Nuşirəvan Məmmədov: “Həmin vaxtlarda ailə üzvlərimizə qarşı zorakı və fiziki addımlar atılan zaman, giriş qapımızdakı “darvaza dirəyi itgin salınır”

Bu da danılmaz bir həqiqətdir ki, hal-hazırda respublikamızın şəhər və rayonları içərisində daha çox sosial problemlər məngənəsində boğulan, vətəndaş hüquqları tapdaqlar altına atılan, baş verən digər qanunsuzluq əməllərinə görə adı məşhur olan rayonlardan birinin də, məhz Ağcabədi rayonu olduğu bildirilir. Bu haqda yerli sakinlərdən bəziləri iddialarını da irəli sürürlər. “Gündəm Xəbər” olaraq bu günə kimi redaksiyamıza adı çəkilən rayonun çoxsaylı sakinləri tərəfindən silsilə müraciətlər, şikayət ərizələri daxil olduğundan, bizim belə bir qənaətə gəlməyimizə kifayət qədər əsaslar da var. Onlar redaksiyamıza ünvanladıqları müraciətlərində Ağcabədidə hökm sürən süründürməçilik amillərinin varlığından, məmur özbaşınalığının tüğyan etməsindən, sosial problemlərin əndazəni aşmasından və digər qanunsuzluğa söykənən olayların varlığından bəhs edirlər. Təəssüf doğuran hal odur ki, ünvanlanan müraciətlər əsasında bu günə kimi neçə-neçə sakinlərin problemlərini ictimailəşdirsək də, aidiyyəti qurumları baş verənlərlə bağlı lazımınca məlumatlandırsaq da, məhz sakinlərə məxsus problemlərin çoxu hələ də həllini tapmır ki, tapmır. Məsələn, bir–iki gün bundan öncə “Gündəm Xəbər”in redaksiyasına əslən Ağcabədi şəhərindən olan və rayonun Həzi Aslanov küçəsi ev-224 ünvanında yaşayan Məmmədov Nuşirəvan Məhərrəm oğlu tərəfindən növbəti müraciəti daxil olub. Adı çəkilən şəxs ünvanladığı müraciətində yazır ki, “hazırda Ağcabədi şəhərinin küçələrində kanalizasiya xətləri çəkilməkdədir. Düzdür, bu gün qazıntı işləri bir neçə küçədə həyata keçirilir və belə bir səbəb üzündən də, şəhərin əksər küçələri tamamilə bərbad hala salınıb.

