Ombudsman insanların konstitusiya hüquqlarını yox, məmurların korrupsiya hüquqlarını qoruyur

“Boyləcə xidmət olunur millətə!    Kim nə deyər bizdə olan qeyrətə?!” (Mirzə Ələkbər Sabir)

Bakı İnzibati Məhkəməsinin hüquqi varisi olduğu 1 saylı Bakı İnzibati-İqtisadi Məhkəməsinin 05.07.2017-ci il tarixli 2-1(81)-1889/17 saylı Azərbaycan Respublikası dövlətinin adından çıxardığı qərarı 6 il sonra borclu DSMF-in Hərbi Qulluqçular və Xüsusi Rütbəli Şəxslərlə İş İdarəsinin hüquqi varisi Xüsusi Şərtlərlə Təyinat üzrə Mərkəzi Filialı özbaşına ləğv edib. Sözügedən məhkəmə qərarı ilə pensiyasına “Əmək pensiyaları haqqında” qanunun 19.2.5 maddəsi əsasında aylıq 110 manat əlavə qazanan 1-ci dərəcəli Qarabağ əlili bu ilin aprelindən halal qanpulundan haramlıqla məhrum olunub. Dövlət hakimiyyətinin- Prezidentin, Milli Məclisin, Konstitusiya Məhkəməsinin, Ali Məhkəmənin ləğv edə bilmədiyi dövlətin (adından) qərarını üzərinə öhdəlik qoyulmuş borclu filial, məmur necə ləğv edə bilər? 

Ali dövlət hakimiyyəti, hüquq mühafizə orqanlarına, Hesablama Palatasına, Maliyyə Nazirliyinə, Ombudsmana edilən müraciətlər beş aydır sonuc vermir, borclu “dedığım dedığdır” prinsipi ilə “başını kola soxub”, nə Konstitusiyanı görür, nə məhkəmə qərarını. “Gördüyü”- “görüm-baxım” etdiyi elə tələbkar 1-ci dərəcəli Qarabağ əlilinin üz tutduğu orqanlardır. Konstitusiya elə “alidir”, dövlət elə “hüquqi, demokrtaik” respublikadır ki,  dövlət orqanları özbaşınalığı, hüququn ləğvini, vicdansız davranışı “görüm-baxımla” görməzliyə vururlar. 

Ombudsmanın məhkəmə qərarlarının icrasının gecikdirilməsi ilə bağlı insan hüquqlarının pozulmasına dair şikayətlərə baxmaq hüququ özünün haqqında konstitusiya qanununda yazılıb. Nə yazıq, insan hüquqları üzrə müvəkkillik sözdədir, illərdir gecikdirilmə bir yana, məhkəmə qərarlarının icra olunmamasına elə qiymət verilir ki, bilmirsən,  Ombudsman insan hüquqlarını qoruyur, yoxsa məmurların korrupsiya-kommersiya “hüquqlarını”? 

Ombudsman Aparatının rəhbəri Aydın Səfixanlının 16.08.2023 tarixli 1-ci dərəcəli Qarabağ əlilinin şikayətinə cavabı ölkədə insan hüquqlarının acınacaqlı durumunu ortaya qoyur. Dövlətin adından çıxarılan 05.07.2017 tarixli, 2-1(81)-1889/17 saylı Bakı İnzibati Məhkəməsinin qərarını borclu DSMF-in ləğv edərək, 110 manatı kəsməsindən şikayəti qanuna zidd olaraq barəsində şikayət edilən borcluya göndərən aparat rəhbəri ... aldığı  “görüm-baxım” cavabını insan hüquqlarının müvəkilliyi kimi, görün, necə sırıyır:”...XİDMƏTİ ARAŞDIRMA zamanı ƏMƏK PENSİYANIZIN SIĞORTA HİSSƏSİNƏ ƏLAVƏ OLARAQ 110 MANAT ÖDƏNİLƏN PUL VƏSAİTİ 1 YANVAR 2021-Cİ İL TARİXİNƏDƏK ÖDƏNİLMƏLİ OLDUĞU HALDA, 1 APREL 2023-CÜ İL TARİXİNƏDƏK ÖDƏNİLDİYİ AŞKAR EDİLMİŞDİR. BU SƏBƏBDƏN ARTIQ ÖDƏNİLMİŞ 3188.37 MANATIN ...QISA  MÜDDƏTDƏ MƏRKƏZİ FİLİALA TƏQDİM EDİLMƏSİ bildirilib”. Özünüz qiymət verin, Ombudsman insan hüquqlarını qoruyur, yoxsa inzibati-dövlət orqanlarını  rüşvət-korrupsiya “hüquqlarını”? 1-ci dərəcəli Qarabağ əlili məhkəmə qərarı ilə ayrılan 110 manatlıq pensiyaya əlavənin 6 ildən sonra ləğv edilməsindən şikayət edir, insan hüquqları üzrə müvəkkil borclunun özbaşınalığına haqq qazandırır ki, 4 il qabaq ləğv edilməliymiş, 2 il gecikiblər, bu səbəbdən hələ tələbkar borclu DSMF-in Mərkəzi Filialına 3188.37 manat borcludur!(?) Böyük (çağdaşımız) Mirzə Ələkbər Sabir belə yerdə deyib, BOYLƏCƏ XİDMƏT OLUNUR MİLLƏTƏ, KİM NƏ DEYƏR BİZDƏ OLAN QEYRƏTƏ!

