İlham Əliyevi Qərblə düşmən və Azərbaycanı dünyadan izolyasiya etmək istəyən qüvvələr səfərbər olunub

İqtidardakı ruspərəstlər seçkiqabağı ölkəni Avropa Şurasından çıxarmaq, Qərbdən qoparıb Kremlin iti dişləri arasına vermək üçün dəridən-qabıqdan çıxır
Azərbaycanda hakimiyyət yeknəsəq deyil. İqtidarın 24 il ərzində kök atmış qolları, qanadları var. Onlar zaman-zaman iqtidar içində ən güclü mövqeyə sahiblənmək uğrunda mübarizə aparıblar.
Siyasi separatizm və anti-Qərbçilər
“Gündəm Xəbər”in məlumatına görə, bu gün də hakimiyyətdaxili çəkişmələr müxtəlif sferalarda müşahidə olunur və getdikcə dərinləşir. Qruplaşma maraqlarının doğurduğu konfliktlər həmişə vahid komandanı parçalayır və zəiflədir.

Bu da onu deməyə əsas verir ki, hal-hazırda siyasi hakimiyyətdə təmsil olunan elə vəzifə sahibi var ki, həmin şəxsin uzanan əlləri əksər media qurumlarını lazımınca idarə edir. Bir nüans da var ki, həmin şəxs konfliktdə olduğu, xoşu gəlməyən vəzifə sahiblərini təsir dairəsində saxladığı media qurumlarının vasitəsilə tənqid atəşinə tutdurur və onların barəsində xoşagəlməz açıqlamalar da dərc etdirir. Belə olan halda tərəflər arasında yaşanan qarşıdurma “pik nöqtə”yə çatır ki, bu da hakimiyyətin dayaqlarının tədricən sarslması ilə nəticələnir.

Azərbaycan hakimiyyətində isə siyasi separatçılıq edən və öz ambisiyalarını siyasi sistemin, dövlətin və iqtidarın maraqlarından üstün tutan “5-ci kolon” şəbəkəsi var.
Onlar Rusiyanın Azərbaycanda əbədi təsiri üçün dəridən-qabıqdan çıxıblar, seçkinin taleyini Kremlin divarları arasında həll ediblər, ölkəni Avroatlantik məkana inteqrasiya siyasətində tormozlayıblar.
Ötən prezident seçkilərində də “rus projesi” Rusiya hərbi donanmasının Bakı buxtasına gəldiyi günə qədər gerçəkləşirdi. Putin Xəzərin Bakı sahillərinə gələr-gəlməz iqtidar daxilindəki “5-ci kolon” az qala əldə gül-çiçək onu qarşılamağa hazır idi.
2018-ci il prezident seçkilərinə də 1 ildən bir az artıq vaxt qalır. Hakimiyyət içindəki anti-Qərbçilər, ruspərəstlər müxtəlif siyasi şantajlara, iqtisadi sabotajlara əl atırlar.
Eləcə də siyasi həbsləri gerçəkləşdirirlər, rəsmi Bakı ilə Avropanın münasibətlərini pisləşdirirlər və Moskvaya yaxınlaşdırmaq üçün səfərbər olublar.
İqtidarın 2018-ci ildən sonra götürəcəyi strateji kurs və xarici siyasət xəttində Kreml qırmızı xətt kimi keçə bilər. Çünki “5-ci kolon” Qərbin yox, Moskvanın Azərbaycanda təsirlərinin güclənməsində maraqlıdırlar.
İqtidar içində Qərbi riyakarlıqda ittiham edən, Avropa Şurası kimə və nəyə lazımdır deyən, Qərbmeyilli jurnalist Mehman Əliyev həbs olunan zaman bir cümləlik olsun belə reaksiya verməyən Prezident Administrasiyasının İctimai-Siyasi şöbəsi, hazırda Azərbaycanı ustalıqla dünyadan izolyasiya etmək yolunu tutub ki, bu da olduqca təhlükəli məqamlardan xəbər verir.
Onlar eyni sözləri Rusiya hökuməti və Azərbaycanın Qarabağ problemini əlində açar saxlayan Moskva dairələri haqda deyə bilmirlər.
Hətta Ümumrusiya Azərbaycanlılar Konqresi (ÜAK) ləğv olunanda bunu Moskvadakı erməni dairələrinin üstünə atdılar. Bu miflər isə ictimai rəydə sabun köpüyünə çevrildi.
Çünki Rusiya kimi hegemon dövlətdə ermənilərin Azərbaycan diasporasının qeydiyyatının ləğvinə nail olması ağlabatan deyil.
Rəsmi Bakının mövqeyini ifadə edən PA rəsmiləri və bəzi deputatlar ÜAK mövzusunda ehtiyatlı danışdığı halda, ABŞ Dövlət Departmenti rəhbəri Con Kerri olmazın sözlər deyir, Sorosu dələduz adlandırır, AŞ-nı riyakar adlandırır, ayrı-ayrı Qərb dairələrini, rəsmilərini açıq şəkildə ittiham edir.
