Cəlil Xəlilov təşkilata məxsus torpağı sataraq 1,2 milyon manatı mənimsəyib

Respublika Veteranlar Təşkilatının beynəlxalq əlaqələr və xalqlar arasında dostluq daimi komissiyasının sədri, ehtiyatda olan ədliyyə polkovnik-leytenantı Abbasov Zahiddin Hümbət oğlu bu təşkilatda korrupsiya hallarının baş alıb getməsindən narazıdır. O, bununla bağlı "Gündəm Xəbər"ə şikayət ərizəsi ünvanlayıb.
Zahiddin Abbasov ərizəsində bildirir ki, bu il sentyabr ayının əvvəllərində Respublika Veteranlar Təşkilatının daxili komissiyası tərəfindən Təşkilatın sədri vəzifəsini icra edən Cəlil Xəlilovun sənədləri saxtalaşdırmaq yolu ilə külli-miqdarda maliyyə vəsaitini mənimsədiyi aşkar edilib. Onun bildirdiyinə görə, komissiyanın araşdırması zamanı müəyyən edilib ki, Cəlil Xəlilov 2016-cı ilin sentyabrında Moskva şəhərinə ezamiyyə ilə əlaqədar sənədləri saxtalaşdıraraq 2320 (iki min üç yüz iyirmi) manat, 2017-ci ilin aprelində Kiyev şəhərinə saxta dəvətnamə tərtib etməklə 1000 (min) manat, 2017-ci ilin mayın 9-da öz əli ilə saxta hesab-faktura yazaraq, Müdafiə Nazirliyinin Böyük Vətən Müharibəsi iştirakçıları üçün bütün xərcləri öz üzərinə götürməklə, təşkil etdiyi ziyafətə guya xərcləmək adı altında 2600 (iki min altı yüz) manat vəsaiti mənimsəyib.

Ancaq bu hələ hamısı deyil. Cəlil Xəlilov istifadəsində olan 10-PK-888 dövlət qeydiyyat nişanı olan avtomobillə guya yol hərəkəti qaydalarını pozduğuna dair də saxta sənədlər təşkil edib. O, guya cəriməni ödəmək adı ilə dövlət büdcəsindən təşkilata ayrılan daha 1000 (min) manat məbləğində pul vəsaitini mənimsəyib.
Zahiddin Abbasov daha sonra bildirir ki,
Cəlil Xəlilov Veteranlar Təşkilatına mənsub əmlakı satmaqla daha böyük özbaşınalığa və vəzifə cinayətinə yol verib: "O, 2014-cü ildə ləğv edilmiş Bakı Şəhər Veteranlar Təşkilatının şəhərin mərkəzində - Üzeyir Hacıbəyli küçəsi, 16 nömrəli ünvanda 3,5 sot torpaq sahəsində yerləşən, qiyməti 1.200.000 (bir milyon iki yüz min) manat olan inzibati binasını da özəlləşdirərək satıb: "Halbuki Veteranlar Təşkilatının 2014-cü ildə təsdiq edilmiş Nizamnaməsinin IV fəslinin 4.9 bəndində (səh.6) yazıldığı kimi, “Respublika Veteranlar Təşkilatı Plenumunun qərarı olmadan qeyd edilən əmlakların özgəninkiləşdirilməsi (satılması, bağışlanması, icarəyə verilməsi və s.) qadağandır”.
Onu da qeyd etmək lazımdır ki, bu alqı-satqı əməliyyatından əldə edilən pul vəsaitindən Təşkilatın bankdakı hesabına cəmi 70.000 (yetmiş min) manat köçürülüb, yerdə qalan yüz minlərlə manat pul mənimsənilib".

Zahiddin Abbasov qeyd edir ki, Azərbaycan Dövlətinin Korrupsiyaya Qarşı Mübarizə Proqramını qəbul etdiyi bir dövrdə dövlət büdcəsindən ayrılan vəsait hesabına fəaliyyət göstərən, ölkənin ən böyük ictimai təşkilatında korrupsiya hallarının baş verməsi böyük bir biabırçılıqdır: "Axı, gənclərimizin vətənpərvərlik ruhunda tərbiyəsi işi bu təşkilatın ən başlıca vəzifəsidir! Bu biabırçılıqdan sonra təşkilatın əməkdaşları, yaxud vəzifə cinayəti törətmiş sədr müavini Cəlil Xəlilov gənclərə hansı mənəviyyatdan, hansı dəyərlərdən danışacaq? Buna onların, xüsusilə Cəlil Xəlilovun mənəvi haqqı çatacaqmı? Vəzifəsindən sui-istifadə edərək Veteranlar Təşkilatının 1 milyondan artıq pulunu mənimsəyən, pay-püşk edən bir şəxs nə vaxta qədər rəhbər vəzifədə qalacaq? Bu natəmiz adama havadarlıq edənlərin vicdanı buna necə yol verir? Respublika Veteranlar Təşkilatında baş vermiş və veteranların müzakirə mövzusuna çevrilmiş bu biabırçılıqlara, korrupsiya hallarına nəhayət, son qoyulmağın vaxtı çatmayıbmı?"
"Gündəm Xəbər" olaraq, ümid edirik ki, aidiyyəti qurumlar yazıda qeyd olunan faktlarla bağlı araşdırma aparacaq və müvafiq tədbirlər görüləcəkdir.

Samir
"Gündəm Xəbər"