Nazirin qohumlarının adına rəsmiləşdirdiyi obyektlərin siyahısı

Azərbaycanda hakimiyyətin önəmli fiqurları olan iri ranqlı məmurlar həm də geniş biznes strukturlarına və nəzarət imkanlarına malikdirlər. Bu, heç kimə sirr deyil. Vəzifə kürsüsündə mövqelərini möhkəmləndirdikcə onlar ayrı-ayrı sahələrə nəzarəti tamamilə əllərinə keçirərək nəhəng biznes imperiyası formalaşdırırlar. Ölkədə ən dəbdə olan ifadələrdən birinin də “məmur oliqarxlar” olması heç də təsadüfdən yaranmayıb. Bu gün üzdə olan bütün böyük biznes qurumların demək olar ki, mütləq əksəriyyətinin ayrı-ayrı məmurların nəzarətində olması şübhə doğurmur.
Ölkənin bu sahədə öndə gedən fiqurları içərisində Vergilər naziri Fazil Məmmədovun xüsusi çəkisi vardır. Dövlətin ən mühüm sahələrindən birinə rəhbərlik etməsinin ona qazandırdığı geniş imkanlar son nəticədə böyük bir biznes imperiyasının formalaşmasına səbəb olub. Xüsusilə özəl sektora təsir imkanlarının böyük olması nazirə bütün sahələrdə fəaliyyət göstərmək üçün şərait yaradıb.
Sirr deyil ki, ölkənin əksər bölgələri iri məmurlar arasında bölüşdürülüb və zaman-zaman nüfuz dairəsinin genişlənməsi üçün oliqarxlar arasında mübarizə şiddətlənir.
Fazil Məmmədov da hakimiyyət daxili əlaqələrindən istifadə edərək ölkənin qərb regionlarında və bir neçə digər bölgələrdə özünə yaxın kadrları yerləşdirməklə nəzarəti ələ keçirməyə müvəffəq olub.
Hazırda F.Məmmədov bir neçə rayonun icra hakimiyyətinin başçısı postuna öz adamlarını yerləşdirə bilib. Binəqədi rayon İcra Hakimiyyətinin başçısı Xaləddin İsgəndərov (sabiq vergi işçisi, nazirin yeznəsi) onlardan biridir.
Fazil Məmmədovun biznesi ilə bağlı “Gündəm Xəbər”ə yeni məlumatlar daxil olub. Bu məlumatlar Vergilər naziri Fazil Məmmədovun yaxınlarının və qohumlarının adına rəsmiləşdirdiyi bəzi müəssisələr haqqındadır. Həmin məlumatları təqdim edirik:

Sözügedən müəssisələrdən biri " Şəmkir-Quşçuluq" Məhdud Məsuliyyətli Cəmiyyətidir. Cəmiyyət Azərbaycan Respublikası Ədliyyə Nazirliyi Hüquqi şəxslərin Dövlət Qeydiyyatı üzrə Şəmkir Bölgə Şöbəsində 13 oktyabr 2005-ci il tarixdə 8/1-70 saylı şəhadətnamə ilə dövlət qeydiyyatına alınmışdır.
Müəssisənin hüquqi ünvanı Şəmkir rayonunun Yeni-həyat kəndində yerləşir. Müəssisənin nizamnamə kapitalı 2.800.000 AZN-dir. Müəssisənin təsisçisi Azərbaycan Respublikası Vergi Naziri Fazil Əsəd oğlu Məmmədovun doğma qardaşı Məmmədov Vaqif Əsəd oğlu olub. 08 yanvar 2004-cü il tarixdə Məmmədov Vaqif Əsəd oğlu "Şəmkir-Quşçuluq" Məhdud Məsuliyyətli Cəmiyyətindəki əmlak payını "Atasənaye" Məhdud Məsuliyyətli Cəmiyyətinə satıb.

