böhtan atır, yazdığım 300 səhifəlik “İmişlinin şəhid oğulları” kitabıma lağ edir. Şəhidlər haqqında yazdığım ağrılı-acılı ifadələrimi təhrif edir. Hesab edirəm ki, bu tək mənə yox, şəhidlərimizin ruhuna hörmətsizlikdir".

Usub Usubov daha sonra yazır: "Mən qışda 40 dərəcə şaxtada qapı-qapı düşüb şəhidlərimizin ailələri ilə görüşmüşəm. Onların müəllim kollektivlərindən müsahibələr götürmüşəm. Şəkillərini əldə etmişəm, hər biri haqqında sənədli oçerklər yazmışam. Kitab artıq sevilib, haqqında heç bir tənqidi fikir söylənməyib, evlərdə yadigar olaraq saxlanılır. Bu ahıl yaşımda belə böhtanla üzləşməyim, İmişlidə şagirdlərimin, evdə ailəmin qarşısında aciz duruma salınmağım o demək deyildir ki, mən şərəf və ləyaqətimi qoruya bilməyəcəyəm. “Həqiqət və reallıq” qəzetinin baş redaktoru İsrafil Quliyevi orda-burda fəxrlə danışır ki, mənim o cür arxa-dayağım var, heç kəs mənə "gözün üstə qaşın var" deyə bilməz. Ancaq mən bütün varlığımla inanıram ki, mənə atılan böhtanın cavabını mənim ölkəmin qanunları verəcək. Mənə qarşı qoçuluq edirlər. Bilmirlər ki, hər bir qoçun axırı qurbanlıqdır. Mən , “Həqiqət və reallıq” qəzetinin baş redaktoru İsrafil Quliyevin arxa-dayaq bildiyi oliqarxla üz-üzə gəlməkdən çəkinirəm. O, mühasibələrinin birində “Çox təəssüf ediləsi haldır ki, İmişlidə barmaqla sayılacaq imişlililəri sevməyən, öz şəxsi mənafelərini ümumi mənafedən üstün tutaraq BAŞÇIYA quyruq bulayan 5-6 nəfər şərəfsiz dəstə var. Mənim amalım o şərəfsizləri İmişlidən qovmaqdır” deyib. Əziz rəhbərlərim! Mən bu sözlərin sahibi “Həqiqət və reallıq”ın baş redaktoru İsrafil Quliyevə İmişli məhkəməsində qurulmuş məzhəkədə qalib ola bilərdimmi?"
Şikayətçi müraciətinin sonunda ölkə rəhbərliyinə xitabən yazır: " Bir daha sizdən xahiş edirəm ki, məni qəbul edəsiniz. Şərəf və ləyaqətimin alçaldılmasının, mənə atılmış böhtanın, yalanın cavabının qanunlarımız çərçivəsində verilməsinə köməklik göstərəsiniz".

Rahib Bəxtiyarov
gundemxeber.az