Cavid Şirəliyev, jurnalist

Ölkədə özbaşınalıqların və haqsızlıqların həddi-hüdudu yoxdur. Rüşvət və korrupsiya ölkədə dözülməz vəziyyət yaradıb. Cəmiyyətdə demokratiyanın bərqərar olunması süni maneələrlə əngəllənir. Azad düşüncə və fikirə sahib olan insanlar təqib, təhdid və təzyiqlərə məruz qalır və ya son olaraq şərlənərək həbs olunurlar. Məhz bunun nəticəsidir ki, ölkədə 100-dən çox siyasi məhbus var. İnsanların hüquq və azadlıqları kobudcasına pozulur.

Məmur özbaşınalığı tüğyan edir. Hakimiyyətin yaratdığı mövcud sosial və iqtisadi anarxiya insanların normal yaşamaq imkanlarını əlindən alıb. 1000-lə ailələr yarı ac, yarı tox yaşayırlar. İnsanlar arasında etimadsızlıq mühiti yaranır, əxlaqi dəyərlərə sayğısızlıq gündən-günə artır. Gələcəyimizi təhdid edən bir durum yaşanır. Hakimiyyət və onun idarə etdiyi məmurlar ifrat səviyyədə azğınlaşıb. Ölkədə yaranmış ağır sosial və ictimai mühit onların anti-milli fəaliyyətlərinin bəhrəsidir.

Hakimiyyətin başçılığı altında ölkənin yeraltı və yürüstü təbii sərvətləri talanır, oğurlanır. Yüksək vəzifəli məmurlar dövlət büdcəsini talamaq hesabına xarici ölkələrdə yatırımlar qoyur, əhalinin böyük çoxluğu məqsədli surətdə yoxsulluq həddində yaşamağa məcbur edilir. Nə üçün xalqa normal yaşamaq imkanları yaradılmır? Bu xalq kifayət qədər bacarıqlı, zəhmətkeş və yaradıcı potensiala malikdir. Lakin həyat şəraitlərinin yaxşılaşmasından ötrü insanlara imkan verilmir. Ölkədə normal təhsil almaq, səhyyə xidmətindən istifadə etmək, sosial bərabərsizliyi aradan qaldırmaq ağır problemə çevrilib.

Mən, ölkədə demokratik dəyərlərin bərqərar olunmasını, insanların hüquq və azadlıqlarının qorunmasını, söz və mətbuat azadlığının təmin edilməsini, həmçinin məmur özbaşınalığına, rüşvət və korrupsiyaya son qoyulmasını istəyirəm.
7GUN.az-ın rəhbəri olaraq ölkədə məhz hakimiyyətin yaratdığı ədalətsizliyə, sosial bərabərsizliyə, məmur özbaşınalığına, dərəbəyliyə qarşı mövqeyimi ortaya qoymuşam. Bu mənim fəaliyyətimin əsasıdır. Mənim bu istiqamətdəki fəaliyyətmə görəmi təqib və təhdid olunaraq, təzyiqlərə məruz qalıram?! Hakimiyyət tərəfindən göstərilən bütün cəhdlər məni mövqeyimdən yayındırmayacaq. Hədəfim bəllidir!

Mən, ölkədə demokratik mühitin bərqərar olunması, insanların hüquq və azadlıqlarının təmin edilməsi, siyasi məhbusların müdafiəsi isitqamətində fəaliyyətimi davam etdirəcəyəm.

Hakimiyyət məni susdurmaq və mövqeyimdən çəkindirmək üçün müxtəlif təzyiq vasitələrindən istifadə edir. Bunun nəticəsidir ki, bu gün səhər saat 4 radələrində Masallı rayon Ərkivan qəsəbəsindəki evimizin yandırılmasına cəhd göstərilmişdir. Hakimiyyəti və onun idarə etdiyi məmurları belə çirkin və iyrənc təqib üsullarından əl çəkməyə çağırıram.

Bütün hallarda bundan sonra mənə və ailəmizə qarşı olacaq hər hansı bir təxribatın və digər arzuolunmaz hərəkətlərin məsuliyyəti birbaşa hakimiyyətin üzərinə düşür.