Hörmətli GundemXeber.Az saytının oxucuları!

Hər birinizə aydındır ki, bir mətbu qurum olaraq fəaliyyət göstərdiyimiz ötən illər ərzində haqqın-ədalətin yanında olmuşuq, xalqımıza, dövlətimizə, Vətənimizə xidmət etməyi başlıca amalımız hesab etmişik. Belə bir səbəb üzündən də, bugünə kimi redaksiyamızın ünvanına hansısa problemlərlə, haqsızlıqlarla üz-üzə qalan, vətəndaş hüquqları pozulan və s. kimi məsələ və problemlərlə bağlı vətəndaşlar tərəfindən çoxsaylı müraciətlər daxil olub. Belə bir müraciətlərdən biri də, bir neçə gün bundan öncə Şəmkir rayonu, Qılıncbəyli kənd sakini Rüstəmov Kəramət Şəmməd oğlu və adı çəkilən bu şəxsə məxsus olduğu bildirilən istixanada çalışan 40 nəfər işçilər tərəfindən çatdırılmışdır. Onlar ünvanladıqları müraciətlərində qeyd edirlər ki, “əgər Şəmkir Regional​ Qaz İstismar İdarəsinin əməkdaşları tərəfindən indiki vaxtda mavi qazın verilməsi dayandırılarsa, o halda 5,5 ha sahəsi olan istixanada yetişdirilən pomidor və xiyar məhsullarının hamısı məhv olacaq”.



Müraciət müəllifləri onu da vurğulayırlar ki, “Şəmkir rayonu ərazisindəki istixanalarda pomidor və xiyar məhsulları aprel ayının sonuna kimi yetişir. Həmin vaxtlarda ​ məhsulların satışı başlayır və satışdan əldə olunan gəlirlərlə mavi qazdan istifadəyə görə yığılmış borclar ödənilir”. Onu da bildirək ki, sahibkarlıq fəaliyyəti ilə məşğul olan Kəramət Rüstəmovun, təkcə 2019-cu ildə “AZƏRİQAZ” İB-inin hesabına 421.057 (dörd yüz iyirmi bir) min manat məbləğində ödəniş həyata keçirdiyi bildirilir.

