Məhəbbət Babayevin "qoçular"ı Lənkəran rayonunun İstisu qəsəbəsində "at oynadır"

Son zamanlar əyalətlərdə məmur özbaşınalığı, məmurların himayə etdiyi sıravi vətəndaşların digərləri üzərində hökmüranlıq iddiaları aşırı dərəsədə artmaqdadır. Bir də görürsən, heç bir səlahiyyəti olmayan kimsə digər həmkəndliləri üzərində ağalıq iddiasına düşür, onların mülkünü, əmlakını və ya evinə bir tikə çörək apardığı obyektini müxtəlif kombinasyalarla, yerli icra hakimiyyəti məmurlarının köməyi ilə ələ keçirmək fikrinə düşür. Hətta əksər hallarda belələri məqsədinə nail olur. Bu cür hadisələrdən biri də Lənkəran rayonunun İstisu qəsəbəsində baş verib.
Belə ki, bu günlərdə Lənkəran rayonunun İstisu qəsəbə sakini Ağayev Qulamhüseyn Sultanhüseyn oğlu Millətinsəsi.info saytının redaksiyasına şikayət məktubu ilə müraciət edib. O bildirir ki, uzun illər yaşadığım qəsəbədə çayxana işlətmişəm:
"Mən Yeni Azərbaycan Partiyasının cənub bölgəsində yaradıcılarından biri olmuşam və hal-hazırda da partiyanın üzvüyəm. Vaxtilə partiyanın qəsəbə təşkilatının sədri işləmişəm. Bu çayxananı atam Sultanhüseyn kişi 1969-cu ildən işlədib, həmin dövrə aid bütün sənədlər, hesab-faktura və s. hamısı indi də durur. 1992-ci ildə, atam rəhmətə gedəndən sonra çayxananı mən işlətməyə başladım. Çayxana o vaxtki "Raypo"nun nəzdində fəaliyyət göstərib. Müstəqillik dönəmində isə çayxana Rayon İaşə Şöbəsinə tabe idi. 1995-ci ildə öz vəsaitim hesabına çayxananı yenidən tikdim. Rayon İaşə Şöbəsinin işçilərindən və ərazi icra nümayəndəliyindən ibarət komissiya tikintini yoxlayıb və istifadəyə verilməsi barədə qərar verib".

Şikayətçi qeyd edir ki, 2005-ci ildə deputat Hadi Rəcəblinin vasitəsilə "İstisu"yu Şabanov Yaroğlan Musarza oğlu, atası Şabanov Musarza Məhəmməd oğlunun adına özəlləşdirdi. Özləri deyir ki, deputata külli miqdarda rüşvət veriblər. Mənim çayxanamı da söküb, yenidən tikdilər. Mənə də dedilər ki, burda sən işləyəcəksən və RİŞ-ə ödədiyin vəsaiti də bizə ödəyəcəksən. 2008-ci ildə Yaroğlan Rusiyada müəmmalı şəkildə öldürüldü. Ondan sonra Musarza mənə illik hesab oxudu, hər il üçün min manat... İndi mən başa düşə bilmirəm, əgər bu çayxana Musarza və ya onun oğlanları tərəfindən özəlləşdirilibsə, bu barədə ən azı mən məlumatlı olmalıyam. Çünki mən və atam bu çayxananı 50 ilə yaxındır ki, işlədirik. Rayon İaşə Şöbəsi qanuna əsasən özəlləşdirmə zamanı burada uzun müddət işləyən bir vətəndaş kimi, çayxananı ilk olaraq mənə təklif etməlidirlər. Mən təklifdən imtina etsəm, başqa kiməsə təklif edilməli və ya auksiyona çıxarılmalı idi. Lakin bunların heç biri baş verməyibsə, Musarza bu çayxananı necə özününküləşdirib, indi də mənə haqq qoyur?

