Ölkə gündəmində ciddi müzakirələrə səbəb olan Kölndəki toplantı rüsvayçılıqla başa çatıb.

A.Əliyev tədbirdə 31 mart soyqırımı günü ilə bağlı çıxış edərkən bu tarixi “gözəl gün” adlandırıb və video görüntülər sosial şəbəkələrdə paylaşılıb.

Təcrübəli deputatın xalqın faciə gününə “gözəl” deməsi böyük siyasi xətadır. Bunu Avropanın və Azərbaycan ictimaiyyətinin qarşısında dilə gətirmək ciddi ajiotaj yaradıb.

Deputat isə iddia edir ki, bu sözü Cümhuriyyətin 100 illiyi ilə bağlı söyləyib. Video görüntülərdə isə elə bir fikrə rast gəlinmir.

Üstəlik, 31 mart Soyqırım Günü ilə bağlı Azərbaycanın Almaniyadakı Diasporasının tədbirində A.Əliyevin “İlhamla irəli” şüarından istifadə etməsi də anlaşılan deyil.

Deputat bu tədbirin leytmotivini öncədən açıqlaya bilərdi: ya seçkilədə prezidentimizə dəstək verir, ya da soyqırımla bağlı çıxışlar edəcək.

Ona görə də toplantını üz-gözünə bulaşdıran A.Əliyevə Rauf Babayev adlı mühacir də etiraz edib və tədbirdə qalmaqal yaşanıb. Hətta mühafizəçilərin həmin gənci bayıra çıxardıqları bildirilir.

Deputat sosial şəbəkələrdə haqqında səslənən ittihamlara da cavab verib: “Əziz həmvətənlilər, martın 31-də Kölndə soydaşlarımızla keçirdiyimiz tədbir uğurlu alındı.

Bunu bir daha ona görə təkrarlamaq məcburiyyətindəyəm ki, Avropadakı 3-5 nəfərlik söyüş qrupu dayanmadan mənə və toplantıya qatılanlara qarşı söyüşlər yağdırır, hamını təhqir edirlər.

Yaxşı, məni hədəf götürmüsünüz, çünki aylardır sizinlə sivil müstəvidə mübarizə aparmaq istəyirəm və fikirlərimi də zaman-zaman sosial şəbəkədə yazıram. Bəs toplantımıza qatılan insanları və onların ailələrini niyə təhqir edirsiniz?

Onların baxışları sizin "baxışlarla” üst-üstə düşmürsə, toplantıya gələn soydaşlarımız müxalifəti yox, iqtidarın siyasətini dəstəkləyirsə, təhqir olunmalıdırlar?

Bəs harda qaldı sizin guya uğrunda savaşdığınız "demokratiya”və "fikir azadlığı”? Niyə hamı sizin kimi düşünməlidir?

Avropadakı soydaşlarım sizin kimi düşündəmikdə kim sizə ixtiyar verib ki, soydaşlarımıza, o cümlədən toplantıya qatılan Anadolu türklərinə radikal kürd damğası vurasınız?

Ora toplaşanların hər biri erməni və kürd separatçılarına qarşı savaşmağa hər an hazır olan millətçi insanlardır”.

gundemxeber.az-in fia.az-a istinadən verdiyi xəbərə görə, deputatın hakimiyyətin mövqeyini Avropa tribunasından səsləndirmək cəhdi uğursuz alınıb.

Həm mühacirlərlə bağlı yanlış yanaşmaya yol verdiyi deyilir, həm də soyqırımı gözəl gün adlandırması feysbukda ciddi müzakirələrə səbəb olub.

Bundan əlavə, toplantıya 80 min avrop xərclənməsi haqda iddialar da rezonans doğurub. Millət vəkili isə ittihamları rədd edib.

Bildirib ki, “mənim çıxışımdakı fikri yanlış istiqamətə yönləndirməyə çalışırlar. Mən Cümhuriyyətin 100 illiyini nəzərə alaraq "xoş günümüz” ifadəsini işlətmişəm. Məgər Cümhuriyyətimizin 100 illiyi xoş günümüz deyilmi?

Xoş günümüz dedikdən sonra mart soyqırımına toxunmuşam. Və ya yalandan yazırlar ki, guya Cümhuriyyət haqqında danışarkən Cümhuriyyət qurucularının adını çəkməmişəm. Yenə yalan, yenə iftira!

Üçüncüsü, guya tədbirə özümlə Bakıdan idmançıları aparmışam. Mənimlə Bakıdan Kölnə Kikboksinq Federasiyasının cəmi iki üzvü gedib.

Zaldakı gənclər Almaniyada yaşayan gənclərdir, içərilərində yerli idman klublarının üzvləri də var. Guya toplantı üçün otel salonunun icarəsinə 80 min avro xərclənib və bu, Azərbaycanın dövlət büdcəsinə aiddir.

Əvvəla, Kölndəki toplantının təşəbbüsü mənə və bu şəhərdəki Azərbaycan və Türkiyə Kültür dərnəklərinə aiddir, bu toplantının dövlət rəsmiləri ilə əlaqəsi yoxdur, olsaydı toplantımızda səfirliyimizin diplomatları və ya Diaspora Komitəsinin nümayəndələri iştirak edərdilər.

Maliyyəyə gəldikdə, Bakıdan 3 nəfərlə təyyarənin ekonom klas hissəsinə bilet almışıq, Kölndəki cüzi xərcləri isə kültür dərnəkləri öz üzərlərinə götürüblər. Toplantının keçirildiyi otelin zalına gəldikdə isə 3 saat üçün 1400 avro pul ödənib.

Görəsən, bu yalançılar 80 min avro rəqəmini hardan götürüblər? Yeri gəlmişkən, puldan çox danışırlar, ancaq özləri gah Kölndə, gah Parisdə, gah Amsterdamda peyda olurlar”.