Son günlər ölkə mediasının gündəmini zəbt edən mövzulardan biri də, çap mediası ilə bağlı əmələ gələn problemlərin varlığıdır.

Düzdür, son illərin ümumi mənzərəsinə diqqət yetirsək o halda hər kəsə bəlli olacaq ki, bizim ölkəmizdə də elektron media çap mediasını çoxdan üstələyib. Bəli, bunun nə qədər əhəmiyyətli olub-olmaması haqda bir söz deyə bilməsək də, deyəcəyimiz söz yalnız reallıqda olanlardır. Bütün bunlar qalsın bir yana. Hər kəsə gün təki aydındır ki, bu günə kimi çap mediasını yaşadan mətbu orqanlardan biri də “Gündəm Xəbər” qəzeti olub. Amma, son günlər özəl mətbələrdə əmələ gələn kütləvi kağız qıtlığı, məhz bu qəzetin də tarixin arxivinə qovuşmasına yollar açmaq üzrədir. Müxtəlif mənbələrdən redaksiyamıza daxil olan səhih məlumatlara görə, kağız qıtlığı ilə bağlı problemlərin əmələ gəlməsində maraqlı tərəf, məhz hakimiyyətin yüksək pilləsində əyləşən vəzifə sahibinin oynadığı rolun varlığıdır. Hər kəsə təəccüb gələn hal odur ki, müstəqil mətbu orqanların çoxu, o cümlədən “Gündəm Xəbər” qəzetinin də belə bir təhlükə ilə üz-üzə qalmasına baxmayaraq, iqtidaryönümlü mətbu nəşrlərlərin bu gün belə bir çətinliklərlə üz-üzə qalmasından söhbət belə gedə bilməz. Deməli, belə bir məsələlərdə hansısa “əmmalar” var ki, müstəqil mətbu orqanlar bu cür “acı tale”ni yaşamaqdadırlar.

Bundan əlavə, çoxsaylı oxucularımızın diqqətinə onu da çatdırmaq istəyirik ki, bir neçə gün bundan öncə, daha dəqiq desək 30 dekabr 2017-ci il tarixdə qəzetimizin eyni adlı gundemxeber.az saytına yüksək çinli vəzifə sahibi tərəfindən basqı edilir və saytımız bloklandığından ona giriş ölkədaxili məhdudlaşdırıldı. Əmələ gələn problemlə bağlı Nəqliyyat, Rabitə və Yüksək Texnologiyalar Naziri cənab Ramin Quluzadəyə rəsmi müraciət etsək də, hələlik ortada hər hansı nəticə yoxdur. Belə bir səbəb üzündən də, yenidən “org” variantını seçməyə məcbur olduq. Yəni, bundan sonra gundemxeber.az yazmaqla bizi izləyə biləcəksiniz. Bəli, belə bir addımın atılmasını biz müstəqil mediaya basqı hesab edirik və bu yöndə haqlı mübarizəmizi davam etdirməkdə israrlıyıq. Artıq üz-üzə qaldığımız problemlə bağlı Azərbaycan Respublikasının Prezidenti İlham Əliyev cənablarına müraciət etməyə hazırlaşırıq. Yəqin ki, cənab Prezident problemin mahiyyətinin araşdırılması üçün, bəzi vəzifə sahiblərinə müvafiq tapşırıqlarını verəcək.
Dəyərli oxucular! Diqqətinizə onu da çatdıraq ki, “Gündəm Xəbər” qəzeti kağız qıtlığı ilə üz-üzə qaldığından hələlik 08-15 yanvar 2018-ci il tarixdə satışda olmayacaq. Buna baxmayaraq, bizi hər zaman gundemxeber.az və facebook-da izləyə bilərsiniz.

“Gündəm Xəbər”