Demokratik İnteqrasiya Assosiasiyası sədr müavini Rəşad Ələkbərov: « Azərbaycanda ən böyük günah, müstəqil fikirə sahib olmaqdır»
Artıq bir ildən çoxdur ki, respublikamızda vətəndaş cəmiyyəti institutlarının fəaliyyətində ciddi problemlər müşahidə olunmaqdadır. Vətəndaş cəmiyyəti institutları ilə bərabər, media və söz azadlığının pozulması, jurnalistlərin həbsi, təqib olunması və.s kimi hallar da qalmaqdadır.
Rəşad Ələkbərov deyir ki, “ölkədə fəalların təqib olunması azad fikrin boğulması istiqamətində növbəti addımdır. Azərbaycanda artıq neçə illərdir ki, söz və media azadlığı ilə bağlı problemlər mövcuddur. Bu gün ölkədə yazılarına, fikirlərinə, hətta facebook statuslarına görə təqib olunan şəxslər də var. Amma, bu sadəcə son dövrün yeniliyi deyil. Artıq bir neçə ildir ki, Azadlıq radiosunun yayımı əngəllənir, azad medianın bütün maliyyə imkanları əllərindən alınıb. Onsuz da maliyyə problem ilə üz-üzə qalan yaşayan Azərbaycan mətbuatı, yalnız hakimiyyətdən alınan vəsaitin və ayrı-ayrı məmurların verdikləri maliyyənin ümidinə qalıbdır. Onlar da ictimai maraqları deyil, ayrı-ayrı şəxslərin və hökumətin maraqlarının təmilçisinə çevriliblər. Ölkə televiziyaları isə, bir pultdan idarə olunduğu üçün əhali arasında baş verən proseslərdən kənarda qalırlar. Asılı məbuat isə, ancaq yuxarıdan gələn göstərişləri tirajlayır. Nisbətən azad fəaliyyət göstərən media orqanları isə, təqiblərə məruz qalırlar. Meydan TV-nin əməkdaşlarının son iki ay müddətində davamlı olaraq hüquq-mühafizə orqanlarına çağırılması, gülünc iddialarla həbsə atılmaları və.s bütün bunların sübutudur. Rəşad Ələkbərovun sözlərinə görə, Azərbaycanda Avropa dəyərlərinin təbliğinə qarşı da işlər aparılır. Bu işdə AZTV rəhbəri Arif Alışanov xüsusi rol oynayır. Hətta, ölkəmizin Avropadan uzaqlaşdırılması siyasətinin aparılmasında xüsusi canfəşanlıq da edir. Özlərini hökumətin media orqanlarının rəhbərləri hesab edən şəxslər, daim Avropa ölkələrinin əleyhinə təbliğat da aparırlar. Bundan əlavə, ölkə ictimaiyyətində Avropa ilə bağlı mənfi fikirlər də formalaşdırmağa çalışırlar.
Rəşad Ələkbərov ölkənin normal inkişafını Avropaya inteqrasiyada görür: «Artıq dünyada sınanılmış təcrübə var. Bu gün istər demokratiya, istər əhalinin sosial müdafiəsi, istərsə də şəffaf idarəçilik və vətəndaş cəmiyyətinin formalaşdırılması baxımından Azərbaycanın, Avropadan əxz edəcəyi çox şeylər var. Belə bir dəyərlər Azərbaycan dövlətinin daha da güclənməsinə yardımçı ola bilər. Ölkənin qapılarını Avropaya bağlamaqla nəyəsə nail olmaq mümkün deyil.
XXI əsrdə insanların alternativ məlumat əldə etmək üçün internetə çıxışı varsa, onlar gec-tez həqiqətin nədən ibarət olduğunu, yaxşının pisdən fərqini anlayacaqlar. Azərbaycan insanı istər məişətdə, istər təhsildə, istərsə də digər sahələrdə özünü Avropanın bir hissəsi görmək istəyirsə, hökumətin yaratdığı süni maneələr uzun müddət davam gətirə bilməyəcək».

Hüseyn Abbasoğlu

gundemxeber.az