Artıq bir neçə dəfədir ki, GundemXeber.Az saytında İmişli rayonu, Hacırüstəmli kənd sakini Dərgah Əhliman oğlu Mehtiyevin 27 avqust 2018-ci il tarixdən üz-üzə qaldığı problemlə bağlı yazı yayımlamışıq. Yəni, yayımladığımız yazılarda qeyd etmişik ki, Dərgah Mehtiyevə məxsus olan, dövlət nömrə nişanı 99-CF-244 olan “Mersedes” markalı avtomobilindən, onun 16 min manat pulu, sürücülük vəsiqəsi, bir neçə şəxsiyyət vəsiqələri, bank kartları və əl çantası oğurlanır. Oğurluq hadisəsi Şirvan şəhərindəki Müalicə Diaqnostika Mərkəzinin qarşısında baş verir və bu fakt ilə bağlı Dərgah Mehtiyev dərhal Şirvan ŞPŞ-nə, bir çox dövlət qurumlarına, o cümlədən DİN-nə rəsmi qaydada şikayət ərizələrini göndərir. Bu şəxsin yazmış olduğu şikayət ərizələri əsasında Şirvan ŞPŞ-də Azərbaycan Respublikası CM-nin 177.2.4-cü maddəsi ilə cinayət işi açılır və Dərgah Mehtiyev zərərçəkən şəxs qismində tanınır. Buna baxmayaraq, baş vermiş oğurluq faktı ilə bağlı ŞPŞ-də başlanmış cinayət işinin istintaqını aparan müstəntiq Əhməd Baloğlanov, zərərçəkən şəxsin iddiasına görə işin mühüm hallarını istintaqdan gizlədir. Yəni, hadisənin baş verdiyi ərazidə müşahidə kamerasının olmasına baxmayaraq, həmin kameraya baxış keçirmir. Bundan əlavə, oğurluq hadisəsi baş verən vaxtlarda Müalicə Diaqnostika Mərkəzində mühafizəçi işləyən şəxsin şəxsiyyəti araşdırılıb müəyyən olunmur. Bu cür hərəkətlər də onu söyləməyə əsaslar verir ki, deməli oğurluğu törətmiş şəxs və ya şəxslər Şirvan ŞPŞ-nin əməkdaşlarına məlumdur.

    Qeyd edək ki, bu işlə bağlı Azərbaycan Respublikası CM-nin 177.2.4-cü maddəsi ilə cinayət işi qaldırılsa da, iş üzrə icraat dəfələrlə dayandırılır. Sonuncu dəfə, yəni 01 dekabr 2021-ci il tarixdə bu yöndə çıxarılmış qərar Şirvan şəhər Prokurorluğu tərəfindən ləğv olunur və toplanmış iş materialları təkrar ŞPŞ-nin istintaq bölməsinə qaytarılır. Onu da qeyd edək ki, zərərçəkən Dərgah Mehtiyev 09 dekabr 2021-ci il tarixdə cinayət işinə aid  materialların surətlərini əldə etmək məqsədilə Şirvan ŞPŞ-nə müraciət edir. Təəssüflər olsun ki, qarşı tərəf bundan imtina edir və imtina etmələrini onunla  əsaslandırırlar ki, yalnız istintaq tam şəkildə baş çatdıqdan sonra, iş materiallarının surətləri maraqlı tərəflərə verilə bilər. Əslində iş materiallarının surətlərinin Dərgah Mehtiyevə verilməsindən imtina olunması, birbaşa onun hüquqlarının kobud şəkildə pozulması demək olur. Çünki, hüquq bütün hallarda cinayət işinin ibtidai istintaqı başa çatdıqdan sonra, mümkün məhkəmə baxışına hazır olmaq məqsədilə zərərçəkmiş şəxsə, təqsirləndirilən şəxsə, müdafiəçiyə və s. iş materialları ilə tanış olmaq, onların surətlərini əldə etmək ixtiyarı verir. Digər tərəfdən, Azərbaycan Respublikası CPM-də proses iştirakçılarının cinayət prosesinin istənilən mərhələsində iş materialları ilə tanış olmaq, surətlərini əldə etmək hüququ da nəzərdə tutulub. Bundan əlavə, Azərbaycan Respublikasının Konstitusiyasına, İnsan Hüquqları üzrə Avropa Məhkəməsinin presedent hüququna, həmçinin Azərbaycan Respublikasının tərəfdar çıxdığı beynəlxalq hüququn digər normalarına əsasən də, bunlar heç zaman qadağan olunmur. Hətta, Daxili İşlər Nazirliyi Baş Cinayət Axtarış İdarəsinin rəisi cənab Arzu Daşdəmirov, Dərgah Mehtiyevin yazmış olduğu şikayət ərizəsinə verdiyi cavabda, onun iş materiallarının surətləri ilə tanış olmaq hüququ tanınıb və bununla bağlı müstəntiq qarşısında vəsatət qaldırmaq səlahiyyətinə malik olduğu da izah olunub. Bu belə olduğu halda zərərçəkən Dərgah Mehtiyevə qarşı bəslənən belə bir münasibətin varlığı, bu gün ortaya çoxsaylı sualların çıxmasına səbəb olur. Yəni sual oluna bilər ki, əgər qanun zərərçəkən şəxsə cinayət işinə aid materialların surətlərini əldə etmək ixtiyarı verirsə, səbəb nədir ki, Şirvan ŞPŞ-də qanunun belə bir tələbinə əməl olunmur?