Nədənsə, Lavrov, Şoyqu, hətta Mariya Zaxarova barəsində eyni dozada sərt danışmırlar. Bu da öz növbəsində hakimiyyət içindəki “5-ci kolon”un Rusiyanın çətiri altında Qərbi hakimiyyətin üstünə qaldırmaq texnologiyasıdır.
Ancaq iqtidar mənsubları arasında bəziləri “5-ci kolon” deyərkən Qərbi işarə verirlər və Avropaya xidmət edən şəbəkəni nəzərdə tuturlar.
Məsələn, prezidentin İctimai-siyasi məsələlər üzrə köməkçisi Əli Həsənov 2014-cü ildə həbs edilən “Seçkilərin Monitorinqi və Demokratiyanın Tədrisi” adlı qurumun rəhbəri Anar Məmmədlinin AŞPA tərəfindən “Vatslav Havel” Sülh Mükafatının qalibi elan olunmasına və digər QHT rəhbərlərinin həbsinə belə demişdi:
“Belə addımlar ilk növbədə müəyyən xarici dairələr tərəfindən maliyyələşdirilən, onların sifarişlərini yerinə yetirən və dövlətin müstəqil siyasətinə təsir vasitəsi rolunu oynayan “5-ci kolon”u qorumaq məqsədi güdür.
Eyni zamanda, hüquq müdafiəsi adı altında fəaliyyət göstərən müxtəlif xarici təşkilatların heç də müstəqil olmadıqlarını və konkret tapşırıqlar icra etdiklərini açıq göstərir”.
Yəni, “5-ci kolon”u Avropada axtarırlar və əlaltılarının QHT sektorunda olduğunu hesab edirlər.
Hərçənd, “5-ci kolon” anlayışı həm Avropa, həm Rusiya üçün qüvvədə olsa da, faktiki ölkənin siyasətinə diktə və təsiredən heç də Qərbin deyil, Moskvanın hakimiyyət içinə soxulmuş “5-ci kolon”udur.
Azərbaycana Qərbdən gələn təzyiqlərin çoxalmasını körükləyən qüvvələr də məhz ruspərəstlərdir.
İsa Qəmbər, “Quska”, Fərhad Əhmədov?
“Gündəm Xəbər”in məlumatına görə, seçkiqabağı Kremlin Azərbaycana namizəd hazırladığı haqda iddialar var.
Yəhudi əsilli deputat Yevda Abramov da Moskvanın siyasi mətbəxində növbəti namizəd hazırlandığını qeyd eləmişdi.
Bu sürpriz adın kim olacağı hələ ki, mübhəm olaraq qalır. Görünən budur ki, indidən Qərbmeyilli siyasətçilər vitrinə çıxmağa başlayıblar.
Həm Vaşinqtonda olan keçmiş spiker Rəsul Quliyev, həm Almaniyada olan sabiq deputat Hüseyn Abdullayev, həm də Müsavatın eks başqanı İsa Qəmbər prezidnetliyə namizədliyini irəli sürüblər.
Hər üç tanınmış adlar ölkədə Qərb siyasətinin və liberal iqtisadiyyatın tərəfdarıdırlar. Müsavat Avropa Birliyi ilə yaxınlığı strateji yol olaraq görür.
Yəni, hakim Yeni Azərbaycan Partiyası namizədini elan etməmiş artıq Qərbpərəst namizədlərdən üçü məlumdur. İndi gözlər Rusiyadadır və Kremlin hansı namizədi qabağa verəcəyi gözlənilir.
Bir neçə həftə öncə azərbaycanlı milyarder Fərhad Əhmədovun Azərbaycan vətəndaşlığı üçün müraciəti və seçkilərdə iştirak istəyini elan etməsi böyük maraqla qarşılandı.
Rüstəm İbrahimbəyovdan sonra oliqarx-milyarderin dövriyyəyə buraxıldığı güman edilirdi. Hələlik F.Əhmədov tam de-şifrə olunmayıb və bütün kartlar açılmayıb.
Bir müddət əvvəl Azərbaycan vətəndaşı olmaq üçün müraciət edən milyarderin qəflətən Azərbaycandakı biznesini bağlaması ciddi suallar yaradıb.
Ancaq seçkilərə sayılı aylar yaxınlaşdıqca kartlar bir-bir açılacaq – həm Qərb, həm Rusiya tərəfindən...
Hətta keçmiş iqtisadi inkişaf naziri Fərhad Əliyevin ekstra namizədliyi qovluqda saxlanır. Bütün bunlar seçki poliqonunda supergüclərin toqquşması ehtimalını gücləndirir.
Əlbəttə ki, Rusiya Qərbin namizədləri önündə susqunluq nümayiş etdirməyəcək və “5-ci kolon” Moskvadan gələcək təlimatı can-başla yerinə yetirməyə hazırdır.