Ombudsmanın 1-ci dərəcəli Qarabağ əlilini 3188.37 manatla şantaj etməsini bir yana qoyaq, bəyəm Konstitusiyanın 149-cu maddəsinin VII hissəsindən soraqsızdır insan hüquqlar üzrə müvəkkil?  “Əmək pensiyaları haqqında” qanunun 19.1.7 maddəsinin 2021-ci ilin 1 yanvarından ləğv edilməsi ilə dövlətin adından çıxarılan  (05.07.2017 tarixli)  məhkəmə qərarının ləğv edilməsi hansı qanunda, hansı Konstitusiyada yazılıb? Aparat rəhbəri görmür ki, cavab şikayətdə qoyulan suala adekvat deyil? Maraqlıdır, Bakı İnzibati Məhkəməsinin (hakim Günel xanım Sevdimalıyeva) 2-1(81)-1889/17 saylı, 05.07.2017-ci tarixli qərarın icra vəziyyəti və qaydası haqqında qısa müddətdə məhkəməyə məlumat verilməsi barədə 19.06.2023 tarixli TƏLƏBİnə nə cavabı verilib? Borclu Xüsusi Şərtlərlə Təyinat üzrə Mərkəzi Filial məhkəməyədəmi tələbkar 1-ci dərəcəli Qarabağ əlilinin qısa müddətdə Filiala 3188.37 manat borcu ödəməli olduğunu bildirib? Ombudsmanın aparatının “qeyrətli” müvəkkilliyi belə düşünməyə haqq verir. “KİM NƏ DEYƏR BİZDƏ OLAN QEYRƏTƏ, QEYRƏTİMİZ BƏLLİ BÜTÜN MİLLƏTƏ.” 

1-ci vitse-prezidentdən göndərilən şikayətə DSMF-in pensiya təminatı şöbəsinin (?- 1-ci vitse-prezidentə şöbə  cavab verir-M.B.) müdiri Eyvaz İsmayılovun 20.07.2023 tarixli, Baş prokurorluqdan ƏƏSMN-ə göndərilən şikayətə nazir müavini Anar Kərimovun  ( imza yerinə yekə bir möhür qoyulub- M.B.)  10.08.2023 tarixli cavablarında da  məhkəmə qərarının görməzliyə vurulduğu , 1-ci dərəcəli Qarabağ qazisinin 3188.37 manat borclu olduğu vurğulanıb. Hüquq doktoru nazir müavininin adından bu hüquqsuzluğa elə özbaşınalıq edən borclu  sirli məmurun qol qoyması şübhəsizdir. Məktubun sonunda gələcəkdə qəbul ediləcək məhkəmə qərarlarının icra olunacağına söz verilməsi bu şübhəsizliyi daha da gücləndirir. “Hüquq”a baxın, 6- 8 , 13 ildir , dövlətin məhkəmə qərarlarını icra etmirlər, gələcəkdə icra edəcəklərinə söz verirlər?! Allah sənə rəhmət eləsin, Sabir, SÖZ VERİRİK İNDİ, BİR AY GƏLMƏMİŞ ASTA QAÇIB DÜRTÜLƏRİK XƏLVƏTƏ, KİM NƏ DEYƏR BİZDƏ OLAN QEYRƏTƏ!

MƏĞRUR BƏDƏLSOY

GundemXeber.Az