Bu gün Nəqliyyat, Rabitə və Yüksək Texnologiyalar Nazirliyində olduq. Nazirlikdən bildirdilər ki, gundemxeber.az saytı ilə bağlı bizdə heç bir problem yoxdur.

Yəni, adı çəkilən saytın bloklanma prosesi nazirlik tərəfindən aparılmayıb və sizin bizə ünvanladığınız rəsmi məktuba cavab hazırlanıb. Sadəcə olaraq Nazir tərəfindən imzalandıqdan sonra, yaxın bir-iki günə həmin məktubu ünvanınıza göndərəcəyik. Belə bir cavabdan sonra Prezident Aparatında olub, yaşanan olayla bağlı cavab əldə etmək istədikdə, PA-nın ümumi şöbəsindən bildirdilər ki, “bu çox ciddi məsələdir, yaxşı olar ki, problemin varlığını aidiyyəti üzrə müvafiq qurumlara çatdırın ki, məsələyə aydınlıq gətirilsin. Yəni, GundemXeber.az və org saytına qarşı “partizan oyunu” aparanın kimliyi hər kəsə bəlli olsun. Belə bir görüşdən sonra adı çəkilən şöbədən onu da bildirdilər ki, “sizi PA Ictimai-siyasi şöbənin rəhbər şəxslərinin qəbuluna yaza bilərik” desələr də, həmin təklifə razı olmadığımızı bildirdik və qarşı tərəfin diqqətinə onu da çatdırdıq ki, biz ictimai-siyasi şöbənin rəhbərliyi və KİVDF-nin fəaliyyəti ilə bağlı tənqidi açıqlama dərc edərkən oxşar problemləri yaşamalı oluruq. Bu da sifarişin hansı mənbədən verildiyini və bizə qarşı münasibətin hansı ünvanlardan qaynaqlandığını müəyyən etməyə əsas verir. Onu da hər kəsin diqqətinə çatdıraq ki, “Gündəm Xəbər” qəzetinin 25-31 dekabr 2017-ci il tarixli sayında “Medianın monopolist imperatoru kimdir?” başlıqlı açıqlamadan dərhal sonra Gundemxeber.az saytı və 22-28 yanvar 2018-ci il tarixli sayında isə “KİVDF çap mətbuatını tərəvəz bağlaması edir-Prezidentə xəyanət” başlıqlı açıqlamadan sonra da gundemxeber.az saytını blokladılar. Atılan belə bir addımlar da, açıq-aşkar şəkildə azad sözə, sərbəst fikirin ifadə olunmasına yönəlik basqı hesab olunmalıdır ki, biz də belə bir xoşagəlməz vəziyyətlə üz-üzə qalırıq.

RAHİB