Onlar 1994-cü ildən iqtidarı bölüşdürən qüvvələrdir ki, bu gün köhnə ssenariləri işə salırlar.
AŞ kimə və ordan çıxmaq kimə lazımdır?
Deputat Qüdrət Həsənquliyev də açıq şəkildə danışmışdı. O, hökumətə tövsiyə etdi - Qərbdən təzyiqlərin azalmasını istəyirsizsə siyasi məhbusları azad edin.
Çünki hakimiyyətin Qərblə münasibətlərini korlayan, siyasi məhbusların çoxalmasını təşkil edən, Avropadan təzyiqlərin gəlməsinə şərait yaradan da məhz “5-ci kolon”dur.
Rusiyanın iqtidar içindəki siyasi qanadı seçkiqabağı var gücü ilə İlham Əliyevi şantaj etməkdədir.
Bir tərəfdən Fransa İctimai televiziyası, “Guardian” qəzeti, ABŞ-dan “Vaşinqton Post” qəzeti Azərbaycan hakimiyyətini “topa tutmaq”da idi.
Hakimiyyətdəki “5-ci kolon” hələ ki, öz muradına çatmaqdadır. Qərbi Əliyevin üstünə qaldıran ruspərəstlər seçkiqabağı gərginliyə səbəb olublar.
Qərblə münasibətləri yenicə mehribanlaşdıran Əliyev əvvəlcə Kremldən ÜAK-ın ləğvi və s. təzyiqlərlə qarşılaşdı, ardınca iqtidarın köhnə qanadı M.Əliyevi həbs elədi, bununla da ABŞ və Avropa ilə əlaqələr yenə korlandı, nüfuzlu nəşrlər yazılar çap etməyə başladılar.
Moskva və onun Bakıdakı “donanma”sı Əliyevin dünya ilə yaxınlaşmasına imkan vermir. İndi də ölkənin Avropa Şurası üzvlüyündən çıxarılması müzakirə olunur.
AŞ PA nümayəndə heyətinin rəhbəri Səməd Seyidov isə prosesləri aciz şəkildə izləməkdədir.
Azərbaycanı 2018 seçkiləri ərəfəsində AŞ-dan qopartmaq və bununla Rusiyanın iri dişləri arasına vermək kimlərə sərf edir? - “5-ci kolon”a...
İslahatlara hamilə ölkə
Ümumiyyətlə, hazırda Azərbaycan hakimiyyətinin özü monolit, yekdil deyl. Bunların içərisində Qərbə inteqrasiya və inkişaf tərəfdarı olanlar da yox deyil. Ancaq çox təəssüf ki, bu insanların sayı məhduddur.
Əksinə, Azərbaycan hakimiyyətində mühafizəkar qanad, xüsusilə də Rusiyanın “5-ci kolon”una rəhbərlik edən, onun üzvü olan insanların sayı daha çoxdur.
Hansı ki, onlar bu gün avtoritarlığın nüvəsi olan Rusiya idarəetmə modelini Azərbaycanda ciddi surətdə həm müdafiə, həm də bərqərar edirlər. Bu gün problem məhz bu şəbəkədən gəlir.
Bu cür neqativ hadisələri ortadan qaldırmaq üçün həm iqtisadi, həm də siyasi yöndə ciddi islahatlara başlamaq lazımdır.
Bunun müqabilində Azərbaycan dövləti tədricən demokratikləşər və bu cür gənclərə, demokratik insanlara təzyiqlərin də sayı getdikcə azalar.
Hakimiyyətdə maraqlı şəbəkələr var ki, onlar cəmiyyətdə bu cür qorxu, xof hissinin yaradılmasına, qütbləşmənin çox olmasına çalışırlar.
Çünki bu cür antoqonizm və qütbləşmə olduqca, hakimiyyətdə həmin şəbəkəyə ehtiyac da çoxalır. Onlar bu mühitdə özlərini daha rahat hiss edirlər.
Amma təbii ki, bu da Azərbaycan prezidentinin beynəlxalq rəydə nüfuzuna ciddi surətdə zərbə vurur.
Ona görə, prezident bu məsələdə maraqlı deyil. Əksinə, prezident ölkədə islahatların keçirilməsindən yana olan bir şəxsdir.
Və son zamanlar elan olunan strateji yol xəritələrinin beynəlxalq mütəxəssislərlə birgə hazırlanması da göstərir ki, cəmiyyət bu cür islahatlara çoxdan hamilədir, buna ehtiyac var və bu da təbii ki, bilavasitə prezidentin iradəsi ilə ortadadır.
Ancaq bunu istəməyən qüvvələr də var. Hansı ki, bu şəbəkə cəmiyyətdə qorxu, xof mühitinin qorunmasında maraqlıdır.

Zöhrab Təmrazov
gundemxeber.az