"Qaçqınkom"un köçkünlər üçün tikdiyi binalar qəzalıdır

Dekabrın 27-də Bakının Qaradağ rayonunun Müşfiqabad qəsəbəsində 1440 məcburi köçkün ailəsi üçün yeni salınmış məhəllə istifadəyə verildi. Ölkə başçısının 2004-cü il tarixli Sərəncamı ilə təsdiq edilmiş "Qaçqınların və məcburi köçkünlərin yaşayış şəraitinin yaxşılaşdırılması və məşğulluğunun artırılması üzrə Dövlət Proqramı"na Azərbaycan Prezidentinin 2007-ci il tarixli Sərəncamı ilə təsdiq edilən əlavələrin müvafiq bəndlərinə əsasən inşa olunan şəhərcikdə 1440 ailə və ya 5 min 756 məcburi köçkünün köçürüləcəyi nəzərdə tutulub. Məcburi köçkün ailələrindən 320-si Ağdam, 570-i Cəbrayıl, 290-ı Füzuli, 100-ü Zəngilan, 160-ı isə işğal olunmuş digər rayonlardandır.
Məhəllənin ərazisi 22 hektardır. Ümumilikdə qaçqınların və məcburi köçkünlərin sosial problemlərinin həlli məqsədilə 1993-2012-ci illərdə 5,4 milyard dollar vəsait xərclənib. Dövlət tərəfindən hər cür diqqət və qayğının göstərilməsinə baxmayaraq, Qaçqın və Məcburi Köçkünlərin İşləri üzrə Dövlət Komitəsinin rəsmiləri bəzi nöqsanlarla yadda qalırlar. "Qaçqınkom" sədri Əli Həsənovun qurumda vəzifə tutan yaxın qohumları qaçqın və məcburi köçkünlərin güzəranının yaxşılaşmasına imkan vermirlər. Hərəsi bir tərəfdən qaçqınların payına əl uzadır. Qeyd edək ki, məcburi köçkün ailələri üçün tikilən mənzillərin keyfiyyəti ürəkaçan səviyyədə deyil, şəhərciklərdə qaz, işıq, su və kanalizasiya problemləri var, küçələrə asfalt örtüyü salınmayıb və sairə. "Qaçqınkom"a ayrılan milyonlar layihələrdə nəzərdə tutulan işlər üçün tam sərf olunmur. Bu işlərin başında isə komitə sədrinin xalası oğlu, həm də müavini olan Gəray Fərhadov durur. Vaxtilə tikinti şirkətlərindən birində adi işçi olan Gəray müəllim xalası oğlunun köməyi ilə bu vəzifəyə qədər yüksəlib.
Vəzifə onun başını elə dumanlandırıb ki, qaçqın rayonundan olmasına baxmayaraq, məcburi köçkünlərin taleyinə biganədir. Bizə çatan məlumatlara görə, Müşfiqabad qəsəbəsində açılışı edilən qəsəbəyə məcburi köçkünlər hələ ki, köçürülməyib. Ə.Həsənov açılış zamanı prezidentə mənzillərin hamısının tam təmir olunduğunu deyib. Halbuki, mənzillərin əksəriyyəti təmirsizdir. Deyilirdi ki, açılışdan dərhal sonra binalara köç başlayacaq. Bir aya yaxın vaxt keçsə də, şəhərciyə heç bir ailə köçürülməyib. Ona görə ki, binalardan birində çökmə müşahidə olunub. Bundan qorxuya düşən komitə rəsmiləri prosesi bir müddət təxirə salmalı olublar. Məlumatlara görə, Müşfiqabaddakı binaların tikintisi zamanı yeyinti çox olduğu üçün mənzillər keyfiyyətli deyil.
Binaların özül və tavan hissəsində iri çatlar əmələ gəlib ki, bu da gələcəkdə bədbəxt hadisələri qaçılmaz edə bilər. Mehdiabad yolunun üstündə salınan şəhərcikdən gələn xəbərlər də ürəkaçan deyil. Məlumata görə, qəsəbədə 3, 5, 7 və 11 kimi rəqəmlərin sirri var. Belə ki, şəhərcik salınandan sonra qanunla burdan mənzil almalı olan məcburi köçkün ailələrinə "get 3 gətir", "get 5 gətir" deyə nəysə tələb ediblər. Onlar da borc-xərc deyilən şeyi tapıb mənzillərinə qovuşublar. Evlərin məcburi köçkün olmayanlara verilməsi xəbəri isə G.Fərhadovu özündən çıxarıb.
Bu yaxınlarda Sumqayıtdakı hüzr mərasimində iştirak edən müavin bu söhbəti ortaya çıxaranları boşboğaz adlandırıb və deyib ki, "Qaçqınkom" bizim əlimizdədir, necə istəsək, elə də edə bilərik" və deyib ki, müavini olduğu idarə şəffaf işləyir. Əgər "Qaçqınkom" ədalət prinsipləri ilə idarə olunsaydı, Ə.Həsənov və qardaşlarının, eyni zamanda xalası oğlunun Novxanıda hektarlarla sahəni əhatə edən mülkləri olmazdı. Bəlkə bu imarətlər qaçqınlara ayrılan pullarla tikilib?
Azər