Son günlər “Gündəm Xəbər” qəzetinin adı ətrafında baş verənlər ölkə mediasının gündəmini zəbt edən əsas mövzulardan birinə çevrilib.

Belə ki, təqribən onbeş gündən çoxdur ki, adıçəkilən mətbu orqanla bağlı davam edən davamlı təzyiqlər, bu gün də davam etməkdədir. O da hər kəsə gün təki aydındır ki, “Gündəm Xəbər”ə qarşı intensivləşən hucumların kökündə, birbaşa Prezidentin İctimai-siyasi məsələlər üzrə köməkçisi Əli Həsənovun vetmiş olduğu tapşırıqlar durur. Belə bir tapşırıqların verilməsinə səbəb də, adı çəkilən mətbu orqanın ayrı-ayrı saylarında dərc olunan açıqlamalar olub. Məhz, həmin açıqlamalarda yazıb qeyd etmişdik ki, daim ölkənin media aləmi üzərində təsir imkanlarını saxlamağa çalışan və bu sahəyə ayrılan vəsaitləri öz maraqları çərçivəsində müəyyən istiqamətlərə yönəldən PA-nın rəsmisi, bu gün müstəqil mətbuatın inkişafına deyil, birbaşa məhvinə yönəlik addımlarını atmaqdadır. Sözsüz ki, bu cür açıqlamalar nə Əli Həsənovun, nə də ki, adı çəkilən vəzifə sahibinin təsir dairəsində saxladığı KVDF rəhbərinin xoşuna gəlməyib. Belə bir səbəblər üzündən də, adları hallanan vəzifə sahibləri “uzanan əlləri”nin sayəsində ilk əvvəl qəzetimizin elektron variant olan Gundemxeber.az və Gundem xeber.orq saytlarını bloklada bildilər. Elə ki, “Gündəm Xəbər”in 12-18 fevral 2018-ci il tarixli sayının 9-cu səhifəsində “KÖMƏKÇİSİ “DOMOKL QILINCI” İLƏ PREZİDENTİN SİYASƏTİNİ BALTALAYIR” başlıqlı növbəti açıqlamanı dərc etdik, o halda davam edən təzyiqlər daha da intensivləşdi. Belə bir addımlar da onu sübut edir ki, bu ölkədə vəzifə sahibi və təsir imkanı olan şəxslər öz maraqlarının həlli naminə ölkə rəhbərinin siyasətini tapdaqlar altına atmaqda davam edirlər. Necə olur ki, bir tərəfdən ölkə rəhbəri cənab İlham Əliyev “jurnalistlər mənim köməkçilərimdir” deyə yanaşmasını ortaya qoyur, digər tərəfdən vəzifəsi və təsir imkanı olan şəxslər şəxslər isə, müstəqil mətbuatı boğmaq yöndə addımlarını atırlar.
Onu da bildirək ki, “Gündəm Xəbər”ə qarşı intensivləşən təzyiqlər təkcə bunlarla yekunlaşmadı. Artıq onbeş gündən çoxdur ki, redaksiya əməkdaşları “Azərbaycan” nəşriyyatının rəhbərliyinə verilmiş sərt tapşırıqlar əsasında redaksiyaya buraxılmırlar, bu günlərə kimi qəzetimizin çapını həyata keçirmiş mətbə isə, hazırda “Gündəm Xəbər”i çap etməkdən imtina edir. Sözsüz ki, bu cür addımların arxasında, yuxarıda qeyd etdiyimiz kimi Prezidentin İctimai-siyasi məsələlər üzrə köməkçisi Əli Həsənovun vetmiş olduğu tapşırıqlar durur. İndi çoxsaylı oxucuların diqqətinə çatdırıb sual edirik ki, bu cür ucuz addımlarını atmaq yüksək çinli vəzifə sahibinə yaraşarmı? Əsla yox! Nə qədər çətin olsa da və bu sayı sadalanan səbəblər üzündən işıq üzü görməsə də, yaxın günlərdə “Gündəm Xəbər” ayağa duracaq və nəşrini də davam etdirəcək. İnanırıq ki, ölkəmizdə müstəqil mətbuatın inkişafını daim diqqətdə saxlayan və problemlərinin həlli istiqamətində lazımi tapşırıqlarını verən cənab İlham Əliyev, “Gündəm Xəbər”in üz-üzə qaldığı davamlı təzyiqlərin, intensivləşən hücumların qarşısının alınması yöndə müvafiq tapşırıqlarını verəcək.

“Gündəm Xəbər”