Artıq bu gün Bəsti Məmmədova belə bir qənaətdədir ki, neçə ki, Müstəqim Məmmədov rayonun rəhbəridir, deməli üzləşdiyi problem həllini tapmayacaq.

Son vaxtlar Mərkəzi Aran zonasında yerləşən Tərtər rayonu haqda əksər KİV silsilə tənqidi məqalələr işıq üzü gördükcə, o zaman bəlli olur ki, bu rayon da sosial problemlər məngənəsində boğulan rayonlardan biridir. Vəziyyətin belə bir həddə gəlib çatmasına səbəb isə, səriştəsiz idarəçiliyi ilə Tərtərin bugünkü tarixində silinməz izlər buraxan Müstəqim Məmmədovun, rayonda rəhbər vəzifəni daşımasıdır. Elə bu səbəbdən də, ictimai fikrin formalaşmasına təsir edə biləcək əksər KİV, bu günədək Tərtər rayonu haqda silsilə tənqidi məqalələr dərc olunub və hal-hazırda da dərc olunmaqdadır.

Diqqəti cəlb edən hal odur ki, sərhəd zolağında yerləşən bu rayonda rəhbərlik nədənsə ucqar ərazilərə deyil, yalnız mərkəzi ərazilərə daha çox nəzər-diqqət yetirir. Məsələn, rayonun mərkəzi küçələri bir qədər qaydaya salınır və çox keçmədən təmir adı ilə yenidən qazılır. Mərkəzi yollara asfalt döşənir və az müddət keçdikdən sonra qazıyıb təkrar götürülür və.s, vəlaxir. Bu zaman aparılan təmir işlərinin arxasında, külli miqdarda büdcə vəsaitinin mənimsənilməsinə diqqət yetirmək lazım gəlir. Əldə olunan məlumatlara görə, həddi-hüdudu bilinməyən mənimsəmlərdə söz sahibliyini Müstəqim Məmmədov, yetərincə yerinə yetirməyi də bacarır. Belə bir səbəblər üzündəndir ki, Tərtərdə sosial problemlər tüğyan etməkdədir.

Bir neçə gün bundan öncə redaksiyamıza şikayət məktubu ünvanlayan Tərtərin Hüsənli kənd sakini Məmmədova Bəsti Cəlal qızı da, üzləşdikləri sosial problemlərin varlığından söz açır və bildirir ki, “bizim kənd ermənilər tərəfindən ələ keçirilmiş Ağdamın ərazisinə yaxın ərazidə yerləşir. Elə bu səbəbdən də, kəndin çoxsaylı sosial problemlərinin varlığı sakinləri zinhara gətirməsinə baxmayaraq, yerli vəzifə sahibləri belə bir məsələlərin həllində heç də narahat olmurlar.”

O, onu da qeyd edir ki, “mən sadə bir kənd sakiniyəm. Üç övlad böyüdüb boya-başa çatdırmışam və övladlarım vaxtilə könüllü milli ordu sıralarına daxil olaraq, mənfur qonşumuza qarşı ölüm-dirim savaşlarında da iştirak etmişlər. Yaşadığım ev DQ müharibəsinin qızğın çağlarında atılan mərmilərin təsiri nəticəsində çat-çat oldu və həmin vaxtdan bu günədək əmələ gələn çatlar yavaş-yavaş da böyüdü. Küləkli havada, yağış yağanda evimiz elə bir təhlükəli vəziyyətə düşür ki, gəl görəsən. Dəfələrlə yerli qurum rəhbərlərinə, rayon icra hakimiyyəti səlahiyyətlilərinə evimin təmiri ilə bağlı müraciətlər etsəm də, bu günədək heç bir vəzifə sahibindən nə bir səs çıxdı, nə də ki, bir soraq eşidildi. Belə olan təqdirdə məcbur oldum ki, Prezident Administrasiyasına yazılı şikayətimi ünvanlayım və üzləşdiyim problemin həllini onlara da çatdırım. Diqqəti cəlb edən hal o oldu ki, Prezident Administrasiyasından Tərtər rayon İcra Hakimiyyətinə problemin həlli məqsədilə məktub göndərilsə də, həmin məktuba da əhəmiyyət belə verilmədi. Yəni, həmin məktub əsasında bir kimsə maraqlanmadı ki, siz yuxarı instansiyalara hansı problemlə bağlı məktub ünvanlamısınız. Yalnız yaşadığım ünvana Tərtər rayon İcra Hakimiyyəti başçısının birinci müavini Ramiz Şabanovun imzası ilə, 21 aprel 2014-cü il tarixdə belə bir cavab məktub çatdırıldı ki, “2014-cü il üçün dövlət büdcəsindən bu məqsədlə vəsait ayrılmadığına görə, tələbinizin təmin olunması hələlik imkanımız xaricindədir”. Çox maraqlı cavab olduğu qədər, bir o qədər də təəccüb doğuran məktubdur. Çünki məktub 2014-cü il tarixdə yazılsa da, ünvanıma 2015-ci ildə gəlib çıxa bildi. Bu da onu ehtimal etməyə əsas verir ki, Tərtər rayon İcra Hakimiyyəti Aparatından rayonun ucqar kəndlərinə göndərilən məktublar, sanki dolanbac yollarla gedir və ünvan üzrə çatması üçün təqribən bir ilə qədər də vaxt keçir”.

