Can verməkdə olan Azərbaycan səhiyyəsini elə vəziyyətə salıblar ki, yüz təbib-loğman, səhiyyə sistemi olsa da onu bu tezliklə xilas etmək olmaz. Səhiyyə nazirliyini məhv edərək  “fatihə”sini verdiyi bir sistemi ancaq möcüzə qurtara bilər. Bu möcüzəni isə TƏBİB göstərə bilmədi!

Xatırladaq ki, 2018-ci ildə  Azərbaycan Respublikasının Prezidenti İlham Əliyev ölkədə icbari tibbi sığortanın tətbiqinin təmin edilməsi məqsədilə İcbari Tibbi Sığorta üzrə Dövlət Agentliyinin  nəzdində “Tibbi Ərazi Bölmələrini İdarəetmə Birliyi” publik hüquqi şəxsin (TƏBİB) yaradılması haqqında Fərman imzalayıb. TƏBİB vasitəsilə beynəlxalq təcrübəni nəzərə almaqla, tabeliyində olan tibb müəssisələrinin idarə edilməsinin təkmilləşdirilməsi, fəaliyyətinin optimallaşdırılması, habelə daha səmərəli idarəetmə üsullarını tətbiq edərək əhaliyə göstərilən tibbi xidmətlərin keyfiyyətini yüksəltməsi nəzərdə tutulurdu. Yaradılan qurumun belə kreativ bir abreviaturaya sahib olması çoxlarını ümidləndirmişdi. Çünki,buna qədər ölkəmizdə ASAN, ABAD,DOST kimi yüksək xidmət nümunəsi formalaşdıran dövlət qurumları fəaliyyət göstərirdi. TƏBİB-in də bu qəbildən korrupsiya və rüşvətxorluğa sarsıdıcı zərbə vuracağı gözlənilirdi. Amma və heyhat ki...

Artıq  4 ilə yaxındır ki, ölkəmizdə icbari tibbi sığortanın tətbiqinə başlanılıb. 

«Gündəm Xəbər» qəzetinə verilən məlumatlara görə,  TƏBİB-in idarəçilik sistemi yalnız və yalnız icbari sığortanın, yəni Zaur Əliyevin xüsusi göstərişləri əsasında aparılır. İcbari tibbi sığorta sistemində isə fəaliyyət əsasən qazanc, biznes üzərində qurulur. Bir sözlə, bu da nəticədə vətəndaşlar süründürməçiliklə üzləşir, bir çox hallarda isə xəstəxanalarda həkimlər tapılmır. İndiyə qədər xəstə hesabına yaşayan ağ xalatlılar dövlət hesabına yaşamaq istəmirlər. Xəstəxanalarda ciddi dərman qıtlığı hökm sürür. Sanki,hansısa bir qüvvə aparılan islahatlara zərbə vurmağa,onu gözdən salmağa çalışır.

Hazırda səhiyyə sistemində bəzi müəssisələrin (institutların) TƏBİB-dən alınaraq Səhiyyə nazirliyinə verilməsi ictimaiyyətin səhiyyəyə olan münasibətini dəyişmədi. Hazırda «güclərin» idarə etdiyi bu sistemdə hərc-mərclik baş aləıb gedir. Elə bu baxımdan «əl dəyişərkən» «kadr islahatları» adı altında institut tipli müəssisələrdə işləyənlər, yəni Zaur Əliyevə yaxın olan adamlar həmin müəssisələrdən çıxarılaraq öz tabeçiliyində olan müəssisələrə rəhbər gətirilir. Ən pisi odur ki, xəstəxanalarda həkimlər Baş həkimin və yaxud şöbə müdirlərinin göstərişləri ilə deyil, bu sahədə heç bir səriştəsi olmayan bank sektorlarından icbari tibbi sığorta vasitəsilə xəstəxanalara təyin olunan direktor müavinləri tərəfindən idarə olunur. Nəticədə isə sözün əsl həqiqi mənasında TƏBİB-in fiaskosu yaranır. 

Ataların yaxşı bir məsəli var-görünən dağa bələdçi nə lazımdır. Elə TƏBİB-in də ilk addımları onun haqqında ilkin təəssürat yaratmışdı. Amma,təəssüf ki,bu təəssürat heç də gözlənilən kimi deyildi. Dövlət başçısının başlatdığı islahatlara cavab verməyən belə fəaliyyət fiaskoya uğramağa məhkumdur. Hesab edirik ki, indiki həssas durumda belə fəaliyyət düşmən dəyirmanına su tökməyə bərabərdir. Dövlət başçısı səhiyyə sisteminin inkişafı üçün gərəkəndən də artıq addımlar atıb, qayğı göstərib. Onun diqqətinə verilən cavab budurmu? Yəqin ki, Cənab Prezident bu ciddi məsələyə də həssaslıqla yanaşacaq. Yoxsa ki, belə TƏBİB-dən türkəçarə daha yaxşıdır!

«Gündəm Xəbər»