Hər kəsə bəllidir ki, bir müddət bundan öncə Yeni Azərbaycan Partiyasının Siyasi Şurası parlamentdə təmsil olunan üzvlərinə, məhz parlamentin buraxılması təşəbbüsü ilə çıxış etməyi tövsiyyə edən qərar qəbul etdi və çox keçmədi ki, parlament özünü buraxdı.

Özünü buraxan parlamentdə deputat olan şəxslərdən biri də Tahir Mirkişilidir. Hansı ki, o, bu gün də deputat olmaq istəyindədir və hal-hazlırda 42 saylı Sumqayıt II seçki dairəsindən namizəd olaraq qeydiyyatdan keçib. Bu ad-soyadı yerli sakinlərin əksəriyyəti heç vaxt eşitməyiblər. Hətta, bu ad-soyad jurnalistlərin əksəriyyətinə də tanış deyil. Bəlkə də, hansısa sakinlər onun səsini seçkidən-seçkiyə eşidiblər, bəlkə də eşitməyiblər. Bu barədə məlumatlar 42 saylı Sumqayıt II seçki dairəsində keçirdiyimiz sorğuda iştirak edən seçicilərin rəyindən bəlli oldu. Onların sözlərinə görə, Sumqayıtda Tahir Mirkişilinin üzünü heç zaman görməyiblər. Deputatın seçicilərinə qarşı laqeydliyi isə, ilk hal deyil. Bir çox millət vəkilləri seçkidən sonra vətəndaşları yada salmırlar. Adı çəkilən dairədən millət vəkili seçilmiş Tahir Mirkişili passiv deputatlar sırasında olan şəxslərdən biridir. Bu şəxs ikinci dəfə mandat sahibi olmağa iddialı olsa da, seçiciləri ilə maraqlanmır.

Belə ki, əldə olunan məlumatlara görə Sumqayıt şəhərinin 5-ci və 6-cı mikrorayonlarda yaşayan seçicilərin böyük bir hissəsi Tahir Mirkişilini tanımırlar. “Seçkilərdə gedib səs vermişik, amma sonra millət vəkilimizi görə bilməmişik. Onunla görüşməyi çox istərdik. Çünki ərazimizdə bəzi məsələlər var ki, hələ də həll olunmayıb. Ona görə də, millət vəkilimizin bizi bir araya yığacağı və onunla problemlərimizi müzakirə edəcəyimiz günü gözləyirik.” – deyə sakinlər bildiriblər.

Tahir Mirikişili Milli Məclisdə o qədər fəal deyil. Parlamentdə ən çox çıxış edən deputat Qüdrət Həsənquliyevdir. Hər mövzuda çıxış edir, eyni zamanda çox savadlı şəkildə, fikirlərini əsaslandıraraq məsələlərə açıqlamalar verir. Onunla yanaşı Fazil Mustafa, Qənirə Paşayeva, Aqil Abbas da qanun layihələrinə aktiv münasibət bildirir, cəmiyyətin problemləri barədə çıxış yolları təklif edirlər. Amma Hacı Madər, Kamaləddin Qafarov, Hacı Salayev, Əsabil Qasımov, Rüfət Quliyev kimi Tahir Mirkişili də “lal deputat”lar sırasında gedir.

Sumqayıtlılar onu da vurğulayırlar ki, Tahir Mirkişili gəlib məhəllələrdə yerli seçicilərlə görüş keçirmək əvəzinə, gedib YAP-ın qərargahında dairəyə aydiyyəti olmayan təhsil, səhiyyə və bağça müdirləri ilə görüşlər keçirir. O, bununla görüntü yaratmaq istəyir ki, guya sakinlər onu dəstəkləyirlər. Amma bu heç də belə deyil. YAP-ın qərargahına toplanan insanların heç birinin 42 saylı dairəyə aydiyyatı yoxdur. Belə olan halda hər kəsdə o ehtimal formalaşır ki, 9 fevrala təyin olunmuş seçkilər yuxarıların təyinatı əsasında​ keçiriləcək. Yəni, bizim səsimizi bir kimsə nəzərə almayacaq. İndiyə kimi qayğımıza qalmayan, heç bir problemimizi həll etməyən, hətta bircə dəfə olsun belə sifətini görmədiyimiz Tahir Mirkişiliyə biz səs verməyəcəyik. Ola bilsin ki o, səsimizi oğurlatdırsın, o halda biz də sözümüzü deməyə məcbur olacağıq. Çünki, biz elə deputatı tanımırıq, bu gün də tanımaq istəmirik.

GundemXeber.Az