Bəli, bu gün Bəsti Məmmədova Hüsənlinin çoxsaylı kənd sakinlərindən biridir və özləşdiyi problemin həlli üçün müraciət etməyə konkret ünvan axtarışına çıxsa da, hələ ki, axtardığı ünvanı tapa bilməyib. O, artıq şüurlu şəkildə dərk edir ki, Tərtər rayon rəhbərliyinə müraciət

etməyin mənası yoxdur. Çünki, illər uzunu edilən müraciətlərin heç bir mənası və nəticəsi olmadığından, artıq bu gün Bəsti Məmmədova belə bir qənaətdədir ki, neçə ki, Müstəqim Məmmədov rayonun rəhbəridir, deməli üzləşdiyi problem həllini tapmayacaq.

Bütün bunların fonunda diqqəti cəlb edən bir məqama da nəzər salmaq, sanki zərurətdən irəli gələn məsələyə çevrilir. Yəni, onu bildirmək istəyirik ki, “Gündəm Xəbər” müstəqil ictimai-siyasi qəzet olaraq, daim vətəndaşların üzləşdikləri sosial problemlərin ictimailəşməsinə çalışırıq, həlli üçün mümkün köməkdarlığımızı və.s bir kimsədən belə əsirgəmirik. Eyni zamanda hansısa vəzifəli şəxsin, yaxud da söz sahibi olan bir kimsənin diktəsi ilə də fəaliyyətimizi davam etdirmirik. Amma, son günlər redaksiyamıza daxil olan bəzi məlumatlar, hələ də bizi təəccüb içində qoymaqdadır. Belə ki, əldə etdiyimiz məlumatlara görə, Tərtərdə yaşanan sosial problemlər barədə “Gündəm Xəbər” qəzetində silsilə tənqidi məqalələr işıq üzü gördükcə, bəzi KİV “nümayəndələri” (hələlik etika naminə ad çəkmirik) Tərtərə “ayaq” açmaqda davam edirlər. Məqsəd heç də yaşanan sosial problemlərin varlığını ictimailəşdirmək, sadə vətəndaşların yanında olmaq deyil, “Gündəm Xəbər” qəzetinin əleyhinə hansısa formada təbliğati işlərini aparmaqdır. Faciəli hal odur ki, bu yöndə təbliğati iş aparmaq üçün, həmin KİV “nümayəndələri”nin yetərincə potensialı da yoxdur. Sadəcə olaraq onlar, rəhbərlik etdikləri internet televiziyalarında əqidələrinə uyğun düşünən və yaxud da danışmağa məcbur edilən, bir neçə nəfər aqsaqqal rayon sakinindən müsahibə götürüb ictimailəşdirməklə, əslində iç üzlərini açıb ortaya qoymuş olurlar. Müsahibələrdə isə vurğulanır ki, guya Tərtər rayonu ilə bağlı əksər mətbu orqanlarda işıq üzü görən məqalələr heç də həqiqəti əks etdirmir və qərəzli xarakter daşıyır. Bəli bu zaman bəlli olur ki, həmin KİV “nümayəndələri” Tərtər rayon rəhbərliyi ilə “sıcaq” münasibətdədirlər və ortada üzərlərinə götürdükləri hansısa öhdəlik şərtləri də var. Bu da onu sübut etməyə əsas verir ki, baş alıb gedən sosial problemlərin varlığına göz yuman, bir növ Tərtər rayon rəhbərliyinin sifarişlərini yerinə yetirən (buyruqçular), sanki mətbuatda “yengə” rolunu şərəflə yerinə yetirmiş olurlar.

Ətraflı növbəti sayımızda.

Mirzə