Bakı Apellyasiya Məhkəməsi Nəsimi məhkəməsinin qanuna “düzəlişini” təsdiqləyib
Azad İmanovun sədri olduğu heyətin özbaşınalıq azadlığı

8 aydır Nəsimi məhkəməsi cavabdeh AZAL-ın beynəlxalq daşımaçılıq qaydalarını pozmasından dəyən maddi-mənəvi ziyanın beynəlxalq Monreal Konvensiyasına uyğun ödənilməsi barədə iddiamızı süründürür.

Hakim Ramin Xəlilov MPM-in 78.2 maddəsi əsasında cavabdehdə olan kamera görüntülərinin və sərnişin siyahısının təqdim olunması haqqında vəsatət içində olmaqla heç bir müraciətə cavab vermir. Yalnız işin arbitrajın həllinə verilməsi bardə vəsatətə imtina qərardadı ilə cavab verib ki, cavabdeh AZAL razı deyil. Halbuki beynəlxalq mübahisənin predmeti olan iddianın arbitrajın həllinə verilməsi MPM-in 29-cu maddəsində yazılıb və hakim özü bunu tərəflərə təklif etməyə borcludur. Qanunda qarşı tərəfin razılığının tələb olunması nəzərdə tutulmasa da, hakim Ramin Xəlilov özünü cavabdehin vəkili rolunda aparıb və hətta imtina qərardadından 6 şikayəti 3 aydır inadla geri qaytarır ki, birbaşa kabinetdən Ali Məhkəməyə kassasiya şikayəti verilməlidir. (?)

3 aydır ali dövlət hakimiyyəti orqanları AZAL-ın tərəfdarı-“fanatı” hakimə anlada bilmirlər ki, birinci instansiya məhkəməsinin qərardadından şikayətin geri qaytarılması qanunda-MPM-də yazılmayıb. MPM-in 269-cu maddəsində yazılan odur ki, qərardaddan şikayətə aktı çıxarmış hakim 3 gün müddətində yazılı icraat qaydasında baxır; şikayət əsaslıdırsa, qərardadı ləğv edir və sonrakı prosessual hərəkətləri edir; əks halda şikayəti 7 gün müddətində iş materialları ilə birlikdə apellyasiya instansiyasına, məhkəmə aidiyyatından şikayətləri isə kassasiya instansiyasına göndərir.

Ramin Xəlilov özbaşınalığına qanuna “düzəliş” etməklə haqq qazandırıb. 6 şikayətə MPM-ə uyğun baxmayan hakim özünün qərardadlarının nəticə hissəsində 3 aydan sonra yanlışlıq tapıb və bu yanlışlığı “düzəldib”: “Qərardaddan 10 gün müddətinə Nəsimi məhkəməsinə elektron kabinetdən ŞİKAYƏT verilə bilər” qərarı hakimin böyük səhvi imiş, heç demə, ŞİKAYƏT yox, “KASSASİYA ŞİKAYƏTİ verilə bilər” olmalı imiş! Qanuna “düzəliş” özbaşınalığından hakim özünü elə itirib ki, elektron kabinetdən KASSASİYA ŞİKAYƏTİNİN mümkün olmadığını, belə şikayət “pəncərə”sinin açılmadığını” da unudub. Görəcəkli günlərimiz varmış, məhkəmə “qara otaqda olmayan qara pişiyi tutmağı” tələb edir!

Heç demə, görəcəklərimiz hələ qabaqda , Bakı Apellyasiya Məhkəməsinin sədri Azad İmanov olan heyətinin qanuna “düzəlişi” təsdiqləməsində imiş! Bəli, bəli, Azad İmanov və heyəti şikayətin “ağına-bozuna” baxmadan aşağı instansiyanın “düzəliş” hüququnu” qanuni sayıb və notariat kontoru kimi təsdiqləyib.

İndi tam hüquqsuz və çıxılmaz durumdayıq, faktiki məhkəmə müdafiəsi hüququndan məhrum edilmişik. Nədən birbaşa kassasiya şikayəti vermək hüququmuz aktlaşdırılıb, amma elektron kabinet qəbul etmir, kağız daşıyıcıda şikayəti Ali Məhkəməyə göndərmək də qanunda yazılmayıb, yalnız qərardadı çıxaran Nəsimi məhkəməsi vasitəsilə şikayət Ali Məhkəməyə göndərilə bilər . Lap məktubla göndərsək də, hər 2 aşağı instansiyanın dövlət hesabına vəkildən imtina etməsi məhkəmə təminatı hüququmuzun pozulması ilə nəticələnib.

Şikayətlər isə sonucsuzdur. Kimə üz tutaq? Rusiyada məhkəməyə müraciət etmək olar, di gəl bir ildir nə XİN konsulluq xidməti ilə, nə baş prokurorluq beynəlxalq idarəsi ilə, nə də Ombudsman müvəkkillik xidməti ilə hüququmuzu qorumağa çaba göstərir. Ombudsman məhkəmə özbaşınağını hakimlərin fəaliyyəti kimi qiymətləndirib, bu fəaliyyəti yoxlamaq hüququnun olmamasını “reklam müvəkkilliyi” ilə vurğulayır, KM Aparatı 15 aydır Ali Məhkəmənin 3 qərarından şikayətimizi ört-basdır edir, PA, MM, MHŞ hüquq pozucularını cavab verməyə çağırır. Hüquq isə bərpa olunmur ki olunnmur!
Məğrur Bədəlsoy
/hurriyyet.az