Halal evlərini itirənlərin pulu «Qaçqınkom»a niyə köçürülür?

Qarabağ müharibəsi nəticəsində ev-eşiyindən məcburi köçkün düşmüş bir qrup şəxs mediaya müraciət edib. 30 nəfərin imzası olan müraciətdə deyilir: “Biz, 1995-2000-ci illərdə Binəqədi rayonu, M.Ə.Rəsulzadə qəsəbəsi, 3126-cı məhəllədə torpaq sahələri alaraq ev tikdirdik. Həmin torpaq sahələrini müvafiq olaraq Binəqədi RIH, Rəsulzadə bələdiyyəsi və həyətyanı torpağının bir hissəsini satan vətəndaşlardan almışıq. Həmin ərazidə son günlərə kimi 205 ev olub, bu evlərdən 67-si məcburi köçkünlərə, 138-i isə köçkün olmayan digər şəxslərə məxsus olub.
Yaşadığımız yaşayış məntəqəsi bütün kommunikasiya şəraiti ilə (qaz, işıq, su, telefon, kanalizasiya, yol) təchiz edilib. Həmin ərazidə torpaq alaraq ev tikərkən və orada yaşayarkən bizə və məcburi köçkün olmayan digər vətəndaşlara hər hansı dövlət orqanı tərəfindən etiraz edilməyib və maneçilik törədilməyib. Əksinə, şəraitimizin yaxşılaşdırılması üçün kömək olunub. Lakin 2011-ci ildə Binəqədi RIH, Metropoliten idarəsi və “Qaçqınkom”un nümayəndələri Binəqədi rayonu, Rəsulzadə qəsəbəsi, 3126-cı məhəllədə yerləşən əraziyə gələrək orada yerləşən 205 evin söküləcəyini bildirdilər və ərazidə depo tikiləcəyini dedilər. Bizə bildirildi ki, evləri sökülən şəxslərə evlərinin dəyəri qədər kompensasiya ödəniləcək. Biz də torpaqların dövlət ehtiyacı üçün alınacağına etiraz etmədik.
Bir müddət sonra yenə də müvafiq dövlət orqanlarından nümayəndələr gələrək söküləcək evlərin sakinlərinə Masazır qəsəbəsində hər ailə üçün 5 sot torpaq sahəsi ayrılacağını və mövcud evlərin dəyəri qədər kompensasiya veriləcəyini, tikilənə qədər heç kimin evinə dəyilməyəcəyi bildirdi. Bir neçə ay sonra nümayəndələr gələrək məcburi köçkünlərə ev veriləcəyini, qalan sakinlərə isə heç bir kompensasiya verilməyəcəyini dedilər. Bütün sakinlər bu təklifə etiraz etdi. 2012-ci ilin mart ayında nümayəndələr gələrək evlərə baxış keçirdi və onların dəyərini hesabladı. Bir neçə gün sonra isə gələrək dedilər ki, məcburi köçkünlər dövlət hesabına Mehdiabad qəsəbəsində tikiləcək evlərə köçürüləcək və bütün sakinlərə, yəni plana düşən 205 evin sahibinə evlərinin dəyəri həcmində kompensasiya veriləcək. Bu təkliflə razılaşsaq da 8 aya yaxındır ki, bir neçə məcburi köçkün ailəsi istisna olmaqla qalanlarımız Abşeron rayonu, Mehdiabad qəsəbəsi, Gənclər şəhərciyi deyilən ərazidə tikilmiş bina evlərinə köçmüşük. Həmin evlər bizə müvəqqəti yaşamaq üçün verilib və bu barədə bir neçə məcburi köçkün ailəsi ilə müvəqqəti icarə müqaviləsi bağlanılıb. Hazırda həmin evlərin kimin balansında olması da məlum deyil. Biz dövlətin səlahiyyətli nümayəndələrinin sözlərinə inanaraq köçən kimi, neçə illər əziyyətlə qazandığımız vəsait hesabına tikdiyimiz evləri buldozerin qabağına verərək dağıtdılar. Sonra isə bildirdilər ki, dövlət sizə yaşamaq üçün ev verib, sizə heç bir kompensasiya ödənilməyəcək. Məcburi köçkün olmayan 138 evdə isə hələ ki, sahibləri yaşayır və onlara kompensasiya verilərək evlərinin alınmasına başlanıb.
Bizim ev-eşiyi, mal-mülkü bir dəfə mənfur düşmənimiz dağıdıb məhv edib. Öz ölkəmizdə didərgin həyatı yaşamışıq, indi isə dövlətimizin məmurları bizi aldadaraq əmlakımızı məhv etdi.
Biz evlərimizin dağıdılması nəticəsində vurulmuş ziyanın ödənilməsi ilə bağlı Binəqədi Rayon Məhkəməsinə müraciət etdik. Məhkəmə araşdırması vaxtı cavabdehlərdən biri olan Bakı Metropoliteninin nümayəndəsi həmin ərazidə olan evlərlə bağlı yaradılmış komissiyanın tərtib etdiyi və müvafiq möhürlərlə təsdiq edilmiş sənədləri məhkəməyə verdi. Bəlli oldu ki, Nazirlər Kabinetinə ərazidə olan 205 evin köçürülməsi ilə bağlı edilən müraciətə əsasən dövlət büdcəsindən pul ayrılıb. Lakin məcburi köçkünlərlə iş üzrə Dövlət Komitəsi köçkünlərin evi üçün ödəniləcək kompensasiyanın Komitənin hesabına köçürülməsini istəyib ki, özləri köçkünlər üçün ev alsın. Beləliklə, 67 nəfər köçkünün evinin sökülməsinə görə pul “Qaçqınkom”a, qalan 138 nəfər məcburi köçkün olmayanların evlərinin sökülməsinə görə pul isə onların özünə ödənilib. Bizim hüququmuzu müdafiə etməli olan Komitə dövlətin kompensasiyasını mənimsəməklə bizə çatası pulun verilməsinə imkan yaratmayıb.
Dəymiş maddi ziyan səlahiyyətli orqanlar tərəfindən bizlərə ödənməlidir. Əks təqdirdə, ailə üzvlərimizlə birlikdə Azərbaycan vətəndaşlığından imtina edərək sığınacaq üçün xarici səfirliklərə müraciət edəcəyik"
Malik