Əslində mətbuat elə sahələrdəndir ki, burada hansısa təşkilatlanma, idarəetmə işinin həyata keçirilməsi üçün ən azından 3 İLLİK TƏCRÜBƏ lazımdır. Necə ki hələ MEDİA-mız KİVDF olandan dövlətin mətbuata qayğısını şərtləşdirən amillərdən biri kimi məhz çoxillik təcrübə faktoruna da önəm verilir, eləcə də mətbuatın yönəldilməsində də bu məqam əhəmiyyətli dərəcədə vacibdir.

Amma Əhməd İsmayılovun təyinatı zamanı bu məqama diqqət ayrılmadı, bu məısələ vacib götürülmədi. Ona görə də yaxasında “Gəmiçilik sahəsində xidmətlərə görə” medalını gəzdirən birisi olduqca qəliz sahə hesab olunan və normalda "4-cü hakimiyyət" olaraq anlaşılan mətbuatın dövlət təmaslarının müəyyənləşdirilməsi işinə rəhbər gətirildi.
Kimdir Əhməd İsmayılov. İlk olaraq onun rəsmi mətbuatda yayılan tərcümeyi-halını xatırlayaq:
Ə.İsmayılov MEDİA rəhbərliyindən əvvəl Azərbaycan Respublikasının Nəqliyyat, Rabitə və Yüksək Texnologiyalar Nazirliyi yanında Dövlət Dəniz Agentliyinin direktor müavini vəzifəsində çalışıb.
Əhməd İsmayılov 1980-ci ildə anadan olub.
2002-ci ildə Bakı Dövlət Universitetinin “Hüquqşünaslıq” ixtisası üzrə bakalavr, 2016-cı ildə Azərbaycan Respublikasının Prezidenti yanında Dövlət İdarəçilik Akademiyasının “Dövlət qulluğunun təşkili və idarə edilməsi ixtisaslaşması” ixtisası üzrə magistr dərəcəsi alıb.
2002-ci ildə Bakı Neft Energetika Kollecində müəllim, 2004-2005-ci illərdə Azərbaycan Respublikasının İnsan Hüquqları üzrə Müvəkkilinin (Ombudsman) Aparatının Vətəndaş və siyasi hüquqların müdafiəsi sektorunda böyük məsləhətçi, 2005-2008-ci illərdə Azərbaycan Respublikasının Nəqliyyat Nazirliyinin Hüquq şöbəsində baş məsləhətçi vəzifəsində işləyib.
2008-2011-ci illərdə Azərbaycan Respublikasının Dövlət Dəniz Administrasiyasının Hüquq, kadr və beynəlxalq əlaqələr şöbəsinin müdiri,
2011-2018-ci illərdə Aparat rəhbəri vəzifəsində çalışıb.
20 iyun 2018 – ci il tarixdən Dövlət Dəniz Agentliyinin direktor müavini vəzifəsində çalışıb.
2009-2015-ci illərdə Yeni Azərbaycan Partiyasının “Dənizçilər” İlk Ərazi Təşkilatının sədri olub.
Əhməd İsmayılov Azərbaycan Respublikası Prezidentinin 25 iyun 2014-cü il tarixli 580 nömrəli Sərəncamı ilə “Dövlət qulluğunda fərqlənməyə görə” medalı, 23 iyun 2017-ci il tarixli 3028 nömrəli Sərəncamı ilə “Tərəqqi” medalı və 20 oktyabr 2018-ci il tarixli 587 nömrəli Sərəncamı ilə “Gəmiçilik sahəsində xidmətlərə görə” medalı ilə təltif edilib.
O, 2019-cu ildən etibarən Heydər Əliyev Fondu “Regional İnkişaf” İctimai Birliyində ekspert vəzifəsində çalışıb.
Son olaraq isə Azərbaycan Respublikası Prezidentinin Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin müdiri Ədalət Vəliyevin müavini vəzifəsinə təyinat alıb.

***

Medianın İnkişafı Agentliyinin sədri olaraq Əhməd İsmayılovun özkeçmişinə nəzər saldıqda burada mətbuatla bağlı hansısa abzası görmürük. Yuxarıda da qeyd etdik, bu, olduqca vacib amildir. Ona görə də ortada yetərincə yanlışlar olacaq. Necə ki bu gün Əhməd İsmayılov Medianın İnkişafı Agentliyinin sədri olaraq bir-birinin ardından bu yanlışları buraxmaqdadır.
O, məcbur idi ki, jurnalistlərlə ilkin təmaslarının qurulmasında yanına məsləhətçilər alsın. Və hər şey də məhz onun məsləhətçilərinin yanlışlarından baş verməkdədir. Çünki adam təpədən dırnağa qədər MƏTBUATA YAD birisi olduğundan başqalarının sözünü eşitmək zorundadır. Başqaları isə ona daha çox subyektiv informasiyalar verdiyindən cənab İsmayılovun media haqqında təsəvvürlərini heç bir zaman OBYEKTİV olaraq qəbul etmək olmaz.
Bunu nəticəsidir ki, bu gün Media haqqında qanunun özü belə KAL ARMUD olaraq parlamentin boğazında ilişib qalıb. Biçarə deputatlar da 3 dəfə oxuyub təsdiqlədikləri (başqa cür ola da bilməz, onlara belə təlimat gəlib) qanunu yenidən müzakirəyə hazırlaşırlar.

***

Bu hələ harasıdır. Əhməd İsmayılovun naşılığı özünü çox göstərəcək. Gərək ölkənin başbilənləri yeni qanunun qəbulundan əvvəl Əhməd İsmayılovun özünə "əlvida" deyərdilər. İnbad etməyin adı yoxdur. Adam bacarmır, bacarmayacaq da...
Mətbuatı hansısa dostların klubuna çevirmək olmaz. Bu, 4-cü hakimiyyətdir və dövləti-aliyənin məıhrəmlərindən hesab olunur, hansısa beş-on növcavanın əyləncə məkanı deyil...
Bunu dövlət rəsmiləri nəzərə almalı və ilk başdan onunla media arasındakı vasitəçiliyinə nəzərə yetirməlidir.
Vacib olanı budur və bundan sonra oturub rahat-rahat hansı əsaslarla işləməli olduğumuzu müəyyən edə bilərik.

Məhəmməd Ərsoy
DİA.AZ-ın Baş redaktoru