Bu cür vəziyyətin varlığına baxmayaraq, atılan addımlar yerli sakinlərdə xoş ovqat hissi də yaradır. Çünki, tezliklə qazılmış küçələrdə ərazilər tam qaydaya salınacaq, sakinlərin içməli su və digər əhəmiyyət kəsb edən problemləri həllini tapacaq. Bir qədər vaxt keçdikdən sonra isə, sakinlər çirkablı suların üfunət qoxuyan iyi ilə nəfəs almayacaqlar. Bəli, bütün bunlar hər kəsin rəğbətlə qarşıladığı istək və arzulardır ki, onlar da yavaş-yavaş həllini tapmaq üzrədir.
Bütün bunlarla bərabər kanalizasiya xətlərinin çəkilişi, hətta bizim 2012-ci ildən düşünüb-daşınmadığımız, ağlımıza belə gətirmədiyimiz mənzərə ilə üz-üzə qalmağımıza da səbəb oldu. Çünki, təqribən 2007-2008-ci illərdən qonşumuzla aramızda əmələ gələn problemlər, məhz mənim aidiyyəti qurumlara davamlı müraciətlər ünvanlamağıma da səbəb oldu. Təəssüf doğuran hal o oldu ki, üz-üzə qaldığımız problemlərlə bağlı Ağcabədi rayon Məhkəməsində keçirilən məhkəmə proseslərindən sonra, qərarın icrası məhkəmə icra şöbəsinə göndərilsə də, icra məmurlarının bitərəf mövqeləri yaşanan problemlərin üstünə yeni bir problemlər də gətirdi. Məslən, həmin vaxtlarda ailə üzvlərimizə qarşı zorakı və fiziki addımlar atılan zaman, giriş qapımızdakı “darvaza dirəyi itgin salınır”. Düzdür, “darvaza dirəyinin itgin salınması” ailə üzvülərimizdə müəyyən şübhələrin, müxtəlif versiyaların formalaşmasına səbəb olsa da, çox şükürlər olsun ki, 2017-ci ilin 22 dekabr günü bütün bunlara son qoyuldu. Yəni, təqdim olunan şəkillərdən də göründüyü kimi şəhərin H.Aslanov küçəsində, daha dəqiq desəm yaşadığımız evin ön hissəsinə yaxın ərazidə kanalizasiya xətlərinin çəkilişini həyata keçirənlər torpaq qatını qazan zaman, 21 iyun 2012-ci il tarixdən “itgin salınan darvaza dirəyi”ni tapırlar. Bizə məxsus “darvaza dirəyi”nin tapılması, bu gün də rayonda müəyyən söz-söhbətə səbəb olmaqdadır. Bu da onu söyləməyə əsas verir ki, belə bir problemlə bağlı 1005 (min beş) ədəddən çox aidiyyəti üzrə ərizə və şikayətlər ünvanlasam və onlar araşdırılması rayon prokuroluğuna göndərilsə belə, son anda Ağcabədi rayon prokuroru cənab Salman Səmədovun tabeçiliyində olan şəxslərin tapa bilmədikləri “itgin salınan darvaza dirəyi” sadə inşaatçılar tərəfindən tapıldı. Bu cür addımlar da onu söyləməyə əsas verir ki, onlar digər “itgin salınanları” da tapa bilərlər. Deməli növbəti dəfə sadə inşaatçılar rayon prokurorluğunun əməkdaşlarından fərqli olaraq bu cür tapıntıları təkrar aşkarlayarlarsa, o halda Ağcabədinin “qədimi şəhər” olması haqda bir kimsədə “şəkki-şübhə” qalmaz. Bu yöndə əldə etdiyimiz məlumatlardan bəlli oldu ki, 21 iyun 2012-ci il tarixdən bizə məxsus “darvaza dirəyi”nin itbata salınmasında, birbaşa Ağcabədi rayon Məhkəməsi İcra şöbəsinin rəhbəri Alıyev Gəray Seyrəddin oğlunun müstəsna xidməti, unudulması mümkün olmayan zəhməti olur. Yəni, adı çəkilən bu şəxs bizə məxsus “darvaza dirəyi”nin “itgin salınmasında” baş rolda olur və bizim ailə üzvlərimizə qarşı fiziki və zorakı addımlarını, həmçinin digər addımlarını da atmaqla, artıq neçə illərdir ki, yaddaşlarımızda silinməz izlər də buraxıb. Atılan addımlar nə qədər acı olsa da, bu gün sevincimizin həddi-hüdudu yoxdur. Çünki, “itgin həsrəti” hər kəsi sızıldadan anlardır. Bir anlığa yada salaq ki, çoxları “XƏZƏR TV”-nin “Səni axtarıram” proqramında hansı anları yaşayırlar və itgin düşənlərinə qovuşan zaman isə, hansı sevinc hissləri ilə üz-üzə qalırlar. Bəli, bu da bizim sevinc hissimizdir. Ona görə ki, biz 21 iyun 2012-ci il tarixdən “itgin salınan darvaza dirəyi”nin axtarışına çıxsaq da, bütün həsrətlərimizə 22 dekabr 2017-ci il tarixdə birdəfəlik son qoyuldu. Odur ki, ünvanladığım müraciət əsasında üz-üzə qaldıqlarımız problemləri dərc edən bu mətbu orqan vasitəsilə, bizi arzumuza qovuşduran inşaatçılara gec də olsa təşəkkür etməyi, sanki özüm üçün bir borc bildim”.
Hörmətli oxucular! Dərc olunan açıqlamada səslənən hər bir ittiham, məhz Məmmədov Nuşirəvan Məhərrəm oğluna məxsus fikirlərdir. Adı çəkilən şəxsin və ailə üzvlərinin üz-üzə qaldıqları problemlərlə bağlı, biz də müəyyən qədər məlumatlara malikik. Xoşagəlməz hal o olub ki, bu şəxs ailə üzvləri ilə birlikdə bu günə kimi çoxsaylı haqsızlıqlarla üz-üzə qalıb, problemlərinin həlli ilə bağlı aidiyyəti qurumlara onlarla deyil, yüzlərlə deyil, hətta mindən çox ərizə və şikayətlərini ünvanlasa da, təəssüflər olsun ki, Nuşirəvan Məmmədov bu günə qədər də haqqına qovuşa bilməyib. Bax budur hər kəsi sızıldadan anlar. Açıqlamada adı çəkilən hər kəsin mövqeyini dinləyə bilərik.
Mövzu diqqətimizdədir.

Cəfər
gundemxeber.az