“Dəfələrlə RİH-nin qarşısında öz etirazımızı bildirsək də, hər dəfə “Bundan artıq maaş verməyə imkanımız yoxdur deyə cavab veriblər”
Bir neçə həftə bundan öncə Ağsu Rayon Yolyaşıllaşdırma İdarəsində çalışan fəhlələr, adı çəkilən bu qurumda baş verən çoxsaylı qanunsuzluqlarla bağlı GundemXeber.az saytına şikayət etmişdilər. Belə ki, onlar ünvanladıqları müraciətlərində bildirirdilər ki, “Bu gün idarənin ştat cədvəlində 100 nəfər fəhlənin çalışması göstərilsə də, gündəlik cəmi 12 nəfər fəhlə işə çıxır və rəhbərlik hər gün bizi sanki “qul” kimi işlədirlər. Özləri rahat şəkildə dövlət büdcəsindən maaş alırlar və bizi isə, 3-cü müqavilə əsasında işləməyə vadar edirlər. Əgər üç il bundan əvvəl əməkhaqqı olaraq ayda 250 manat maaş alırdıqsa, son iki ildir ki, 130 manat əmək haqqı alırıq. Bu da bənzəri olmayan haqsızlığa imza atmaq deməkdir. Dəfələrlə RİH-nin qarşısında öz etirazımızı icra başçısı Ənvər Seydəliyevə bildirsək də, hər dəfə bizə “Bundan artıq maaş verməyə imkanımız yoxdur” deyə cavab veriblər. İcra başçısının müavini vəzifəsini daşıyan İqbal Mikayılov isə bildirir ki, “Bu iş xoşunuza gəlmirsə, o halda işləməyin və hara da istəyirsiniz şikayətinizi ünvanlayın. Onsuz da son anda biz deyən olacaq” deyir. Hər gün səhər saat 09:00-dan axşam 18:00-a qədər iş saatımız olsa da, rəhbərlik bizi iş saatından artıq işləməyə məcbur edir. Yəni, yay aylarında qazon otların biçilməsi, ağacların sulanması və s. işlərində gecə saatlarına qədər işlədirlər. Hətta, bayram günlərində də işləməyə vadar edirlər. Bu qədər ağır iş rejimində çalışsaq da, əmək haqqımızı 130 manatdan artıq artırmırlar. Hansı fəhlə üz-üzə qaldğı problemlə bağlı icra başçının müavini İqbal Mikayılovun qəbuluna getdikdə, “İşdən azadsınız, gedə bilərsiniz” deyə cavabını eşitməli olur”.

Elə ki, GundemXeber.az saytının əməkdaşı şikayətçilərlə görüşür və o halda adı çəkilən qurumda “çalışan” və kartla maaş alan şəxslərdən biri ümumi vəziyyətdən xəbərdar olur. Çox keçmir ki, həmin şəxs baş tutan görüşün məğzi ilə bağlı İcra Hakimiyyətini məlumatlandırır. Bundan sonra əməkdaşımız qarşı tərəf olaraq icra başçısı Ənvər Seydəliyevin və müavini İqbal Mikayılovun mövqeyini dinləmək məqsədilə icra hakimiyyətinə üz tutur. Bir çox məsələlərdə ittiham olunan icra başçısının və onun müavininin əvəzinə, ünvanlanan suallara Ağsu Rayon Yolyaşıllaşdırma İdarəsinin müdiri Namiq Mürsəlov cavab verir və o, “Mən deyilənləri tamamilə təkzib edirəm və onu bildirirəm ki, şikayət edən işçilər altı saat olmaqla hər həftənin yalnız beş gününü işləyirlər. Deyilənlərə cavab olaraq onu da vurğulayım ki, bayram günləri və qeyri iş günləri onları heç kim məcburi işə cəlb etmir. Ağacların suvarılması, qazon otların biçilməsi ilə bağlı fəhlələrin iddia etdikləri iddialar da tamamilə ağyalandır. Onlar günün 24 saatını deyil, yalnız altı saatını suvarma ilə məşqul olurlar. İsti hava şəraitində suvarma işləri aparmaq mümkün olmur” deməyi də unutmur. Bu cür açıqlamalar, heç də inandırıcı açıqlamalar deyil.

Ümumiyyətlə, Ağsu Rayon Yolyaşıllaşdırma İdarəsində baş verən çoxsaylı qanunsuzluqlarla bağlı, bu günədək ayrı-ayrı mətbu orqanlarda silsilə tənqidi açıqlamalar dəfələrlə işıq üzü görüb. Bugünkü problemlərin varlığına gəlincə isə onu deyə bilərik ki, fəhlələrin sadaladıqlar faktlar əslində əsl həqiqətlərdir. Çünki, respublikamızın rayonları içərisində Ağsu rayonu bəlkə də yeganə rayondur ki, bu rayonda ailə-klan idarəçiliyi hökm sürür, sosial problemlər aşıb-daşır. Əgər yolyaşıllaşdırma idarəsininin müdiri Namiq Mürsəlovun kimliyi haqda da müəyyən araşdırma aparılarsa, o halda aydın olacaq ki, bu şəxs ya Ənvər Seyidəliyevin yaxın qohumudur, ya da ki, ona bu və ya digər yollarla bağlı olan şəxsdir. Digər tərəfdən, Ağsu Rayon Yolyaşıllaşdırma İdarəsində ştat cədvəli üzrə 100 nəfər fəhlənin olması, onlardan gündəlik 12 nəfərinin işə çıxması da, əsl həqiqətlərdir. Hətta, lazımi araşdırmalar aparılarsa o halda o da bəlli olar ki, adı ştat cədvəlində gedən, amma əmək haqqı kartları başqa şəxslərdə olan fəhlələrin çoxu, ya Ənvər Seyidəliyevin, ya da ki, onun müavini İqbal Mikayılovun tapşırığı əsasında işə götürülən şəxslərdirlər.
GundemXeber.az-ın əldə etdiyi məlumatlara görə, Ağsu rayonu Ənvər Seyidəliyevin yaxın qohum-əqrəbası tərəfindən ələ keçirildiyindən, büdcəsi talandığından, bu gün bu rayonda yaşanan qanunsuzluqların tayı-bərabəri yoxdur. (Məqaləni GundemXeber.az saytına istinad etmədən yerləşdirmək, əslində istifadəçinin oğru və savadsız olduğunu təsdiq edən halın varlığıdır) Adicə bir faktı vurğulayaq ki, Ənvər Seyidəliyevin bacısı oğlu sabiq ƏƏSMN-i Səlim Müslümov daşıdığı vəzifəsindən uzaqlaşdırıldıqdan sonra, bu şəxsin büdcəni hansı yollarla talan etməsi hər kəsə bəyan oldu. Hazırda Ənvər Seyidəliyev də oxşar addımlarını atdığından, bu gün o, Rayon Yolyaşıllaşdırma İdarəsində çalışan fəhlələri “inqilaba sürükləmək”dədir. İnanırıq ki, ölkənin siyasi rəhbərliyi Ağsuda idarəetməni həyata keçirən bu şəxsin əməllərini diqqətdə saxlayıb, çox yaxın vaxtlarda müvafiq qərarını da açıqlayacaq.Hər kəs təqdim etdiyimiz VİDEO-ya baxmaqla, yəqin ki, baş verənlərlə bağlı daha ətraflı məlumatları əldə edə biləcək.
Problemlərin varlığını diqqətdə saxlayacağıq.



Cəfər