Bu günlərdə Sumqayıt şəhəri, Nərimanov küçəsi, Yataqxana-13, ev-28, mənzil-11 ünvanda yaşayan Axundova Xatirə Abdulməcid qızı tərəfindən Azərbaycan Respublikasının Baş Prokurorluğuna, Şabran rayon prokurorluğuna və digər dövlət qurumlarına ünvanlanan şikayət məktubunun bir surəti də “Gündəm Xəbər”in redaksiyasına daxil olub.

Adı çəkilən xanım redaksiyamıza ünvanladığı ərizəsində qeyd edir ki, “26.05.2018-ci il tarixdə “Azərpoct” MMC-yə ərizə ilə müraciət etdim və 11.07.2018-ci il tarixdə “Azərpoçt”–un baş direktorunun müavini Sübhan Kazımovdan cavab məktubu aldım. Şikayət məktubuma verilən cavabda Şabran rayon Ağalıq kənd poçt şöbəsinin direktoru Nailə Adıgözəlovaya şiddətli töhmət verilməsi haqda yazılı məlumat verilmişdi. Onu bildirim ki, mən belə bir cavabla heç cür razılaşa bilmərəm. Çünki, mən Nailə Adıgözəlovanın günahı ucbatından məhkəmələrdə sürünməklə bərabər, mənə maddi və mənəvi ziyan da dəymişdir. Bu xanım məndən üzr istəmək əvəzinə, üstəlik kənd sakinləri vasitəsilə mənə hədə-qorxu da göndərir. Bu da onun nəticəsidir ki, o, bu gün də iş başındadır və toxunulmazdır, kiminsə də himayəsindədir. Adi bir töhmətlə canını qurtaran bu xanım, bu gün də istədiyini edir.

Bir faktı qeyd edim ki, 21 iyun 2018-ci il tarixdə Daşlıyataq kənd sakini Quliyev Fuad Yusif oğluna Sumqayıt Apellyasiya Məhkəməsi tərəfindən göndərilmiş məhkəmə bildirişini, o, yenə də eyni qaydada yol sakinlərindən birinə vermiş və həmin şəxsə bildiriş çatdırılmadığından, məhkəmə üç övlad atası ilə bağlı həbs qətimkan tədbiri seçərək onu həbs etmişdir. Nailə Adıgözəlovanın günahı ucbatından 3 azyaşlı övlad başsız qalmışdır. O halda sual oluna bilər ki, Şabran rayon poçtunun rəisi kəndə poçtalyon tapa bilmirsə, səbəb nədir ki, kimlərinsə taleyi ilə oynayır? Bağlayın poçt şöbəsini! Yəqin ki, 65 yaşlı qadın gündəlik 4 km-lik məsafəni qət edə bilməz. Ağalıq kəndinə poçtalyon, yoxsa rəis lazımdır? Cənablar, biz daş dövründəmi yaşayırıq? Mən artıq Şabran rayon poçt şöbəsindən şikayət vermək məcburuyyətində qalmışam. Poçt əməkdaşlarının məsuliyyətsizliyi ucbatından mən yenə də məhkəmələrə ayaq döyməli olacağam? Mən kənd sakinlərinin bir məktubunu SİZƏ TƏQDİM EDİRƏM. Qoy “Azərpoçt”un baş direktorunun müavini Sübhan Kazımov, yenə də vətəndaşların şikayət ərizələrini oxuyub “xanımın çulunu” bir töhmətlə sudan çıxartsın. Amma mən məhkəmə ilə bərabər, birbaşa Prezident Aparatına şikayət etmək zorunda qalmışam.

Bir də onu xatırladıram ki, mən atamdan qalan əmlakın bölünməsi ilə bağlı 2015–ci ildə Şabran rayon Məhkəməsinə müraciət etmişdim. Rayon məhkəməsi mənim iddia tələbimi təmin etdi. Buna baxmayaraq, mən 2016-cı ildə yenidən Şabran rayon Məhkəməsinə müraciət edib həmin qətnaməyə izah verilməsini xahiş etdim. 12 iyul 2016-cı il tarixdə izahla bağlı qərardad çıxarıldı. Bununla bağlı Əmlak Məsələləri Dövlət Komitəsinə müraciət edib, mənə ayrılan torpaq sahəsinə aid Çıxarışı əldə edə bildim. Buna baxmayaraq, bir ildən sonra qardaşım Adil təkrar şikayət vermək qərarına gəldi. O, çıxarılmış qərardaddan 10 (on) gün müddətində şikayət verməli olduğu halda, şikayətin verilmə vaxtından ilyarım vaxt keçmişdi. Buna görə də onlar Şabran rayonu Ağalıq kəndi poçt şöbəsinin rəisi N.Adıgözəlova ilə “dil taparaq” ondan yazılı şəkildə bir ərizə-məlumat alırlar və həmin ərizə-məlumatı N.Adıgözəlovanın özü hansı marağı çərçivəsində Şabran rayon Məhkəməsinə göndərir. O, məktub-ərizədə yazaraq bildirir: “Daşlıyataq kəndi Ağalıq poçt şöbəsindən təqribən 4 km aralı məsafədə yerləşir. Həmin poçta daxil olan məktublar poçtolyon olmadığından, məktubları kənd sakinləri vasitəsi ilə sahiblərinə çatdırırıq. (Sual: O halda kəndə poçt məntəqəsi və onun rəisi kimə və nəyə lazımdır? Dövlətin pulu niyə göyə sovurulur?) Məhkəmənin göndərdiyi məktub isə, onun sahibi Axundov Adil Abdulməcid oğluna 21.09.2016–cı il tarixdə kənd sakinləri vasitəsi ilə göndərilir.