   Bir xatırlamanı da yada salaq ki, 08 aprel 2022-ci il tarixdə GundemXeber.Az xəbər portalında “Şirvan ŞPŞ-də 16 min manatlıq oğurluq faktı niyə araşdırılmır?- SƏBƏB” başlıqlı məqalə yayımlandıqdan sonra, həmin günün səhəri redaksiyamızın elektron poçtuna DİN-in Mətbuat Xidmətinin Şirvan regional qrupunun baş inspektoru, polis baş leytenantı cənab Nizam Həmidov tərəfindən mövqe göndərildi və həmin mövqedə qeyd olunmuşdur ki, “Zərərçəkən İmişli rayonu, Hacırüstəmli kənd sakini Dərgah Əhliman oğlu Mehtiyev 2018-ci ildə Şirvan Şəhər Polis Şöbəsinə müraciət edib və özünə məxsus avtomobildən oğurluq olunması ilə bağlı məlumat verib. Məlumatla əlaqədar şöbə əməkdaşları hadisə yerində olublar, ilkin araşdırmalar aparılıb. Lakin həmin vaxt hadisəni törədən şəxs və ya şəxslərin isti izlərlə müəyyən edilərək saxlanılması mümkün olmayıb. Hadisə ilə bağlı əməliyyat-axtarış tədbirləri davam etdirilir”. Bəli, biz bunu özümüz üçün borc bildik və göndərilmiş mövqeni Qanunun tələbi əsasında GundemXeber.Az xəbər portalında da yayımladıq. Amma, hər kəs üçün, ələlxüsus bizim üçün qaranlıq qalan məsələ o oldu ki, cənab Nizam Həmidov tərəfindən digər halların varlığına heç bir halda aydınlıq gətirilmədi. Məsələn, hansı səbəbdən hadisənin baş verdiyi ərazidə müşahidə kamerasının olmasına baxmayaraq kameraya baxış keçirmir, oğurluq hadisəsi baş verən vaxtlarda Müalicə Diaqnostika Mərkəzində mühafizəçi işləyən şəxsin şəxsiyyəti araşdırılmır, zərərçəkən Dərgah Mehtiyevin cinayət işinə aid  materialların surətlərini əldə etmək hüququ və s. təmin olunmur. Yəni, indiyə kimi DİN-in Mətbuat Xidmətinin Şirvan regional qrupunun baş inspektoru, polis baş leytenantı cənab Nizam Həmidov tərəfindən lazımi araşdırmalar aparılaraq, bu kimi halların varlığına hansısa formada mövqe bildirilməyib. Deməli, Şirvan ŞPŞ-i əməkdaşlarının belə bir addımlarının kökündə baş vermiş cinayət işini ört-basdır etmək, vaxtı uzatmaq, son anda vətəndaşı dövlət orqanlarından narazı salmaq, zərərçəkən şəxsdə hansısa formada inamsızlıq hissi formalaşdırmaq və s. durur. Bundan əlavə, bu cür addımlar daxili işlər naziri cənab Vilayət Eyvazovun, daxili işlər orqanları sahəsində həyata keçirdiyi əsaslı islahatlara, atdığı müdrik addımlara müəyyən qədər xələl də gətirir. Düşünürük ki, cənab Nazir Şirvan Şəhər Polis Şöbəsi əməkdaşlarının bu cür addımlarını şəxsi nəzarətinə götürəcək və zərərçəkən Dərgah Mehtiyevin pozulmuş hüquqlarının bərpası yöndə aidiyyatı üzrə lazımi tapşırığını da verəcək. 

Mövzuya qayıdacağıq.

GundemXeber.Az