Bu günlərdə “Sosial Dövlət Naminə” İctimai Birliyindən Abşeron Rayon Höküməli qəsəbəsi, Yeni-yaşayış sahəsində yaşayan Şəhid, Qazi və bir qrup sakinlərin adından GundemXeber.Az-ın redaksiyasına şikayət məktubu daxil olub.

Daxil olan məktubda adıçəkilən qurumun rəhbəri Faiq Əhmədov əyani şəkildə bildirir ki, “su qıtlığından əziyyət çəkən vətəndaşlar problemləri ilə bağlı Azərsu ASC-nin sədri Qorxmaz Hüseynova və Abşeron Rayon İçra Hakimiyyətinin Başçısı İradə Gülməmmədovaya müraciət etsələr də heç bir tədbir görülməyib. Biz də mətbuat vasitəsi ilə hakimiyyətin yuxarı instansiyalarına çatdırılmasını nəzərə alaraq, vətəndaşların müraciətini sizin xəbər portalı vasitəsi ilə yayılmasını xahiş edirik”. Biz də redaksiya olaraq, “Sosial Dövlət Naminə” İctimai Birliyindən redaksiyamıza sakinlər adından ünvanlanan şikayət məktubunu olduğu kimi çoxsaylı oxucularımızın diqqətinə təqdim edirik:
Yazaraq sizə bildiririk ki, biz 10 ildən çoxdur ki, Höküməli qəsəbəsi,Yeni yaşayış massivində yaşayırıq.



Lakin hələ də bizim komunal məsələlərimiz öz həllini bu günə kimi tapa bilməyibdir. Bizim Qəsəbədə su, kanalizasiya, telefon, uşaq baxçası, orta məktəb, istirahət parkı yoxdur və nəqliyyat yolumuz isə həddindən artıq bərbad gündədir.
Biz bu barədə dəfələrlə yuxarıda adları çəkilən dövlət qurumlarına müraciət etsək də bu günə kimi səsimizə səs verən yoxdur. Təkcə içməli su məsələmizin həlli üçün dəfələrlə Azərsu ASC-in sədri Qorxmaz Hüseynova yazılı müraciət etsək də bu günə qədər heç bir cavab ala bilməmişik. Əvəzində isə içməli suyu bizə ağır tonnajlı maşınlarda mənşəyi məlum olmayan yerlərdən 25 manata gətirirlər.



Hər ay biz də məcburiyyət qarşısında qalaraq 50(əlli) manat ödəyərək 2 maşın içməli su alırıq ki, bu da bizim kimi kasıb ailələri həddindən artıq çətin duruma salır. Nəzərinizə çatdırırıq ki, hazırda yaşadığımız qəsəbədə 10-dan çox Şəhid və Qazi ailələri var ki, onların ailə üzvlərindən də heç biri işləmir, işləyənlərdə günə muzdlu işləyib 3-5 manat gündəlik çörək pulu qazanırlar. Ancaq yuxarıda oturan məmurlar və şəxsən də Azərsu ASC-in sədri Qorxmaz Hüseynov düşünmür ki, acıncaqlı vəziyyətdə olan, yoxsul , işləmək qabliyyəti olmayan, aztəminatlı ailələr hər ay 50(əlli) manat ödəməklə suyu necə alacaq?



Nəzərinizə çatdırmaq istəyirik ki, sözü gedən su xətti bizim hazırda yaşadığımız yaşayış evlərinin cəmi 500(beş yüz) metr aralı məsafəsindən keçir. Həmin su xəttindən içməli suyun bizə verilməsi üçün hesab edirik ki, dövlət büdcəsindən elə də böyük məbləxdə vəsaitə tələb olunmayacaq. Əks halda biz şəhid ailələrinə ödənilən puldan yığışaraq Qorhmaz Hüseynovun rəhbəri olduğu “Azərsu” ASC-nə dəstək olmaq üçün pul ödəməyə hazırıq. Bir daha qeyd edirik ki, sizə müraciət edən ailələrin çox hissəsi şəhid və qazi ailələridir. Bizim övladlarımız cənab prezidentimiz İlham Əliyevin bir çağırışı ilə bu vətən, bu torpaq üçün canlarını fəda elədilər. İndi cənab prezidentimiz İlham Əliyev tərəfindən təyin edilən məmur Qorhmaz Hüseynovun budurmu şəhid və qazi ailələrinə qoyulan hörməti? Budurmu şəhid və qazi ailəsinə olunan diqqət və qayğı? Axı nəyə görə cənab prezidentimiz İlham Əliyevin rəhbəri olduğu ölkənin vətəndaşı isti yay günlərində susuzluqdan, qışda isə buzlamış mənşəyi məlum olmayan sudan evimizin içində içməli su kimi istifadə etməlidir?



Cənab prezidentimiz İlham Əliyev, hər dəfə çıxışlarında dövlət məmurlarına xüsusi göstəriş verir ki, insanları incitməyin, onların problemlərini dərhal yerində həll edin. Amma ki, nə fayda? Nə bizim yazdığımız şikayət məktublarımıza baxan var, nə də cənab prezidentimizin çıxışlarına əməl edən?! Onu da qeyd etmək istəyirik ki, qəsəbənin problemləri ilə əlaqədar olaraq dəfələrlə Abşeron Rayon İçra Başçısı İradə Gülməmmədovanın qəbuluna yazılsaq da bizi qəbul etməkdən imtina edib. Bilmirik ki, biz dərdimizi kimə deyək. Yazdığımız məktublarımıza da baxan yoxdur .
Hörmətli redaksiya!
Sizdən son dərəcə xahiş edirik ki, GundemXeber.Az olaraq bizim də sosial problemlərimizin işıqlandırılmasını və müvafiq idarə rəhbərlərinin diqqətini problemlərimizə yönəldəsiniz.

Hörmətlə: Abşeron Rayon Höküməli qəsəbəsi, Yeni-yaşayış sahəsində yaşayan sakinlər

GundemXeber.Az