​Redaksiyamıza çatdırılan belə bir müraciət əsasında 03 aprel 2020-ci il tarixdə GundemXeber.Az saytında “AZƏRİQAZ” İB-nin əməkdaşları sahibkarı təhdid edir -​ ŞOK FAKT” başlıqlı tənqidi məqalə yayımladıq və üstüörtülü şəkildə onu da vurğuladıq ki, sahibkarlıq fəaliyyəti ilə məşğul olan Kəramət Rüstəmovun mavi qazdan istifadəyə görə borcu əmələ gəlibsə, deməli o, həmin borcu ödəməlidir. Belə olan halda​ tərəflər bir-birini başa düşməli və problemin aradan qaldırılması yöndə lazımi addımlarını da atmalıdırlar. Havaların soyuq keçdiyi indiki vaxtlarda istixanaya verilən mavi qazın dayandırılması, birbaşa sahibkarın “məhv olunması” deməkdir. Yəni, bir redaksiya olaraq yanaşmamızı belə bir formada ifadə etmişik ki, “AZƏRİQAZ” İB-i, Şəmkir Regional​ Qaz İstismar İdarəsinin əməkdaşları sahibkarlıq fəaliyyəti ilə məşğul olan Kəramət Rüstəmova bir qədər möhlət vaxtı verməyə çalışmalıdır ki, o, həm məhsulunu yetişdirə bilsin, həm də istixanada çalışanların dolanışığını təmin etsin. Əgər indiki vaxtda qeyd olunan istixanaya mavi qazın verilməsi dayandırılarsa, o halda təkcə sahibkar və orada çalışan işçilər deyil, bütövlükdə ölkəmizin iqtisadiyyatına müəyyən qədər zərbə dəymiş olacaq.
Onu da unutmayaq ki, cənab Prezidentin 19 mart 2020-ci il tarixli fərmanı ilə Koronavirusla Mübarizəyə Dəstək Fondu yaradıldı. Bu fondun vəsaitlərinin formalaşması mənbələri sırasında dövlət büdcəsi ilə yanaşı, fiziki və hüquqi şəxslərin könüllü ödəmələri də yer aldı. Həmin ödəmələrin həyata keçirilməsində isə, məhz sahibkarlar daha fəallıq nümayiş etdirdilər. Belə bir vaxtda ölkə sahibkarlarının öz səylərini, təşəbbüslərini birləşdirmələri, Koronavirusla Mübarizəyə Dəstək Fonduna hayan olmaları, dövlətimizlə həmrəy olduqlarını nümayiş etdirmələri və s. olduqca alqışlandı. O halda sual oluna bilər ki, bir tərəfdə ölkə rəhbəri cənab İlham Əliyev sahibkarlara qarşı həssaslıq nümayiş etdirir, yerli vəzifə sahiblərinə lazımi tapşırıqlarını verir, digər tərəfdə isə, 40 nəfər işçinin işlə təmin olunduğu istixanaya “AZƏRİQAZ” İB-i, Şəmkir Regional​ Qaz İstismar İdarəsi möhlət vaxtı vermək niyyəti olmadığının arxasında nələr durur? Axı, sahibkar əmələ gələn borcu ödəməkdən imtina etmir, sadəcə olaraq həmin borcu ödəmək üçün, bir qədər möhlət vaxtı verilməsini istəyir.
Düşündürücü hal odur ki, GundemXeber.Az saytı olaraq problemin varlığını ictimailəşdirdiyimiz bir vaxtda, geniş ictimaiyyət tərəfindən heç də lazımınca həzm olunmayan bəzi media qurumları, sanki “AZƏRİQAZ” İB-i, Şəmkir Regional​ Qaz İstismar İdarəsinin mətbu orqanı kimi çıxış etdilər. Belə bir halın varlığı da, məhz ortaya çoxsaylı sualların çıxmasına səbəb olmaqdadır. Yəni sual oluna bilər ki, bir kimsənin oxumağa heç bir halda həvəs göstərmədiyi, həmçinin GundemXeber.Az saytını aztirajlı sayt hesab edən sayt rəhbəri, görəsən keçmişdəki addımlarını unudubmu ki, bu gün belə bir mövqe ortaya qoyur? Yəni, 2007-ci ildə yazmış olduğu “Qarabağ gündəliyi” məqaləsində xocalıların və Azərbaycan ordusunun şərəf və ləyaqətini təhqir etdiyi üçün, Yasamal Rayon Məhkəməsinin hökmü ilə 3 (üç) il müddətinə azadlıqdan məhrumedilən bir kimsədən, bu gün haqqın-ədalətin mövqeyində durmasını gözləmək olarmı? Digər tərəfdən, adını çəkmək istəmədiyimiz bir şəxs həbs olunduqdan sonra, özünün iş yoldaşlarını və onu sona qədər müdafiə edən müxalif camiəni satıb, hakimiyyətin bəzi qüvvələrinin qucağnda qərarlaşmağı üstün tutdusa, deməli... Bu gün də sadə insanların tələb etdikləri haqlarının üstündən asanlıqla xətt çəkib, ictimai rəyə zərrə qədər təsiri olmayan saytında onların əleyhinə şər-böhtan yayımlanırsa, deməli həmin şəxsin satqınçılıqdan başqa bir adı yoxdur. Adını çəkib reklam etmək istəmədiyimiz ermənipərəst olan bu şəxs, son günlər Bakının küçələrinə qayıdış edən ermənilərin təmtəraqlı təbliğatçılarından birincisi olub. Əslində, belə şəxslərin bu tip yazılarını cəmiyyət anındaca rədd edir və ​ nifrətini də gizlətmirlər.

GundemXeber.Az