Fazil Məmmədovun biznesinə daxil olan "Atasənaye" Məhdud Məsuliyyətli Cəmiyyəti isə 16 aprel 2003-cü il tarixdə 0103-P 11-37604 saylı şəhadətnamə ilə Azərbaycan Respublikası Ədliyyə Nazirliyi Hüquqi Şəxslərin Dövlət Qeydiyyatı üzrə Bakı Bölgə şöbəsində dövlət qeydiyyatına alınıb. Hüquqi ünvanı Bakı şəhəri Ş.Bədəlbəyli küçəsi, 102-də yerləşir. "Atasənaye" Məhdud Məsuliyyətli Cəmiyyətinin təsisçiləri - Azərbaycan Respublikası Ədliyyə Nazirliyi tərəfindən 23 iyul 2003-cü il tarixdə 1103-T3-3403 saylı şəhadətnamə ilə dövlət qeydiyyatına alınmış "AtaHoldinq" Açıq Səhmdar Cəmiyyəti və Azərbaycan Respublikası Ədliyyə Nazirliyi Hüquqi Şəxslərin Dövlət Qeydiyyatı üzrə Bakı Bölgə şöbəsi tərəfindən 28 mart 2003-cü il tarixdə 0103-P9-37499 saylı Şəhadətnamə ilə dövlət qeydiyyatına alınmış "Atainşaat" Məhdud Məsuliyyətli Cəmiyyətdir.

Fazil Məmmədovun nəzarətində olan. "Zəyəmkəndmaş" Açıq Səhmdar Cəmiyyəti 18 yanvar 2006-cı il tarixdə 0806-Ş2-547 saylı Şəhadətnamə ilə Azərbaycan Respublikası Ədliyyə Nazirliyi Hüquqi Şəxslərin Dövlət Qeydiyyatı üzrə Şəmkir Bölgə şöbəsində dövlət qeydiyyatına alınıb.
Hüquqi ünvanı, Şəmkir rayonu Zəyəm qəsəbəsi S.Vurğun küçəsi 24-dür. Nizamnamə kapitalı -305.246 AZN-dir. Əsas səhmdarlar - "AtaSənaye" Məhdud Məsuliyyətli Cəmiyyəti - 30,0826% və Neftçala şəhəri, məhəllə 7 ünvanında yaşayan Rəfiyev Mahir Əhmədağa oğludur - 58,9688%.

Nazirə məxsus olduğu bildiriln daha bir obyekt - "Şəmkir Ət-süd" Məhdud Məsuliyyətli Cəmiyyəti Azərbaycan Respublikası Ədliyyə Nazirliyi Hüquqi Şəxslərin Dövlət Qeydiyyatı üzrə Şəmkir Bölgə şöbəsi tərəfindən 11 avqust 2005-ci il tarixdə 0805-Ş-1-530 saylı şəhadətnamə ilə dövlət qeydiyyatına alınıb.
Müəssisənin hüquqi ünvanı - Şəmkir şəhər S.Vurğun küçəsi, 318-dir. Müəssisənin təsisçisi- "AtaSənaye" Məhdud Məsuliyyətli Cəmiyyətidir. Müəssisənin icraçı direktoru Vergilər nazirinin doğma qardaşı oğlu Gəncə şəhəri N.Nərmanov küçəsi döngə 9 ünvanında yaşayan Məmmədov Tamerlan Vaqif oğludur.

Bundan başqa "Yalta Meşə Ailəvi İstirahət Mərkəzi" Məhdud Məsuliyyətli Cəmiyyəti də Fazil Məmmədovun xeyir-duası ilə yaradılıb. Onun təsisçisi Şəmkir rayonu Dəllər-Cəyir kənd sakini Fazil Məmmədovun doğma əmisi oğlu Məmmədov Kamal Məmməd oğludir. Reyest nömrəsi: 0807-Ş4-589. 05.07.2007-ci il. Azərbaycan Respublikası Ədliyyə Nazirliyi Hüquqi Şəxslərin Dövlət Qeydiyyatı üzrə Şəmkir Bölgə şöbəsində qeydiyyata alınıb.

Bəhlul Orucoğlu
gundemxeber.az