M.Şabanov 1978-82-ci illərində kənd soveti və sovxoz direktoru işləyib, ona görə də imkanları yaxşıdır. O illərdə M.Şabanova "Sosalist Əməyi Qəhrəmanı" adı və Lenin ordeni verilməli idi. Lakin o, "Yardımlı şəlaləsi" adlı ərazidə gənc bir qıza qarşı əxlaqsız hərəkətlər etdiyinə görə ittaham edildi və həmin ad və ordenin ona verilməsi təxirə salındı. Musarzanı işdən çıxartdılar və o da, getdi Rusiyaya, oğlanlarının yanına. Mənimlə işlədiyi dövrdə - 2013-cü ildə də, bu obyekti əxlaqsızlıq yuvasına çevirmək istədi, bir neçə dəfə yüngül əxlaqlı qadınlar gətirdi, kənd camaatının etirazından sonra problem həll edildi. Bu hadisədən sonra oğlu Güloğlan onu "İstisu"dan uzaqlaşdırdı.

Son vaxtlar Musarza yenidən "İstisu"ya qayıdıb və mənə hesab qoyub ki, ildə mənə 3-4 min manat pul verməlisən. Bu isə o deməkdir ki, məni işdən qovurlar. Çünki o obyekt il ərzində heç min manat pul çıxarmır. Mən Musarzaya dedim ki, mənim əlimdə sənədlərim var, sən məni burdan qova bilməzsən. O, isə cavabında dedi ki, mənim oğlum İsmayıl Moskvada söz sahibidi, pulu var, kim dinsə, pulla susduracam. Mən isə ona bildirdim ki, sən puluna güvənirsən, mən isə dövlətimə və onun qanunlarına. Musarza Şabanov rayonda əsasən rayon icra hakimiyyəti başçısı Taleh Qaraşovun birirci müavini Məhəbbət Babayevə güvənir. Mən hər dəfə hər hansı bir yolla haqqımı tələb edəndə Musarza qaçır Məhəbbətin yanına, ona pul verərək hamını susdurur, bu səbəbdən də mən haqqımı təmin edə bilmirəm. Məhəbbət dəfələrlə mənim üstümə polis göndərib, qorxudur ki, əl çəkim bu çayxanadan. Musarza mənə deyir ki, tüpürüm sənin qanunlarına, mənim pulum sənin qanunlarında çox güclüdür. Mən isə dövlətimə və onun qanunlarına güvənməkdə davam edirəm və inanıram ki, haqq nazilər, üzülməz, dövlətimin qanunları və qüdrəti mənim haqqımı bərpa edəcək.

Şabanov İsmayıl Məmmədrza oğlu Rusiyada antiazərbaycan təbliğatı aparır, talış dilində müsahibələr verir və vaxtaşırı Ermənistana səfərlər edir. Bu səbəbdən də İsmayılın Azərbaycana gəlməsinə qadağa qoyulub. Şikayətçi bildirir ki, bu ailə məni dədə-baba çayxanamdan didərgin salıb, ailəmin çörək gələn obyektini əlimdən alıb. Məni artıq çayxanaya yaxın belə buraxmırlar.

Q. Ağayev məktubunda qeyd edir ki, bu barədə Prezidentə və Birinci Vitse-prezidentə müraciət edib, onlardan kömək istəyib.
Qeyd edək ki, vətəndaşın işlətdiyi obyekt dövlət əmlakı olduğundan o özəlləşdirilərkən ilk növbədə onu işlədən kollektivə və ya icraçıya təklif edilməlidir. Əgər vətəndaş obyekti özəlləşdirməkdən imtina edərsə, yalnız o halda obyekt açıq hərraca çıxarıla və ya başqasına təklif edilə bilər. Lakin Q.Ağayev bildirir ki, onun işlətdiyi obyektin "kötük" sənədlərini ortaya çıxarmırlar. Deməli bu işdə maraqlı tərəflər var və proses qeyri-qanuni şəkildə həyata keçirilib. Bu istiqamətdə araşdırmalarımız davam edir, yaxın günlərdə araşdırmanın nəticələrini dərc edəcəyik. Anons olaraq bildirək ki, araşdırmalar zamanı Lənkəran rayonunda dövlət əmlakının özəlləşdirilməsi prosesində ciddi qanun pozuntularnın, mənimsəmələrin olduğu üzə çıxıb. Bu barədə əldə etdiyimiz faktlar tam təsdiq olunduqdan sonra ictimaiyyətə məlumat verəcəyik.
P.S. Məsələ ilə bağlı deputat Hadi Rəcəblinin mövqeyin öyrənməyə çalışsaqda, bu mümkün olmadı. Yazıda adları çəkilən hərkəsin mövqeyin dərc etməyə hazırıq.
http://bakunews.az