Artıq xeyli müddətdir ki, Göygöl rayon Xaqani kənd Uşaq Musiqi Məktəbində yaşanan, bəlkə də ölkə miqyasında bənzəri olmayan həngamələrin tüğyan etdiyi bu məktəblə bağlı silsilə tənqidi açıqlamalarımızı dərc edib, hər kəsi baş verənlərlə bağlı ətraflı məlumatlandırırıq. Məsələnin düşündürücü tərəfi odur ki, biz problemlərin varlığını ictimailəşdiririk, rəhbərliyin ümidverici addımlar atmasını gözləyirik, amma adı çəkilən musiqi məktəbinə rəhbərlik edən İradə xanım Bağırovanın qızı Aygül Əliyeva isə, redaksiyamızın elektron poçtuna hədələrlə dolu “ultimatium”larını göndərməkdə davam edir.

Yəqin ki, çoxsaylı oxucularımızın o da xatirindədir ki, hələ bir müddət bundan öncə Xaqani kənd Uşaq Musiqi Məktəbi ilə bağlı dərc etdiyimiz açıqlamaya cavab olaraq bəzi media qurumlarında "Musiqi məktəbinin direktor müavini ittihamlara cavab verdi" başlıqlı məqalə işıq üzü görmüşdü. Tərəfimizdən apardığımız araşdırmalar zamanı o halı da müəyyən edə bildik ki, Göygöl rayon Xaqani kənd Uşaq Musiqi Məktəbində direktor müavini ştatı yoxdur. Amma, buna baxmayaraq adı çəkilən bu xanım dərc olunmuş məqalədə özünü direktor müavini kimi təqdim etmişdi. Əldə etdiyimiz başqa bir məlumatlarda o da bildirilir ki, Aygül xanım Əliyevanın belə bir statusla çıxış etməsinin özəl səbəbləri var. Belə ki, onun anası İradə xanım işə gəlmədiyi vaxtlarda idarəçiliyi o, həyata keçirdiyindən, tam əksəriyyət şifahi fomada olsa belə onu müavin kimi qəbul edirlər. Bu da İradə xanımın öz övladına vermiş olduğu ixtiyardan irəli gələn səbəblərdir. Odur ki, o, əldə etmiş olduğu belə bir ixtiyarlardan yararlanaraq redaksiyamızın elektron poçtuna “Kollektiv adından sizə rəsmi qaydada son xəbərdarlığımızı bildiririk. Biz Mehribanı məhkəməyə vermişik, əgər bundan sonra məktəblə, yaxud da müəllimlərlə bağlı nəsə yazsanız, o halda sizin qəzeti də məhkəməyə verəcəyik” deyə müraciətini göndərir. Bu da artıq “əndazə”nin aşılması deməkdir.
Onu da vurğulayaq ki, Qanunla ailə üzvlərinin, yaxın qohumların idarə, müəssisə, təşkilat və digər dövlət qurumlarında birlikdə yüksək vəzifə daşımaları qadağan olunsa da, deyəsən “ailə podratı”na çevrilmiş bu təhsil müəssisəsində, qanunun belə bir tələbinə heç cür əməl olunmur. Əgər əməl olunsaydı, o halda Aygül xanım Əliyeva da bir qədər məsuliyyətini hiss edərdi və həm özünü direktor müavini kimi təqdim etməzdi, həm də ünvanımıza “ültimatium”larını göndərməzdi. Yəqin ki, Mədəniyyət və Turizm Nazirliyinin rəsmi şəxsləri adı çəkilən bu xanımın əməllərinin araşdırılması yöndə lazımi addımlarını atacaqlar.
Mövzu diqqətimizdədir.

Mehriban Əzizqızı