Hörmətli “Gündəm Xəbər”! Görəsən poçt rəisinin özbaşına belə bir məktubu məhkəməyə göndərməsinə qanun ixtiyar verirmi? Bildiyimə görə ən azından o, belə bir məktubu məhkəmə sorğusu əsasında göndərə bilərdi.. Bir də ki, məhkəmənin göndərdiyi məktublar yoldan keçənlərə verilirsə, buna nə ad vermək olar. Сavabını siz deyin.!!! Mən şəxsən belə bir sualın cavabını tapa bilmirəm. Bəs o halda dövlətin pulları niyə havaya sovrulur? N.Adıgözəlova maaşı niyə alır? Məgər yoldan keçən hər kəsə məktub verməklə iş icra olunurmu? Məni maraqlandıran hal, adı çəkilən xanımın məktubu məhkəməyə ötürməsidir. N.Adıgözəlova yazdığı məlumatda öz–özünü ifşa edir və məhkəmədən göndərilən məktubları yoldan ötənlərə verdiyini də təsdiqləyir. Sumqayıt Apellyasiya Məhkəməsinin hakimi Səyyad Qafari, çox keçmir ki, poçt rəisinin məktubunu əsas götürərək, qanunu qüvvəyə minmiş məhkəmə qərardadını ləğv edir. Bəli, adı çəkilən xanımın tamahı ucbatından mən ziyana düşdüm və bu gün də məhkəmələrdə sürünməkdəyəm. Hətta, Sumqayıt Apellyasiya Məhkəməsində özümü yandırmaq istəsəm də, polislərin müdaxiləsi intihara etdiyim cəhdin qarşısını ala bildi.
Digər bir məsələ haqqında da danışmaq istəyirəm. Məhkəmənin 12 iyul 2016–cı il tarixli qərardadı poçt xəbərnaməsinə əsasən 30 iyul 2016-cı il tarixdə sahibinə verilib. Bunula bağlı imza da var. Amma, poçt rəisinin sonradan məhkəməyə göndərdiyi ərizə-məlumata əsasən, guya məktub 21 sentyabr 2016–cı ildə çatdırılıb. Yəni, guya təxminən 51 gün sonra çatdırılıb. Görəsən 4 km-lik məsafəyə məktub 51 günə çatır? Bəlkə də kənd sakinləri gedib Almaniyanı gəzir və xanımın verdiyi məktubu sahibinə sonra çatdırır? Bəs 30 iyul 2016-cı il tarixli məhkəmə göndərişini kim imzalayıb? Buyurun, bacarırsınızsa özünüz ayrıd edin! Onu da bildirim ki, hər iki məktubu Ağalıq poçt şöbəsinin rəisi N.Adıgızəlova verib. Bu şəxs bir məktubu 30 iyul 2016-cı il tarixdə( şəxsin məktubu alması barədə), digərini isə 21 sentyabr 2016–cı il tarixdə yazır və həmin məlumatlar bir-birini də təkzib edir. Hələ möhürün üstündə qələmlə düzəliş də edir.
Sizcə belə bir saxtakar poçt rəisi təkrar vəzifəsini daşıya bilərmi? Kim əmin ola bilər ki, adı çəkilən bu xanım bir də belə səhvə yol verməyəcək? Bəlkə bir velosiped alıb hansısa 60-65 yaşlı xanıma verəsiniz ki, bu 4 km-lik məsafəni qət et. Yəqin ki, o halda sakinlərin məktubları vaxtında sahiblərinə çatdırılar və hər yoldan ötüb-keçən də narahat olmaz. Əslində N.Adıgözəlovanın əməlində saxtakarlıq və rüşvətxorluq amilləri var. Bilmirəm o, belə bir addımının qarşılığında qarşı tərəfdən nə qədər pul alıb, yalnız onu deyə bilərəm ki, bir–birinə zidd olan, özünü ifşa edən məktubu yazmaqla o, həmin ərizə-məlumatı məhkəməyə təmənnasız göndərməyib. Məhz, onun belə bir addımlarına görə mən dəfələrlə stress keçirmişəm, məhkəmələrdə sürünmüşəm, bu gün də özümü intihar etmək istəyindəyəm.

Ceyhun Abdullayev
GundemXeber.Az