Sadə vətəndaşların gəlirləri yenə10 faizinin altında artacaq
2013-cü ildə Azərbaycan əhalisinin sosial-iqtisadi həyatında nə dəyişəcək? Real iqtisadiyyatda nələr gözlənilir? Hökumət rəsmiləri pensiyaların, məvaciblərin artacağını bəyan edir. Bəs müstəqil ekspert nə düşünür?
İqtisadçı-ekspert Akif Nəsirlinin sözlərinə görə, gələn ilin mənzərəsinə ən optimal baxış dövlət büdcəsindən ola bilər: «Gələn ilin dövlət büdcəsində sıçrayıla artım müşahidə edilir. Burada söhbət 30 faizə yaxın artımdan gedir. Lakin sosial sahələrə ayrılan vəsaitlərə baxanda, nəzərəçarpacaq rəqəmlər görmək olmur. Məsələn, əhalinin pensiyasının, məvaciblərin artım imkanları 10 faizdən yüksək olmayacaq».
A.Nəsirli əlavə etdi ki, əsas artımlar investisiya və hüquq-mühafizə orqanları, müdafiə xərclərində olduğuna görə, 20 milyardlıq büdcənin sadə vətəndaşların sosial həyatında hiss edilməsi gözlənilən deyil: «Təəssüf ki, təhsil, səhiyyə sektoruna diqqət əvvəlki ildən fərqlənməyəcək. Daha çox korrupsiya meyilləri olan xərclər kəskin şəkildə yüksələcək. Bütün dünyada da qəbul olunan qaydadır ki, investisiya xərcləri əsasən «yeyinti» yeri üçün nəzərdə tutulur. Büdcə layihəsində belə xərclərin yüksək göstərilməsi onu deməyə əsas verir ki, gələn il bu vəsaitlərə əli çatan zümrə daha da varlanacaq. Büdcədə 30 faizlıq artım bir sıra məmurların iqtisadi vəziyyətinin yaxşılaşmasına xidmət edəcək. Sadə vətəndaşların gəlirləri isə 10 faizinin altında artacaq».